باس لە دۆزینەوەی رۆژنامەڤانێکی ئەمریکی دەکرێت لە سووریا

 

ئۆستن تایس، رۆژنامەڤانێکی ئەمریکییە، 12 ساڵ پێش ئێستا بۆ کاری رۆژنامەڤانی چووەتە سووریا و دیارنەماوە. دوای رووخانی رژێمی ئەسەد، چەند کەسێک ڤیدیۆیەکیان بڵاوکردووەتەوە و دەڵێن، رۆژنامەڤانێکی ئەمریکییان دۆزیوەتەوە.

 

هێشتا نازانرێت ئەو رۆژنامەڤانە هەمان ئەو کەسەیە کە لە سووریا ونبووە یاخود نا، ئەو کەسانەیشی ڤیدیۆکەیان بڵاوکردووەتەوە و دەڵێن، نازانن ناوی چییە.

 

بەگوێرەی ڤیدیۆکە، چەند کەسێک رۆژنامەڤانەکەیان بردووەتە نەخۆشخانە و چارەسەری پزیشکییان بۆ کردووە و "ئێستا تەندروستیی زۆر باشە".

 

کەسێک لە ڤیدیۆکەدا قسە دەکات و دەڵێت، ئەم رۆژنامەڤانە لەلایەن رژێمی ئەسەد و لە یەکێک لە زیندانەکان بووە، ئێستاش چاوەڕوانی لایەنە پەیوەندیدارەکان دەکەن رادەستی کەسوکارەکەی بکەنەوە. 

 

لە ڤیدیۆکەدا کەسێک کە گوایە رۆژنامەڤانەکەیە، پاڵکەوتووە و هیچ قسەیەک ناکات.