هاونیشتمانییەک لە شێخ مەقسوود: هێزە کوردییەکان لە جێگەی خۆیاندان و دۆخی ژیان ئاسایی بووەتەوە

 

هاونیشتمانییەک لە حەلەب، ئەمڕۆ هەینی 06-12-2024، بە تۆڕی میدیایی رووداوی گوت، "لە گەڕەکەکانی شێخ مەقسوود و ئەشرەفییە نزیکەی 300 هەزار کورد دەژین و ئێستا دۆخەکە ئارامە و هیچ کێشەیەکیان نییە".

 

بە گوتەی ئەو هاونیشتمانییە، نزیکەی 80%ـی کوردانی ئەو گەڕەکانەی حەلەب لە بنەڕەتدا خەڵکی عەفرینن و باپیرانیان لەکاتی پارچەکردنی کوردستاندا روویان لەو گەڕەکانە کردووە و جێگیر بوون.

 

ئەو هاونیشتمانییە کە لە گەڕەکی شێخ مەقسوودەوە قسەی بۆ رووداو کرد ئاماژەی بەوە کرد، هیچ کێشەیەک لە نێوان دەستەی تەحریر شام (هەتەشە) و شەڕڤانانی کورد دا نییە و خەڵکی هەردوو گەڕەکە کوردنشینەکەش گەڕاونەتەوە سەر کاروباری رۆژانەی خۆیان.

 

بە گوتەی ئەو هاونیشتمانییە، لە گەڕەکەکانی ئەشرەفییە و شێخ مەقسوود شەڕڤانانی یەکینەکانی پاراستنی گەل (پەپەگە) و یەکینەکانی پاراستنی ژن (یەپەژە) هەن و هیچ بەرکەوتنێکی سەربازییان لەگەڵ چەکدارانی دەستەی تەحریر شام نەبووە.

 

ئەو هاونیشتمانییە گوتیشی، "لە حەلەب چەکدارانی تەحریر شام چوونەتە ئەو شوێنانەی پێشتر حکومەتی سووریای لێ بووە و کەسیان نەهاتوونەتە گەڕەکە کوردییەکان".

 

هەروەها باسی لە شەهبا کرد و گوتی، ئەو هاونیشتمانییانەی عەفرین کە لە شەهبا ئاوارەبوون، رووبەڕووی ئاستەنگی بوونەتەوە لە دەربازبوونیان لە کەمپ و ماڵەکانیان. گوتیشی: "دوو رۆژە 15 هەزار هاونیشتمانی لەلایەن گرووپە چەکدارەکانی سوپای ئازادەوە لە شەهبا دەستبەسەر کراون و تاوەکو ئێستا چارەنووسیان نادیارە".