لە تورکیا نرخی پەڕینەوەی ئۆتۆمبێل لە پرد و رێگەوبانەکان 76٪ زیاد کرا

 

بەرێوەبەرایەتیی گشتیی رێگەوبانەکانی تورکیا، ئەمڕۆ (دووشەممە، یەکی کانوونی دووەمی 2024) نرخی بەکارهێنانی رێگەوبان و پردەکانی لە نێوان 50٪ بۆ 76٪ بەرزکردەوە.

 

بەڕێوەبەرایەتیی گشتیی رێگەوبانی تورکیا لە هەژمارەکانی خۆی لە سۆشیاڵ میدیا رایگەیاند، لە یەکی کانوونی دووەمی 2024 ـەوە نرخی پەڕینەوە لە پرد و رێگەوبانەکان گران کراوە.

 

بەپێی نرخە نوێیەکان، نرخی بەکارهێنانی رێگەوبانەکان بۆ ئۆتۆمبێل لە نۆ لیرە دەستپێدەکات و زۆرترینی 84 لیرە دەبێت، هەروەها نرخی بەکارهێنانی پردە تەسکەکان لە 15 لیرەوە دەستپێدەکات و زۆرترینیش 295 لیرە دەبێت.

 

بۆ کۆمپانیاکانی گواستنەوە، بەکارهێنانی رێگەوبانەکان لە 110 لیرە دەستپێدەکات و زۆرترین بڕی 1400 لیرە دەبێت. 

 

لە تورکیا و باکووری کوردستان لەزگەیەکی تایبەت لە جامی پێشەوەی ئۆتۆمبێلەکان دەدرێت و لە رێگەی کامێرای تایبەتەوە دەخوێندرێتەوە، هەروەها وەک کارتی مۆبایلیش لە رێگەی ئەپلیکەیشنەوە باڵانسی تێدەکرێت و بەو هۆیەوە پارەی پەڕینەوە لە پرد و رێگەوبانەکان دەدرێت.