رووداو دیجیتاڵ
میدیای فەرمیی سووریا رایگەیاند، بەرەبەیانی ئەمڕۆ دووشەممە، ئیسرائیل ژمارەیەک هێرشی ئاسمانیی کردە سەر شاری حەلەب و ژمارەیەک کەس کوژران.
ئاژانسی هەواڵی فەرمیی سووریا هیچ ئامارێکی نەخستەڕوو، بەڵام گوتی: "دوژمنکارییەکە بووە هۆی شەهیدبوونی ژمارەیەک کەس و هەندێ زیانی مادیشی لێکەوتەوە."
چالاکڤانە خۆجێییەکانیش دەڵێن، لە هێرشەکەدا 12 سەربازی حکومەتی سووریا کوژراون.
هێرشەکان باشووری رۆژهەڵاتی حەلەبیان کردووەتەوە ئامانج. تاوەکو ئێستا ئیسرائیل بەرپرسیارێتیی خۆی لە هێرشەکان رانەگەیاندووە.
لە دوای دامەزراندنی ئیسرائیلەوە لە ساڵی 1948، سووریا و ئیسرائیل کەوتوونەتە جەنگەوە.
لە جەنگی نێوخۆی سووریادا، ئێرانی نەیاری ئیسرائیل، هاوپەیمانی بەشار ئەسەدی سەرۆکی سووریا بووە. هێرشە ئاسمانییەکانی ئیسرائیل پێشتر پێگە و بارەگاکانی چەکدارانی ئێرانیشی کردوونەتە ئامانج.
هێرشە ئاسمانییەکان لە کاتێکدان کە ئیسرائیل بەردەوامە لە هێرشەکانی بۆ سەر کەرتی غەززە کە بوونەتە هۆی کوژرانی زیاتر لە 36 هەزار کەس کە بەشی هەرە زۆریان ژن و منداڵن.
ئیسرائیل لە لایێکی دیکەشەوە رۆژانە لەگەڵ حیزبوڵڵای لوبنان یەکدی تۆپباران و مووشەکباران دەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ