ترەمپ و ئەردۆغان باسی زیادکردنی هاوئاهەنگی لەنێوان تورکیا و ئەمریکا دەکەن

 

بەگوێرەی راگەیێندراوێکی سەرۆکایەتیی پەیوەندییەکانی سەر بە سەرۆکایەتیی کۆماری تورکیا کە بەرەبەیانیی ئەمڕۆ (پێنجشەممە، 7-11-2024) بڵاویکردەوە، رەجەب تەیب ئەردۆغان سەرۆککۆماری تورکیا پەیوەندیی بە دۆناڵد ترەمپ، سەرۆکی تازە هەڵبژێردراوی ئەمریکاوە کردووە و پیرۆزبایی لێکردووە.

 

لە پەیوەندییە تەلەفۆنییەکەدا ئەردۆغان هیوای خواستووە لە قۆناخی داهاتوودا هاوئاهەنگیی نێوان ئەمریکا و تورکیا زیاتر بەرەوپێش بچێت. 

 

رەجەب تەیب ئەردۆغان رۆژی چوارشەممە 6-11-2024 لە تۆڕی کۆمەڵایەتیی ئێکس (توویتەری پێشوو)ـش رایگەیاندبوو "پیرۆزبایی لە دۆناڵد ترەمپی هاوڕێم دەکەم، کە دوای ململانێیەکی گەورە لە هەڵبژاردنی سەرۆکایەتیی ئەمریکا، سەرکەوتنی بەدەستهێنا و دووبارە وەکو سەرۆکی ئەمریکا هەڵبژێردرایەوە."

  

ئەوەش لە کاتێکدایە بەپێی ئەنجامە بەراییەکان، دۆناڵد ترەمپ بە جیاوازییەکی بەرچاو لەپێش کامالا هاریسی رکابەریەتی و سەرکەوتنی یەکلایی بووەتەوە.