هەڵبژاردن لە ئەردەخان دووبارە ناکرێتەوە؛ بەربژێرەکەی جەهەپە دەبێتە سەرۆکی شارەوانی

 

 

رۆژی 3ـی نیسانی 2024، یونس بایدار، بەربژێری ئاکپارتی بۆ سەرۆکایەتیی شارەوانیی ئەردەخان و لقی رێکخستنەکانی ئەردەخانی ئاکپارتی سکاڵایان تۆمارکرد و بانگەشەی بوونی ساختەکارییان لە دەنگدان لەو شارەی باکووری کوردستان کرد.

 

سکاڵاکە لەلایەن چوار ئەندامی لقی ئەردەخانی دەستەی باڵای هەڵبژاردنەکانەوە پەسند کرا و بڕیاریاندا رۆژی 2ـی حوزەیرانی ئەم ساڵ هەڵبژاردن دووبارە بکرێتەوە، بەڵام تیمی پارێزەرانی جەهەپە تانەیان لە بڕیارەکە دا و سکاڵایان پێشکێشی ئەنجوومەنی دادوەرانی دەستەکە کرد. 

 

ئەمڕۆ هەینی، 5ـی نیسانی 2024، ئەنجوومەنی دادوەریی دەستەی باڵای هەڵبژاردنەکانی تورکیا وردبینی بۆ هەردوو سکاڵاکەی ئاکپارتی و جەهەپە کرد و لە بەرژەوەندی جەهەپە بڕیاریدا و رایگەیاند، هیچ جۆرە ساختەکارییەک نەکراوە و جەهەپە براوەی ئەردەخانە و ئەنجامەکەشی پەسند کرد. 

 

ئەنجوومەنی دادوەریی دەستەی باڵای هەڵبژاردنەکانی تورکیا بڕیاریشی دا سبەی شەممە 6ـی مانگ فەرمانی دەستبەکاربوون بە بەربژێرە سەرکەوتووەکەی جەهەپە دەربکات. 

 

لە هەڵبژاردنی 31ـی ئاداری 2024دا فاروق دەمیر، بەربژێری جەهەپە بۆ سەرۆکی شارەوانی ئەردەخان پێنج هەزار و 49 دەنگی بەدەستهێنا و بە رێژەی 45.06٪ی دەنگەکان بە سەرۆکی شارەوانیی ئەردەخان هەڵبژێردرا. یونس بایداریش چوار هەزار و 875 دەنگ و رێژەی 43.51٪ی دەنگەکانی بردەوە. 

 

رۆژی 31ـی ئاداری 2024، هەڵبژاردنی شارەوانییەکان لە تورکیا و باکووری کوردستان بەڕێوەچوو. جەهەپە 17 ملیۆن و 391 هەزار و 548 دەنگی بەدەستهێنا و بە 37.77٪ بە یەکەم دەرچوو و سەرۆکایەتیی 35 شارەوانی بەدەستهێنا؛ ئاکپارتی بە 16 ملیۆن و 339 هەزار و 771 دەنگ بەرێژەی 35.49٪ دووەم دەرچوو و سەرۆکایەتیی 24 شارەوانیی بەدەستهێنا. دەم پارتی بە دوو ملیۆن و 625 هەزار و 588 دەنگ و بە رێژەی 5.70٪ براوەی سێیەم بوو کە سەرۆکایەتی 10 شارەوانیی شارەکانی بەدەستهێنا؛ مەهەپە بە دوو ملیۆن و 297 هەزار و 662 دەنگ 4.99٪ی دەنگەکانی بەدەستهێنا و سەرۆکایەتیی هەشت شارەوانیی شارەکانی بردەوە. پارتی سەرلەنوێ رەفاهـ بە دوو ملیۆن و 851 هەزار و 784 دەنگ و بەرێژەی 6.19٪ تەنیا دوو شارەوانی بردەوە.