ئاکپارتی راپرسییەک لەبارەی هۆکارەکانی کەمبوونەوەی دەنگەکانی لە هەڵبژاردنی شارەوانییەکانی تورکیادا دەکات

 

 

لەسەر داواکاریی رەجەب تەیب ئەردۆغان، سەرۆکی گشتیی ئاکپارتی، رێکخستنەکانی ئەو حیزبە دوای جەژن راپرسییەک لەبارەی دەستنیشانکردنی هۆکارەکانی کەمبوونەوەی دەنگەکانیان لە هەڵبژاردنی شارەوانییەکانی باکووری کوردستان و تورکیا دەکەن.

 

راپرسییەکە 40 پرسیار لەخۆدەگرێت و سێ لە پرسیارەکان ئەمانەن: تا چەند لە شارەوانییەکانی ئاکپارتی رازیت؟ بۆچی بەشداریت لە هەڵبژاردندا نەکرد؟ چاوەڕوانیت چی بوو؟

 

شەوی 31ـی ئاداری 2024 دوای ئاشکرابوونی ئەنجامی هەڵبژاردنەکە، رەجەب تەیب ئەردۆغان گوتارێکی پێشکێش کرد و رایگەیاند، ئەنجامەکەیان بەدڵ نییە و گوتی، هەر کەسێک هەڵەی کردبێت و کەموکوڕی هەبێت رێکاری پێویستی بەرامبەر دەگیرێتەبەر دەکرێت.

 

سەرۆکی ئاکپارتی گوتی، "یان هەڵەکانمان دەستنیشان دەکەین و ریزەکانمان تۆکمە دەکەینەوە یان وەک بەفر لەژێر تیشکی خۆردا دەتوێینەوە."

 

رۆژی 31ی ئاداری 2024، لە تورکیا و باکووری کوردستاندا 30 گەورە شارەوانی، 51 شارەوانیی شارەکان، 973 شارەوانیی قەزاکان و 390 شارەوانیی ناحیەکان؛ 20 هەزار و 745 ئەندامی ئەنجوومەنی شارەوانییەکان و هەزار و 272 ئەنجوومەنی گشتیی شارەکان؛ هەروەها 50 هەزار و 336 موختار هەڵبژێردران.

 

لە هەڵبژاردنەکەدا 61 ملیۆن و 441 هەزار و 882 کەس مافی دەنگدانیان هەبوو.

 

جەهەپە لەسەر ئاستی تورکیادا 17 ملیۆن و 391 هەزار و 548 دەنگی بەدەستهێنا و بە 37.77٪ بە یەکەم دەرچوو و سەرۆکایەتیی 35 شارەوانیی بەدەستهێنا؛ ئاکپارتی بە 16 ملیۆن و 339 هەزار و 771 دەنگ بەرێژەی 35.49٪ دووەم دەرچوو و سەرۆکایەتیی 24 شارەوانیی بەدەستهێنا؛ دەم پارتی بە دوو ملیۆن و 625 هەزار و 588 دەنگ و بە رێژەی 5.70٪ براوەی سێیەم بوو کە سەرۆکایەتیی 10 شارەوانیی شارەکانی بردەوە. مەهەپە بە دوو ملیۆن و 297 هەزار و 662 دەنگ 4.99٪ی دەنگەکانی بەدەستهێنا و سەرۆکایەتیی هەشت شارەوانیی شارەکانی بردەوە. پارتی سەرلەنوێ رەفاهـ بە دوو ملیۆن و 851 هەزار و 784 دەنگ و بەرێژەی 6.19٪ تەنیا دوو شارەوانیی بردەوە.