لە تورکیا دەستبەسەر 1.3 تۆن مادەی هۆشبەردا گیرا
رووداو دیجیتاڵ
وەزیری ناوخۆی تورکیا رایگەیاند، لە ئۆپەراسیۆنێکدا کە لە 46 پارێزگای تورکیا و باکووری کوردستان بەڕێوەچوو، دەستیان بەسەر 1.3 تۆن مادەی هۆشبەردا گرتووە.
ئەمڕۆ شەممە 6ـی کانوونی دووەمی 2024، عەلی یەرلیکایا، وەزیری ناوخۆی تورکیا رایگەیاند، بەهاوئاهەنگیی هێزەکانی بەرەنگاربوونەوەی مادەی هۆشبەر، پاسەوانانی سنوور و هێزەکانی جەندرمە و ئاسایش ئۆپەراسیۆنێکی هاوکاتیان لە 46 پارێزگای تورکیا و باکووری کوردستان لە دژی بازرگانانی مادەی هۆشبەر کردووە. لە ئۆپەراسیۆنەکە دەستیان بەسەر یەک تۆن و 340 کگم مادەی هۆشبەردا گرتووە، هەروەها 364 تۆمەتباریان دەستگیرکردووە، کە یەکێکیان بیانییە.
یەرلیکایا باسی لەوەشکرد، ئۆپەراسیۆنەکە بە بەشداری 1373 کارمەندی هێزە ئەمنییەکان کرا کە بەسەر 332 تیم دابەشکرابوون. هەروەها دوو هێلیکۆپتەر و 19 سەگی راهێنراو لە دۆزینەوەی مادەی هۆشبەردا تێیدا بەشداربوون.
ئۆپەراسیۆنەکان لە پارێزگاکانی دیلۆک، مەلەتێ، رووها، قەرس، ئامەد، ئێلیە، خارپێت، سێواس، سێرت، مەرەش، سەمسوور و ئەرزەڕۆمی باکووری کوردستان و پارێزگاکانی ئەنقەرە، ساکاریا، ئادانا، ئیزمیر، کرکلارئێلی، مەرسین، ئەنتالیا، بورسا، ئیستەنبووڵ، ئەدیرنە، کارامان، تۆکات، ئاماسیا، عوسمانییە، کۆجائێلی، کۆنیا، سامسون، ئایدن، تەکیرداغ، چۆروم، کرشەهیر، بالکئەسیر، ئیسپارتا، هاتای، کایسەری، ئەسکیشەهیر، کوتاهیا، موغڵا، ئاکسارای، چاناککالە، مانیسا، کاستامۆنو، دوزجە و یالۆڤا کران.
وەزیری ناوخۆی تورکیا ئاماژەی بەوەدا لە ئۆپەراسیۆنەکەدا دەستیان بەسەر ژمارەیەک چەکی بێ مۆڵەتیشدا گرتووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ