ئامادەکاریی مزگەوتەکانی باکووری کوردستان بۆ پێشوازی لە مانگی رەمەزان
رووداو دیجیتاڵ
لە مزگەوتە دێرینەکانی شاری مێردینی باکووری کوردستان ئامادەکاری بۆ مانگی رەمەزان کرا و تەنیا لە دوو رۆژی پێش دەستپێکردنی رەمەزاندا، هەزار و 175 مزگەوتی شارەکە خاوێنکرانەوە.
محەممەد ساڵح، بەڕێوەبەری خزمەتگوزاریی شارەوانیی مێردین دەڵێت، "لەگەڵ هاتنی مانگی رەمەزان، بۆ ئەوەی نوێژخوێنان لە کەشێکی ئارام و ژینگەیەکی پاکوخاوێندا خواپەرستی بکەن، لەگەڵ هاوکارانمان هەڵمەتی شۆردن و پاکڕاگرتنی مزگەوتەکانمان دەستپێکرد. رێوشوێنی خۆپارێزیی کۆرۆناش دەگرینەبەر".
لە شاری خارپیتی باکووری کوردستان بە هەمانشێوە مزگەوتەکان خاوێنکرانەوە و موفتی شارەکە دەڵێت، لە دوو رۆژی رابردوودا هەزار و 35 مزگەوتەکەی خەرپیت شۆردراون و ئامادەن بۆ ئەوەی لەم مانگی رەمەزانەدا هاونیشتمانیان بەندایەتیییان تێدا بکەن.
سەلامی ئایدن، موفتی خارپیت باسی لەوە کرا، "لە تەواوی سنوورەکانی شار و شارۆچکەکانی خارپیت، ئامادەکارییەکان بۆ پێشوازیی لە مانگی رەمەزان کۆتاییان هاتووە".
بە گوێرەی ئامارە فەرمییەکان، لە باکووری کوردستان و تورکیادا 89 هەزار و 445 مزگەوت هەن؛ 20 هەزار و 976 لەوان لە باکووری کوردستانن؛ پارێزگای رووها بە دوو هەزار و 86 مزگەوت لە ریزبەندی یەکەمی باکووری کوردستاندایە لە هەبوونی ژمارەی زۆری مزگەوتدا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ