رووداو دیجیتاڵ
بەڕێوەبەری رێگەپێدراوی کۆمپانیای فلای ئەربیل رایگەیاند، بۆ دەستپێکردنەوەی گەشتەکانیان بۆ دیمەشق، داواکارییان پێشکێشی دەسەڵاتدارانی فڕۆکەوانیی سووریا کردووە و چاوەڕێی وەڵامی ئەوانن.
لاوەند مەموندی، بەڕێوەبەری رێگەپێدراوی کۆمپانیای فلای ئەربیل، ئەمڕۆ (پێنجشەممە، 09-01-2025) بە رووداوی راگەیاند، ژمارەیەکی زۆر خەڵک بەتایبەتی ئەو سووریاییانەی لە هەرێمی کوردستان و عێراقن، چاوەڕێی دەستپێکردنەوەی گەشتەکانی نێوان هەولێر و دیمەشقن، بەڵام تائێستا گەشتەکان دەستیان پێنەکردووەتەوە.
لاوەند مەموندی گوتی "لەدوای رووخانی رژێمی ئەسەد لە سووریا، دەسەڵاتدارانی نوێی سووریا پێدانی ڤیزەیان بە عێراقییەکان راگرتووە."
لە 8-12-2024 واتە لەو رۆژەوەی چەکدارانی دەستەی تەحریری شام (هەتەشە) گەیشتنە دیمەشق و کۆتاییان بە رژێمی بەشار ئەسەد هێنا، گەشتە ئاسمانییەکانی نێوان هەولێر و دیمەشق راگیراون.
لە هەرێمی کوردستان، دوو کۆمپانیای فڕۆکەوانی پێشتر گەشتیان بۆ دیمەشق هەبوو، ئەوانیش فلای ئەربیل و ئەجنیحەی شام. لاوەند مەموندی گوتی "پێش رووخانی رژێمی بەشار ئەسەد، ئێمە هەفتانە 3 بۆ 4 گەشت و ئەجنیحەی شامیش 5 گەشتی بۆ دیمەشق هەبوو."
بە گوتەی لاوەند مەموندی، پێشتر هەفتانە 1000 بۆ 1500 کەس لە هەرێمی کوردستانەوە بە فڕۆکە گەشتیان بۆ دیمەشق دەکرد، کە 85٪ـیان سووریایی بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ