بەرهەم ساڵح خانەنشین بوو

 

 

 

31ى تشرینى یەکەمى 2022، رۆژنامەى وەقائیعی عێراقى دەقى مەرسومێکى کۆماریی لەتیف رەشید، سەرۆککۆمارى عێراقى بڵاوکردەوە و تێیدا ئاماژە بەوە دراوە، لە 13ى تشرینى یەکەمى 2022 بەرهەم ساڵح، سەرۆککۆمارى پێشوو خانەنشین کراوە.

 

لە نووسراوەکەدا هاتووە، ئەو مەرسومە لە رۆژى دەرچوونی و بڵاوکردنەوەى لە رۆژنامەى وەقائیعی عێراقى جێبەجێ دەکرێت؛ مەرسومەکە 18ی تشرینى یەکەمى 2022 دەرکراوە و لە 31ى تشرینى یەکەم بڵاوکراوەتەوە.

 

ئەو مەرسومە کۆمارییە پشتبەستووە بە هەردوو ماددەکانی 73 و 76ى دەستوورى عێراق کە تایبەتە بە وادەى کارکردنى سەرۆککۆمار، کۆتاییهاتنى دەسەڵاتى و دەرکردنى مەرسومى کۆمارى.

 

13ى تشرینى یەکەمى 2022، لەتیف رەشید لەدواى دوو گەڕى هەڵبژاردن لەنێو پەرلەمانى عێراق بە سەرۆککۆمار هەڵبژێردرا لە بەرامبەر بەرهەم ساڵح، بەربژێرى یەکێتیى نیشتمانیى کودستان بۆ هەمان پۆست.