پار زیاتر لە یەک ملیۆن گەشتیاری خەڵکی باشووری کوردستان و عێراق چوونەتە تورکیا

 

 

دەستەی ئاماری تورکیا، داتاکانی تایبەت بە کەرتی گەشتوگوزاری ساڵی 2023ـی بڵاوکردەوە و دەڵێت، 57 ملیۆن و 77 هەزار و 440 هاووڵاتی بیانی بۆ گەشتکردن سەردانی باکووری کوردستان و تورکیایان کردووە. یەک ملیۆن و 51 هەزار و 721 کەسیان خەڵکی باشووری کوردستان و عێراق بوون. 

 

بەگوێرەی ئامارە فەرمییەکە، رووسیا بە 6 ملیۆن و 313 هەزار و 675 گەشتیار لە ریزبەندی یەکەم بووە؛ ئەڵمانیا بە 6 ملیۆن و 193 هەزار و 259 گەشتیار لە ریزبەندی دووەم هاتووە؛ لە ریزبەندی سێیەمدا بەریتانیا بە 3 ملیۆن و 800 هەزار و 922 گەشتیار و لە ریزبەندی چوارەمیشدا بولگاریا بە 2 ملیۆن و 893 هەزار و 92 گەشتیار هاتووە. لە ریزبەندی پێنجەمدا ئێران بە 2 ملیۆن و 504 هەزار و 494 گەشتیار؛ جۆرجیا بە 1 ملیۆن و 633 هەزار و 977 گەشتیار لە ریزبەندی شەشەم؛ پۆڵەندا بە 1 ملیۆن و 539 هەزار و 123 گەشتیار لە ریزبەندی حەوتەم؛ ئەمریکا بە 1 ملیۆن و 334 هەزار و 337 گەشتیار لە ریزبەندی هەشتەم؛ هۆڵەندا بە 1 ملیۆن و 232 هەزار و 220 گەشتیار لە ریزبەندی نۆیەم و عێراق بە 1 ملیۆن و 51 هەزار و 721 گەشتیار لە ریزبەندی دەیەم بوون.   

 

دەستەی ئاماری تورکیا ئاماژەی بەوە کردووە، کۆی گشتیی داهاتی گەشتیارانی بیانی بۆ تورکیا 54 ملیار و 315 ملیۆن و 542 هەزار دۆلاری ئەمریکی بووە. 

 

بە گوێرەی ئامارەکە، هەر گەشتیارێکی بیانی تێکڕا رۆژانە 99 دۆلاری لە تورکیا خەرجکردووە. لەو پارەیەش 70.7٪ی بۆ خواردن، خواردنەوە، گەڕان، وەرزش و رابواردن و 33.2٪یشی بۆ مانەوە لە هۆتێل و مۆتێل بووە. 

 

بەگوێرەی ئامارەکانی وەزارەتی کولتوور و گەشتوگوزاری تورکیا، لە ساڵی 2022دا 46 ملیۆن و 164 هەزار و 954 گەشتیاری بیانیی چوونەتە تورکیا. ساڵی 2021یش ژمارەی ئەو گەشتیارە بیانییانەی سەردانی تورکیا کرد 30 ملیۆن و 93 هەزار و 446 و لە ساڵی 2019یش 26 ملیۆن و 524 هەزار و 111 گەشتیار بوون.