رووداو دیجیتاڵ
سوپای تورکیا کوژرانی ئەفسەرێکی وڵاتەکەی لە ناوچەکانی ئۆپەراسیۆنی ناسراو بە چنگ – قوفڵ لە هەرێمی کوردستان راگەیاند.
ئەمشەو (5ـی شوباتی 2025) وەزارەتی بەرگریی تورکیا، لە هەژماری تایبەتی لە تۆڕی ئێکس کوژرانی موراد کەمال یەتیشەن، ئەفسەر بە پلەی رائیدی کۆماندۆ لە سنووری ناوچەکانی ئۆپەراسیۆنی ناسراو بە چنگ – قوفڵ لە ناوچەی زاپ راگەیاند.
بەگوێرەی راگەیێندراوی وەزارەتەکە، ئەفسەرەکەیان لە کاتی کێوماڵکردنی ناوچەکە ''بۆ گەڕان بەدوای بۆمب و مینەکانی پەکەکە لە بەشێکی دیاریکراوی ناوچەی زاپ، مینێکی پێدا تەقیوەتەوە و گیانی لەدەستداوە.''
رۆژی 22ـی کانوونی دووەمی 2025ـیش ئەفسەرێکی سوپای تورکیا لە ئەنجامی هێرشێکی گەریلاکانی پەکەکە دوای ئەوەی بە سەختی بریندار بوو، لە نەخۆشخانەی سەربازی لە ئەنقەرە، گیانی لەدەستدا.
رۆژی 27ـی کانوونی دووەمی 2025، لیوا زەکی ئاکتورک، راوێژکاری پەیوەندییەکان و راگەیاندن لە وەزارەتی بەرگریی تورکیا، لە کۆنفرانسی رۆژنامەڤانیی هەفتانەی وەزارەتەکەدا رایگەیاند، لە ئەنجامی ئۆپەراسیۆنە ئاسمانییەکانی سوپای تورکیا، هەفتەی رابردوو 69 گەریلا و شەڕڤان کرانە ئامانج، کە 14ـیان گەریلا و 55ـیان شەڕڤان بوون. گوتیشی "لەسەرەتای ئەم ساڵەوە 221 تیرۆریست لەناوبران کە 64ـیان لە باکووری عێراق و 157ـیان لە باکووری سووریا کرانە ئامانج."
هەر ئەمڕۆ ناوەندی راگەیاندن و چاپه‌مه‌نیی هێزەکانی پاراستنی گەل (هەپەگە) کوژرانی دوو سەرباز و برینداربوونی سەربازێکی دیکەی سوپای تورکیا لە ئەنجامی هێرشێکیان بۆ سەر هێزەکانی تورکیا لە ناوچەی زاپ راگەیاند.
باس لەوەشکرا لە هەفتەیەکدا سوپای تورکیا 28 جار بە فڕۆکەی جەنگی، 6 جار بە هێلیکۆپتەر و 34 جاریش بە درۆن هێرشی کردووەتە سەر پێگەکانی پەکەکە.
هەپەگە هەروەها ناسنامەی سێ گەریلای پەکەکەی بڵاوکردەوە کە لە رووبەڕووبوونەوەیەکی سەربازیدا لە ناوچەی مەتین لە خاکی هەرێمی کوردستان گیانیان لەدەستداوە.
ئەم شەڕ و پێکدادانە لە چوارچێوەی ئۆپەراسیۆنێکدایە، کە تورکیا ناوی ناوە چنگ- قوفڵ و لە بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکرد. هەرچەندە بەرپرسانی وەزارەتی بەرگریی تورکیا دەڵێن قوفڵەکە داخراوە و ئۆپەراسیۆنەکان راگیراون، بەڵام رۆژانە بۆردوومانەکانی فڕۆکە جەنگییەکان و درۆنەکان، بۆ سەر پێگەکانی پەکەکە تاوەکو ئێستاش بەردەوامە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ