هاوسەرۆکی دەم پارتی: چارەسەرنەکردنی پرسی کورد هۆکاری لاوازیی تورکیایە لە رۆژهەڵاتی نێوەڕاست

 

 

تولای هاتیمئۆغوڵڵاری، هاوسەرۆکی پارتی یەکسانی و دیموکراسیی گەلان (دەم پارتی) دوێنێ هەینی بەشداری لە بەرنامەیەکی تەلەڤیزیۆنیدا کرد و لەبارەی چەند مژارێک قسەی کرد.

 

هاتیمئۆغوڵڵاری گوتی، تورکیا بە چارەسەرکردنی پرسی کورد دووچاری تەنگژە نابێت و رایگەیاند، "ئەگەر لەم وڵاتەدا کێشەی کورد نەبێت و هەموو هاووڵاتییان هەست بە یەکسانی بکەن و بە زمانی دایک بخوێنن، وڵات دابەشنابێت."

 

هاوسەرۆکی دەم پارتی باسی لە کاریگەریی خراپی چارەسەرنەکردنی پرسی کورد لە تورکیا کرد و گوتی، "ئەگەر ئەمڕۆ لە رۆژهەڵاتی نێوەڕاست تورکیا لاواز بێت و دووچاری قەیرانی ئابووری بووبێت، هۆکارەکەی ئەوەیە پرسی کورد چارەسەرنەکراوە."

 

هاوسەرۆکی دەم پارتی سەبارەت بە هەنگاوەکانی ئەم دواییەی ئاکپارتی و مەهەپە گوتی، "ئایا بەڕاستی چارەسەرکردنی پرسی کورد بەشێوەیەکی ئاشتیانە و دیموکراسییانە لە پشت ئەو هەنگاوەی ئەوان هەیە؟ تاوەکو ئیستا دڵنیا نین. ئێوە لەلایەک دەستتان درێژ دەکەن (تەوقە دەکەن) و لەلایەکی دیکەوە شەق و زللە دەوەشێنن. پرۆسەی چارەسەری بەو شێوەیە نابێت."

 

هاتیمئۆغوڵڵاری جەختی لە پاڵپشتیی پارتەکەی بۆ پرۆسەی چارەسەری کردەوە و گوتی، "ئەگەر ئومێدێکی بچووکیش هەبێت، ئێمە دەمانەوێت ئەو ئومێدە گەورە بکەین. کێشەی کورد بە چەک و شەڕ چارەسەر نابێت. پێویستە شەڕوپێکدادان کۆتایی بێت و پرۆسەیەکی ئاشتی و دیموکراسییانە دەستپێبکات."

 

دەوڵەت باخچەلی سەرەتای مانگی رابردوو لەگەڵ ژمارەیەک لە پەرلەمانتارانی دەم پارتی تەوقەی کرد و رۆژی 22-10-2024 ش لە کۆبوونەوەی فراکسیۆنی پارتەکەیدا داوای کرد عەبدوڵڵا ئۆجەلان، رێبەری زیندانیکراوی پەکەکە بچێتە کۆبوونەوەی فراکسیۆنی دەم پارتی لە پەرلەمان و هەڵوەشاندنەوەی پەکەکە رابگەیێنێت و بەو جۆرەش شەڕی نێوان پەکەکە و سوپای تورکیا کە زیاتر لە 40 ساڵە بەردەوامە کۆتایی پێ بێنێت.

 

رۆژی 30-10-2024یش رەجەب تەیب ئەردۆغان، سەرۆککۆماری تورکیا لەبارەی ئەو بابەتە قسەی کرد و گوتی، "ئەگەر خوا تەمەن و دەرفەت بدات، نیازمان هەیە ئەم پرسە (پرسی کورد) لە رۆژەڤی وڵاتەکەمان بە تەواوی دەربهێنین و تاج بخەینە سەر 40 ساڵەی سیاسیمان کە بە خزمەتی گەل تێپەڕیوە."