رێکخراوی نێودەوڵەتیی کۆچ: 90٪ـی سووریاییەکان لەژێر هێڵی هەژارییەوە دەژین

 

 

رۆژی هەینی، 20-12-2024، ئەیمی پۆوپ، بەڕێوەبەری گشتیی رێکخراوی نێودەوڵەتیی کۆچ (IOM) راگەیێندراوێکی لە ژێر ناوی (بەهاناوەچوونی سووریا لە کاتێکی گرنگدا) بڵاوکردەوە. 

 

ئەیمی رایگەیاند: "نزیکەی 14 ساڵی شەڕ و تەنگژە سووریای پڕووکاند. زیاتر لە 16 ملیۆن سووریایی پێویستییان بە هاوکاریی مرۆیی هەیە و زیاتر لە شەش ملیۆن کەسیش وڵاتەکەیان جێهێشتووە، 7.2 ملیۆنیش ئاوارەن."

 

بەڕێوەبەری گشتیی رێکخراوەکە رایگەیاند: "لە چەند هەفتەی رابردوودا 800 هەزار ئاوارەی نوێ تۆمارکراون. 90٪ـی سووریاییەکانیش لە ژێر هێڵی هەژارییەوە دەژین."

 

ئەیمی رایگەیاند: "پزیشکێکی نیشتەجێی خولاو لە دیمەشق مووچەی مانگانەکەی 50 دۆلارە. پزیشک لەوێ پێویستە کارێکی دیکە بکات بۆ ئەوەی بژێوی ژیانی دابینبکات."

 

ئەیمی دوای گەڕانەوەی لە دیمەشق ئەو راگەیێندراوەی نووسیوە و رایگەیاند: "وەک یەکەم بەرپرسی نەتەوە یەکگرتووەکان چوومە خاکی سووریا. لەگەڵ حکومەتی کاربەڕێکەر، کۆمەڵگەی مەدەنی، رێکخراوە مرۆییەکان، شاندە دیپلۆماسی و بەخشەرەکاندا کۆبوونەوەمان کرد."

 

خانمە بەڕێوەبەرەکەی IOM گوتی، لە هەندێک ناوچەی ئەو وڵاتە، چەندین ژێرخانی گرنگی وەک نەخۆشخانە و قوتابخانە وێرانکراون یانیش لەکارخراون. "بۆ نموونە حەلەب، لە نێوان 2012 بۆ 2016 زیانی زۆری پێگەیێنرا و دوو ملیۆن کەس شارەکەیان جێهێشت."

 

ئەیمی گوتی، خواستێکی زۆر لەلایەن ئاوارەکانەوە هەیە بۆ ئەوەی بگەڕێنەوە وڵاتی خۆیان بەڵام "لەگەڵ ژمارەیەک هاووڵاتیی سووریا لە لوبنان قسەمک رد و گوتیان هێشتا لە داهاتوو دڵنیا نین".

 

پۆوپ ئەوەشی گوت: "لەماوەی 13 ساڵدا نەتەوە یەکگرتووەکان ئاڵنگاری زۆری هەبوو لە پڕکردنەوەی پێویستییە مرۆییەکان، ئەوەش بەهۆی ئەو کۆسپانەی رژێمی ئەسەد بۆ رێکخراوەکان دایدەنا."