رووداو دیجیتاڵ
شەوی رابردوو، وەزیری دەرەوەی ئەمریکا گەیشتە ئیستەنبووڵ و بڕیارە ئەمڕۆ لەگەڵ وەزیری دەرەوە و سەرۆککۆماری تورکیا کۆببێتەوە.
میدیای فەرمیی تورکیا بڵاویکردەوە، شەوی رابردوو 5ـی کانوونی یەکەمی 2024، ئەنتۆنی بلینکن، وەزیری دەرەوەی ئەمریکا، بەسەردانێکی فەرمی گەیشتە ئیستەنبووڵ و ئەمڕۆ شەممە، یەکەم کۆبوونەوەی لەگەڵ هاکان فیدان هاوتا تورکیاییەکەی دەبێت و بڕیارە لەگەڵ رەجەب تەیب ئەردۆغان، سەرۆککۆماری ئەم وڵاتەش کۆببێتەوە.
هەر بەگوێرەی میدیای فەرمیی تورکیا، رۆژەڤی سەرەکیی گفتوگۆی نێوان ئەنتۆنی بلینکن و هاکان فیدان، پرسی غەززە دەبێت.
رۆژی 3ـی کانوونی دووەمی 2024، هاکان فیدان، وەزیری دەرەوەی تورکیا، لە کۆبوونەوەی تایبەتی لەگەڵ میدیاکاران و رۆژنامەڤانانی وڵاتەکەیدا باسی لەوە کرد، رۆژی 6ـی مانگ لە ئەنقەرە لەگەڵ ئەنتۆنی بلینکن کۆدەبێتەوە و گوتی، "بلینکن گەشتێک بۆ ناوچەکە دەکات، ئەگەر هیچ گۆڕانکارییەک لە خشتەی کارەکانی روونەدات، رۆژی شەممە لە ئەنقەرە میوانم دەبێت".
فیدان، لەبارەی هێرشەکانی ئیسرائیل بۆ سەر کەرتی غەززە گوتی، "پشتیوانی بێ مەرجی ئەمریکا و هەندێک لە وڵاتانی رۆژئاوا، گرفتی سەرەکییە. کۆمەڵگای نێودەوڵەتیش هەوڵی پێویستی نەداوە بۆ راگرتنی هێرشەکان". باسی لەوەشکرد رۆژی 6ـی ئەم مانگە ئەم بابەتە لەگەڵ هاوتا ئەمریکییەکەی باس دەکات.
رۆژی 4ـی کانوونی دووەم، ماتیۆ میلەر، گوتەبێژی وەزارەتی دەرەوەی ئەمریکا رایگەیاندبوو، بەمەبەستی گفتوگۆکردنی چەند پرسێکی هەستیار، ئەنتۆنی بلینکن، گەشتێکی یەک هەفتەیی بۆ هەریەک لە تورکیا، یۆنان، ئوردن، قەتەر، ئیمارات، سعودیە، ئیسرائیل، کەرتی رۆژئاوای فەلەستین و میسر دەکات.
میلەر باسی لەوەشکرد، جەنگی غەززە، گەیاندنی هاوکاری مرۆیی بۆ کەرتەکە و ئازادکردنی بارمتە و گیراوەکانی هەردوولایەن لە پرسە هەرە گرنگەکانی گەشتەکەی دەبێت بۆ ناوچەکە.
رۆژی 6ـی تشرینی دووەمی 2023، ئەنتۆنی بلینکن لە بەغداوە گەیشتە ئەنقەرە و لەبارەی شەڕی گرووپە چەکدارەکانی فەلەستین و ئیسرائیل، بۆ پرسی ئازادکردنی بارمتەکان و راگەیاندنی ئاگربەستی کاتی، لەگەڵ هاکان فیدان، وەزیری دەرەوەی تورکیا کۆبووەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ