موقتەدا سەدر بۆ سووریاییەکان: بە دیالۆگی نیشتمانی حکومەتی دیموکراسی پێکبهێنن

 

ئێوارەی ئەمڕۆ یەکشەممە، 8ـی کانوونی یەکەمی 2024، موقتەدا سەدر، سەرۆکی رەوتی سەدر لە هەژماری تایبەتیی خۆی لە تۆڕی ئێکس پەیامێکی لەبارەی پێشهاتەکانی سووریا بڵاوکردەوە و رایگەیاند، "دوای زیاتر لە 50 ساڵ لە حوکمڕانیکردن، گەلی سووریای خۆشەویست دەسەڵاتیان رووخاند. چاودێریی دۆخەکە دەکەین."

 

موقتەدا سەدر نوسیوویەتی: "چاومان لە دیالۆگی نیشتمانیی گشتگیرە بۆ پێکهێنانی حکومەتێکی دیموکراسیی کە کۆکەرەوەی سەرجەم پێکهاتەکانی گەل بێت. حکومەتێک دووربێت لە توندوتیژی و دەسەڵاتی سەربازیی و فەرامۆشکردن و پشتگوێخستن." 

 

سەرۆکی رەوتی سەدر باسی لەوە کردووە: "کاتی هاتووە ئارامی و سەقامگیری باڵ بکێشێتە سەر سووریای دراوسێمان، دوور لە تیرۆری داعش و دیکتاتۆریەتی قێزەون و دەستوەردانی دەرەکیی ئەمریکی، ئیسرائیلی یان هەر وڵاتێکی دیکە." 

 

دەشڵێت: "ئێمەی گەلی عێراق چاومان لە بونیاتنانی پەیوەندییەکی هاوسەنگە لەنێوان هەردوو گەلی دۆست لەژێر ناونیشانی ئیسلام و عەرەبچییەتی و مرۆڤایەتی، چونکە چارەنووسمان یەکە و رێگە نادەین دوژمن بەناوی تایفەگەری و ناکۆکی سیاسیی و نەتەوەیی کێشەمان بۆ دروست بکات."