رووداو دیجیتاڵ
ئەندامێکى پەرلەمانى سووریا رایگەیاند، هێرشەکەى سەر کۆلێژی سەربازی شاری حمسی وڵاتەکەى لە رێگەى چەند درۆنێکەوە کراوە، کە گومان دەکرێت دروستکراوى فەرەنسا بن. دەشڵێت: "رێکخستنە تیرۆیستە چەکدارەکان ئەو هێرشەیان کردووە کە لەلایەن هەندێک لە وڵاتانەوە پاڵپشتی دەکرێن."
رۆژی هەینی، 06-10-2023، عەبدولحەمید نەقرى، ئەندامى پەرلەمانى سووریا بە تۆڕى میدیایی رووداوى راگەیاند، "هێرشەکەى سەر کۆلێژى سەربازیی حمس لە رێگەى چەند درۆنێکەوە بووە، بۆمبیان هەڵداوەتە خوارەوە بەسەر ئەو شوێنەى ئاهەنگى دەرچوونى ئەفسەرانى تێداکراوە، [هێزەکانی سووریا] فڕۆکەیەکیان خستووەتە خوارەوە لە دواى ئەوەى بۆمبەکەى فڕێداوە."
سەبارەت بە سەرچاوەی درۆنەکان، عەبدولحەمید نەقرى گوتى: "تاوەکو ئێستا شتێکى فەرمى نییە، بەڵام بەگوێرەى بەڵگە سەرەتاییەکان گومان دەکرێت درۆنەکان دروستکراوى فەرەنسا بن و بەشێک لە پارچەى ئەو فرۆکانە دەستیان بەسەردا گیراوە."
پاشنیوەڕۆی پێنجشەممە، 5-10-2023، لە دوای تەواوبوونی ئاهەنگی دەرچوونی ئەفسەران، هێرشکرایە سەر کۆلێژی سەربازیی شاری حمسی سووریا، بەپێی فەرماندەیی گشتیی سوپا و هێزە چەکدارەکانی سووریا هێرشەکە لە رێگەی درۆنەوە کراوە.
سەر لەبەیانی ئەمڕۆ، وەزارەتی تەندروستیی سووریا دوایین ئاماری لەبارەی هێرشە درۆنییەکەی سەر کۆلێژی سەربازیی شاری حمس بڵاوکردەوە و رایگەیاند، 89 کەس گیانیان لەدەستداوە، لەنێویاندا 31 ژن و پێنج منداڵ هەن، هەروەها 277 کەسیش بریندار بوون.
ئەندامەکەى پەرلەمانى سووریا گوتى، "تیرۆیستیە چەکدارەکان ئەو هێرشەیان کردووە، کە لەلایەن هەندێک لە وڵاتانەوە پاڵپشتی دەکرێن، بەڵام بەدیاریکراوى ئەو لایەنە ئاشکرا نەبووە و دواتر ئەو لایەنە ئاشکرا دەکرێت، کە لە پشت هێرشەکەوە بوون."
عەبدولحەمید نەقرى ئاماژەى بەوەشدا، هێرشەکە لەدواى رۆیشتنى بەرپرسە فەرمییەکان کراوە، ئەوانەی ماونەتەوە ئەفسەران و کەسوکاریان بوون، گوتیشى: "خێزان هەیە بە تەواوى لە بۆردوومانەکەدا کوژراون."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ