لە 12 پارێزگای باکووری کوردستان و تورکیا بەفر و بارانی بەلێزمە دەبارێت

 

بەگوێرەی کەشناسیی تورکیا، ئەمڕۆ (یەکشەممە، 3ـی تشرینی دووەم) لە شوێنە بەرزەکانی پارێزگاکانی ئەردەخان، شرنەخ، جۆلەمێرگ و وان ـی باکووری کوردستان بەفر دەبارێت. لە هەشت پارێزگای دیکەی باکووری کوردستان و دوو پارێزگای تورکیاش بارانی بەخوڕ دەبارێت و ئەگەری دروستبوونی لافاو هەیە. 

 

سەبارەت بە پلەی گەرما، کەشناسیی تورکیا پێشبینی دەکات پلەی گەرما لە بەشێکی پارێزگەکانی تورکیا و باکووری کوردستان، 5 بۆ 9 پلەی سیلیزی دابەزێت. 

 

کەشناسیی تورکیا بۆ ئەو پارێزگایانەی ئەگەری هەیە بارانی بەخوڕیان لێ ببارێت، داوای لە خەڵک کردووە ئاگاداری خۆیان بن تاوەکو لە کاتی دروستبوونی لافاو و هەورەبرووسکە، زیانیان بەرنەکەوێت.