رووداو دیجیتاڵ
حکومەتی نوێی سووریا، کە زیاتر لە کەسە نزیکەکانی ئەحمەد شەرع، سەرۆکی کاتیی سووریا پێکهاتووە، رووبەڕووی ئاڵنگاریی گەورەی بەدەستهێنانی متمانەی خەڵکی سووریا و وڵاتانی رۆژئاوا بۆ مسۆگەرکردنی سووککردنی سزاکان دەبێتەوە.
دوێنێ شەممە لە سووریا کابینەیەکی 23 وەزیری بەبێ سەرۆکوەزیران راگەیێندرا، ئەمەش زیاتر لە سێ مانگ دوای ئەوەی گرووپی ئیسلامیی دەستەی تەحریری شام، هێرشێکی کرد و بەشار ئەسەدی لە دەسەڵات خست.
پێکهێنانی حکومەت دوای راگەیێنراوی دەستووریی سووریا دێت، کە لە سەرەتای ئەم مانگەدا واژۆی لەسەرکرا. شارەزایان و گرووپەکانی مافی مرۆڤ هۆشدارییان داوە کە دەسەڵاتەکە لە دەستی شەرعدا چڕ کراوەتەوە و پاراستنی پێویست بۆ پێکهاتە جیاوازەکان لەخۆ ناگرێت.
هاوپەیمانان لە رۆڵی سەرەکیدا
هەندێک لە نزیکترین لایەنگرانی شەرع و کەسایەتییەکانی دیکە کە هاوپەیمانی ئەون، زۆرینەی کابینەکەی پێکدەهێنن.
زۆربەی وەزیرەکان موسڵمانی سوننەن، کە رەنگدانەوەی پێکهاتەی دیمۆگرافیای سووریایە.
فابریس بالانش، شارەزای کاروباری سووریا رایگەیاند، پۆستە سەرەکییەکان بە "هاوسەنگەرەکانی پێشوو دراوە، کە پێشتر بەشێک بوون لە حکومەتی رزگاری کە پارێزگاری ئیدلیب"ی لە باکووری رۆژئاوای سووریا بەڕێوەدەبرد.
بۆ نموونە، ئەمانە ئەسعەد شەیبانی دەگرێتەوە، کە پێشتر وەکو وەزیری دەرەوەی قۆناخی راگوزەر، چاوی بە ژمارەیەکی زۆر لە بەرپرسانی رۆژئاوایی و رۆژهەڵاتی نێوەڕاست کەوتووە و لە حکومەتی نوێشدا هەمان پۆستی هەیە.
مورهەف ئەبو قەسرە وەزیری بەرگری، کە وەکو فەرماندەی هەتەشە سەرکردایەتی ئەو هێرشەی کرد و بووە هۆی رووخانی ئەسەد، هەمان پۆستی پێدراوە. ئاڵنگاری سەرەکیی ئەو دروستکردنی سوپایەکی نوێی نیشتمانییە. ئەبو قەسرە بەکالۆریۆسی لە ئەندازیاریی کشتوکاڵدا هەیە.
ئەنەس خەتتاب، کە لەلایەن نەتەوە یەکگرتووەکانەوە سزادراوە، دوای ئەوەی وەکو سەرۆکی هەواڵگری لە قۆناخی راگوزەر دەستبەکاربوو، وەکو وەزیری ناوخۆ دەستنیشانکرا.
وەزارەتی داد بە مەزهەر وەیس درا، کە پێشتر لەگەڵ حکومەتی ئیدلیب بوو.
پێشتر شادی وەیس وەزیری کاتیی داد بوو، بەڵام دوای ئەوەی بەوە تۆمەتبار کرا کە بەهۆی لەشفرۆشییەوە، دەستی لە کوشتنی دوو ژن هەبوو، رەخنەیەکی زۆری لێگیرا.
رائید ساڵح، سەرۆکی کڵاوسپییەکان، کە تیمی فریاگوزاریی سووریایە؛ وەکو وەزیری باری لەناکاو و کارەساتەکان دەستبەکاربوو.
نوێنەرانی پێکهاتەکان
لەسەر ئاستی نێودەوڵەتی داوا دەکرا حکومەتی سووریا گشتگیر و هەمەلایەن بێت. حکومەتی نوێی سووریا چوار وەزیری لە چوار پێکهاتەی جیاواز هەیە؛ کریستیانێک، دورزییەک، کوردێک و عەلەوییەک.
ئارۆن لوند لە ناوەندی توێژینەوەی (سەدەی نێودەوڵەتی) رایگەیاند: "بەڕێز شەرع هەوڵدەدات بنکەی پشتیوانی خۆی لە ریزی گرووپە ئیسلامییەکان فراوانتر بکات، کە پێشتر پشتگیرییان لێدەکرد."
لوند گوتی: "بینینی فراکسیۆنێکی تووندئاژۆی ئیسلامی کە دێتە سەر دەسەڵات و پێکهاتەکان لەخۆدەگرێت، تەنانەت ئەگەر بە شێوەیەکی هێماییش بێت، رەنگە نموونەیی نەبێت، بەڵام هەر باشە، خۆ دەکرێت بەبێ ئەو لەخۆگرتنە شتەکان خراپتر بن."
محەممەد عەبدولڕەحمان تورکۆ، کوردە و وەزارەتی پەروەردەی پێدراوە. تورکۆ ساڵی 1979 لە عەفرینی رۆژئاوای کوردستان لەدایکبووە. لە زانکۆی دیمەشق، کۆلیژی یاسای لە ساڵانی 1997-2001 خوێندووە. لە زانکۆی لایپزیگی ئەڵمانیا لە 2004-2009 بڕوانامەی دکتۆرای لە یاسا بەدەستهێناوە.
یاروب بەدر، کە عەلەوییە و پێش جەنگ لە حکومەتەکەی ئەسەددا خزمەتی کردووە، وەکو وەزیری گواستنەوە دەستنیشانکرا.
هیند کابات، کەسایەتی دێرینی ئۆپۆزسیۆن و ئەندامی پێکهاتەی کریستیانی سووریایە و ماوەیەکی درێژ دژبەری ئەسەد بووە، وەکو وەزیری کاروباری کۆمەڵایەتی و کار دەستنیشانکرا، ئەو یەکەم ژنە وەزیرە لەلایەن شەرعەوە پۆستی پێبدرێت.
ئاڵنگارییەکان
رۆژی یەکشەممە بەڕێوەبەرایەتیی خۆسەر لە راگەیێندراوێکدا رایگەیاند: "ئەو حکومەتەی کە ئێوارەی شەممە 29ی ئادار لە دیمەشق راگەیێندرا، زۆر لە حکومەتەکانی پێشوو دەچێت لە رووی پشتگوێخستنی فرەڕەنگیی سووریا و بەردەوامبوون لە قۆرخکردنی دەسەڵات لەلایەن یەک لایەنەوە و نەبوونی نوێنەرایەتییەکی دادپەروەرانە و راستەقینە بۆ هەموو پێکهاتەکانی گەلی سووریا."
نزیکەی %15ی دانیشتووانی سووریا کوردن.
ئەندامە کوردە تاقانەکەی کابینەی نوێ پەیوەندیی بە خۆسەرەوە نییە، ئەمەش دوای ئەوەی بەڕێوەبەرایەتییەکە رێککەوتنێکی لەگەڵ دەسەڵاتی نوێی سووریا واژۆ کرد، بۆ ئەوەی تێکەڵ بە دامەزراوەکانی دەوڵەت بێت.
هەندێک لە شڕۆڤەکاران نیگەرانیی خۆیان لەوە دەربڕیوە کە رێککەوتنەکە لەبارچووبێت، چونکە بەڕێوەبەرایەتیی خۆسەر لەو کاتەوە رەخنەی لە راگەیاندنی دەستووریی سووریاش گرتووە.
لوند گوتی لەم چوارچێوەیەدا "هەر حکومەتێک هەوڵی سەقامگیریی بۆ وڵات بدایە، تووشی کێشە دەبوو."
بە گوتەی ئەو، "پرسیارە راستەقینەکە" پەیوەندیی بە ئاستی کاریگەریی ئەو وەزیرانەوە هەیە، کە لەسەر حکومەت دەیانبێت.
بالانش هۆشداری دا، بە نەبوونی سەرۆکوەزیران، مەترسیی ئەوە هەیە دەسەڵات بۆ تاکە کەسێک بێت.
بە گوتەی ئەو، ئەنجوومەنی ئاسایشی نیشتمانی کە لە 13ی ئاداردا بە سەرۆکایەتیی شەرع پێکهێنراوە "حکومەتی راستەقینەیە."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ