رووداو دیجیتاڵ
بەگوێرەی پرۆگرامی دەم پارتی، سبەی دووشەممە شاندی ئیمراڵی سەردانی هەریەک لە ئاکپارتی، پارتی ئاییندە و پارتی سەعادەت دەکات.
شاندی دەم پارتی رۆژی 28-12-2024 سەردانی دوورگەی ئیمراڵی کرد و لەگەڵ عەبدوڵڵا ئۆجەلان، رێبەری زیندانیکراوی پەکەکە دیداری سازکرد. دواتریش لەگەڵ هەریەک لە نومان کورتوڵموش، سەرۆکی پەرلەمانی تورکیا و دەوڵەت باخچەلی، سەرۆکی پارتی بزووتنەوەی نەتەوەیی (مەهەپە) کۆبووەوە.
بڕیارە سبەی لەگەڵ سێ پارتی دیکە کۆببێتەوە. کاژێر 11:00ی پێش نیوەڕۆ لەگەڵ پارتی ئاییندە کۆدەبێتەوە. کاژێر 1ی دوای نیوەڕۆ لەگەڵ ئاکپارتی و کاژێر 3:30ی ئێوارەش لەگەڵ پارتی سەعادەت.
دوای تەواوکردنی دیدار و کۆبوونەوەکانیان لەگەڵ لایەنە سیاسی و رێکخراوەکانی کۆمەڵگەی مەدەنی، بڕیارە شاندی دەم پارتی رۆژی 10ـی کانوونی دووەمی 2025، بۆ جاری دووەم سەردانی دوورگەی ئیمراڵی بکاتەوە.
بەڵام وا بڵاوکراوەتەوە کە پێش سەردانەکە، هەریەک لە سڕی سورەییا ئۆندەر و پەروین بوڵدان، سەردانی گرتووخانەی سزا قورسەکانی ئەدیرنە دەکەن و لەگەڵ سەلاحەدین دەمیرتاش، هاوسەرۆکی پێشووتری هەدەپە کۆدەبنەوە.
رۆژی 29ـی کانوونی یەکەمی 2024، شاندێکی دەم پارتی کە لە پەروین بوڵدان و سرری سورەییا ئۆندەر پێکهاتبوو، لەسەر زاری ئۆجەلانەوە راگەیێندراوێکیان بڵاوکردەوە، تێیدا ئۆجەلان جەختی لە گرنگیی برایەتیی کورد و تورک کردەوە و ئاماژەی بەوە کردووە، هەر شتێک بۆ پرۆسەی ئاشتی پێویست بێت، دەیکات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ