ئەنجوومەنی سەربازیی دێرەزوور: 11 چەکداری داعش دەستگیرکران

 

ئەنجوومەنی سەربازیی دێرەزوور، لە ژێر دەسەڵاتی هێزەکانی سووریای دیموکرات (هەسەدە) دایە، ئەمڕۆ یەکشەممە 08-12-2024 لە راگەیێندراوێکدا رایگەیاند: "دوای ئاڵۆزبوونی دۆخی تەواوی سووریا، بۆ رێگری لە جووڵەی چەکدارانی داعش و پاراستنی ناوچەکە، هێزەکانمان لە نێوەندی شاری دێرەزوور و دەوروبەری جێگیر کرد".

 

ئەنجوومەنەکە لەگەڵ بڵاوکردنەوەی وێنەی 11 چەکدارەکە رایگەیاندووە: "لە دێرەزوور ئۆپەراسیۆنێکی سەربازیی دژی شانەکانی داعش کرا و 11 چەکداریان دەستگیرکران".

 

بەگوێرەی ئەنجوومەنی سەربازیی دێرەزوور، لەگەڵ دەستگیرکردنی ئەو چەکدارانەدا دەستیشیان بەسەر ژمارەیەک چەک و تەقەمەنیدا گرتووە.

 

هێزەکە پێشتر راگەیێندراویکی بڵاوکردبوویەوە کە تێیدا جەختی لە مانەوەی هێزەکانی لە سنووری دێرەزوور و پاراستنی ناوچەکە کردبوویەوە.

 

ئەمە لەکاتێکدایە ئەمڕۆ دوای 24 ساڵ، هێزە ئۆپۆزیسیۆنەکانی سووریا، رووخاندنی دەسەڵاتی بەشار ئەسەدیان راگەیاند.