سووریا
وێنەی کاتی رادەستکردنی کۆمەڵگە نیشتەجێبوونەکە. وێنەکە لە تویتەری مانگی سووری قەتەری وەرگیراوە
رووداو - هەولێر
قەتەر و تورکیا بەردەوامن لە دروستکردنی یەکەی نیشتەجێبوون بۆ ئاوارەکانی سووریا. رۆژی سێشەممە، 17-1-2023، مانگی سووری قەتەری و فەرمانگەی کارەسات و فریاگوزارییەکانی تورکیا - ئافاد، کۆمەڵگەیەکی نیشتەجێبوونیان لە شاری جەرابلوسی باکووری سووریا بۆ ئاوارەکان کردەوە.
کۆمەڵگەکە بە ناوی "گوندی تەراحوم"ـە و 36 یەکەی نیشتەجێبوون لە هەشت باڵەخانەدا لە خۆدەگرێت؛ تۆڕی ئاو، ئاوەڕۆ، کارەبا و رێگەی بۆ دابینکراوە.
بە گوێرەی مانگی سووری قەتەری، کۆمەڵگەکە دۆخی گونجاوی ژیان بۆ ئەو خێزانانە فەراهەم دەکات کە زۆرترین زیانیان بەرکەوتووە، لەوانەش ئەو ژنانەی هاوژینەکانیان مردوون، ئەو منداڵانەی کە سەرپەرشتن و ئەوانەشی لە کامپەکاندان.
نوێنەرانی رێکخراوی مانگی سووری قەتەری و بەرپرسانی فەرمانگەی ئافادی تورکیا و ئەنجوومەنی نێوخۆیی جەرابلوس لە رێوڕەسمی کردنەوەکەدا ئامادەبوون.
کردنەوەی ئەم کۆمەڵگەیە بەشێکە لە زنجیرەیەک پڕۆژەی دیکەی هاوبەشی تورکیا و قەتەر بۆ ئاوارە عەرەبەکانی سووریا کە بەشێکیان رەخنە و ناڕەزایی کوردانی رۆژئاوای کوردستان و رێکخراوە مرۆییەکانی بە دوای خۆیدا هێناوە، بەهۆی دروستکردنیان لەسەر زەویی کوردانی ئاوارە بەهۆی هێرشی تورکیا و گرووپە چەکدارە نزیکەکانی، لەوانەش لە عەفرین.
تەممووزی رابردوو، مانگی سووری قەتەری و ئافادی تورکی رێککەوتنێکیان واژۆکرد بۆ دروستکردنی یەکەی نیشتەجێبوونی لە شارۆچکەی بابی باکووری سووریا.
پڕۆژەکە بە گوژمەی 3.5 ملیۆن دۆلار دەبێت بۆ دروستکردنی هەزار خانوو.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ