رووداو دیجیتاڵ
عێراق لە ساڵی 2023ـدا ریزبەندی پێنجەمی لەنێو 10 گەورەترین وڵاتانی رۆژهەڵاتی ناوەڕاست لە یەدەگی گازی سرووشتی هەبووە کە زیاتر لە 131 تریلیۆن پێ سێجا یەدەگی هەیە، بەڵام شرۆڤەکارێکی وزە دەڵێت، دۆزینەوەکانی گاز بۆ عێراق نوێیە و ئەگەر رووپێوی بکرێت ژمارەکە زیاترە.
بەپێی دوایین لیستی 10 وڵاتی رۆژهەڵاتی نێوەڕاست ئەوانەی خاوەنی زۆرترین یەدەگی گازی سرووشتین، سێ وڵات توانیویانە یەدەگیان زیادبکەن، کە ئەوانیش سعودیە، ئیمارات و عومانن.
بەپێی راپۆرتی یەکەی توێژینەوەی وێبسایتی وزە، وڵاتانی قەتەر و سعودیە و ئیمارات لەساڵی 2023 زۆرترین رکابەرایەتییەیان هەبووە و ساڵی 2023 یەدەگی گازی سرووشتیان بۆ 7506 تریلیۆن پێ سێجا زیادیکردووە بە بەراورد بە ساڵی 2022 کە 7457 تریلیۆن پێ سێ جا بووە.
ئەو 10 وڵاتانەی رۆژهەڵاتی نێوەڕاست کە زۆرترین یەدەگی گازی سرووشتیان هەبووە:
1- قەتەر: 842.62 تریلیۆن پێ سێجا
2- سعودیە: 300.41 تریلیۆن پێ سێجا
3- ئیمارات: 289.92 تریلیۆن پێ سێجا
4- جەزائیر: 159.05 تریلیۆن پێ سێجا
5- عێراق: 131.15 تریلیۆن پێ سێجا
6- کوێت: 63 تریلیۆن پێ سێجا
7- میسر: 63 تریلیۆن پێ سێجا
8- لیبیا: 53.14 تریلیۆن پێ سێجا
9- عومان: 24 تریلیۆن پێ سێجا
10- یەمەن: 16.9 تریلیۆن پێ سێجا
رۆژی یەکشەممە، 31-12-2023، د. گۆڤەند شێروانی، لەبارەی یەدەگی گازی سرووشتیی عێراق، بە تۆڕی میدیایی رووداوی گوت، "ئەگەر رووپێوی ورد و زیاتر بۆ یەدەگی نەوتی عێراق بکرێت، یەدەگەکە زیاتر دەبێت، بەهۆی دوو هۆکار، چونکە دەمێکە رووپێویی ورد بۆ گازی سرووشتی کە بۆ عێراق نوێیە نەکراوە، دووەم ئەگەر عێراق دەستبەرداری سووتاندنی گازی سرووشتی ببێت، کە ئێستا لەچوارچێوەی گازی هاوەڵ 60٪ـی ئەو گازەی بەرهەمی دەهێنێت دەسووتێت، ئەوا بڕی گازی سرووشتیی زیاتر دەبێت."
د. گۆڤەند شێروانی، دەشڵێت، "بەپێی ژمارەکانی حکومەتی عێراق، ساڵانە ئەم وڵاتە بەبڕی 18 ملیار دۆلار گازی سرووشتی دەسووتێنێت و پلانیشی هەیە لەماوەی سێ ساڵی داهاتوو کۆتایی بەوەبهێنێت."
بەپێی داتاکانی بی پی BP ،لە 2021ـدا عێراق 9.4 ملیار مەتر سێجا گازی بەرهەمهێناوە، هەروەها 17.1 ملیار مەتر سێجا گازی بەکارهێناوە، رۆژی 4ـی ئایار 2023، محەممەد شیاع سوودانی رایگەیاند، "ئێمە رۆژانە پارە دەسووتێنین، رۆژانە 1.2 ملیار پێی سێجا گاز دەسووتێنین، کەچی گاز هاوردە دەکەین و رۆژانە نزیکەی یەک ملیار پێ سێجا گاز لە ئێرانەوە هاوردە دەکەین کە تێچووەکەی ساڵانە لە 4 ملیار دۆلار کەمتر نییە."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ