رووداو دیجیتاڵ
لە ئەنجامی دەستڕێژی گوللـە، کەسێک لە ئیستەنبووڵ دایک و براکەی دەکوژێت و خوشک و باوکیشی بە سەختی بریندار دەکات.
رووداوەکە ئێوارەی ئەمڕۆ شەممە، 6ـی نیسانی 2024، لە گەڕەکی ڤەیسەل کارانی سەر بە ناوچەی سانجاکتەپە لە ئیستەنبووڵ روویدا، کاتێک کەسێک بەناوی یوسف فورات، بە دەمانچە تەقە لە تەواوی ئەندامانی خێزانەکەی دەکات.
لە ئەنجامدا سەبیحەی دایکی، بیلالی برا گەورەکەی دەکوژرێن و مورادی باوکی و زەهرای خوشکیشی بە سەختی بریندار دەبن. یوسف دوای تەقەکردن لە خێزانەکەی هەوڵی خۆکوشتن دەدات و بەسەختی خۆی بریندار دەکات.
هەرچەندە تاوەکو ئێستا هۆکاری رووداوەکە نەزانراوە، بەڵام دراوسێیەکان دوای ئەوەی گوێیان لە دەستڕێژی گوللـە دەبێت، دەستبەجێ پەیوەندیی بە هێزە ئەمنییەکانەوە دەکەن. بە گەیشتنی هێزە ئەمنییەکانیش بۆ ناونیشانەکە، تەرمی دوو کەس و برینداربوونی سێ کەسی دیکەی خێزانەکە لەنێو ژووری میواندا دەدۆزنەوە و بریندارەکان بە ئەمبووڵانس دەگوازرێنەوە نەخۆشخانە.
پۆلیسی ناوچەی سانجاکتەپە، دەستی بەلێکۆڵینەوە کردووە بۆ زانینی هۆکاری تەقەکردنەکە و بۆیان دەرکەوتووە، ئەو دەمانچەیەی یوسف تەقەی پێکردووە بێمۆڵەت بووە.
بەگوێرەی راپۆرتی 2023ـی دەزگای ئوموت بۆ بەرەنگاربوونەوەی تووندوتیژی و کەمکردنەوەی خاوەندارێتی چەک، پارساڵ سێ هەزار و 773 تاوانی کوشتن بە چەک کراوە، بەهۆیەوە دوو هەزار و 318 کەس کوژراون و سێ هەزار و 820 کەس برینداربوون.
٪85ی تاوانەکان کە سێ هەزار و 212 تاوانە بە دەمانچە، کلاشنکۆف و تفەنگی کەسییەوە کراون. لەنێو ئەم ژمارەیەدا دوو هەزار و 427تاوان بە دەمانچە و 784 تاوان بە کلاشنکۆف و تفەنگی دیکە کراون.
بەگوێرەی دەزگای ئوموت، "بەرامبەر هەر چەکێکی بە مۆڵەت، 9 چەکی بێ مۆڵەت هەیە. لە سەرانسەری تورکیادا 4 ملیۆن چەکی مۆڵەتدراو هەیە. لە بەرامبەردا نۆ هێندە چەکی بێ مۆڵەت هەیە، کە مەزەندە دەکرێت ژمارەیان 36 ملیۆن چەک بێت. ئەمە بەو مانایە دێت لە هەر سێ ماڵ یەکێکیان چەکی لێیە."
بەگوێرەی راپۆرتی ساڵی 2022ی دەزگای ئوموت، لە 3 هەزار و 984 رووداوی باکووری کوردستان و تورکیادا چەک بەکارهێندراوە. لە ئەنجامدا 2 هەزار و 278 کەس کوژراون و 4 هەزار و 231 کەسی دیکەش بریندار بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ