لە بەغدا فەرمانبەرێکی باج لە کاتی وەرگرتنی بەرتیل دەستگیردەکرێت

 

 

دەستەی دەستپاکیی عێراق، لە راگەیێندراوێکدا ئاشکرایکرد: "بەرپرسی رێکخستنی تۆمارە سەرەکییەکانی دەستەی گشتیی باجەکان لە لقی کەرخی بەغدا لەکاتی وەرگرتنی بەرتیل دەستگیرکرا."

 

بەپێی دەستەکە، دەستگیرکردنی فەرمانبەرەکە لەسەر سکاڵای هاووڵاتییەک بووە، کە گوتوویەتی لەلایەن هەندێک لە فەرمانبەرانی ئەو دامەزراوەیەوە بۆ پێدانی بەرتیل هەراسان دەکرێن.

 

دوای ئەوە بۆسەیەک بۆ یەکێک لەو فەرمانبەرانە دادەنرێت و بەپێی گرتە ڤیدیۆییەکەی بڵاوکراوەتەوە ئەو فەرمانبەرە لەلایەن کەسێکەوە پارەی بۆ دەخرێتە نێو فایلی مامەڵەکەیەوە، ئەویش دوای کردنەوەی دۆسیەکە پارەکە هەڵدەگرێت و دەیخاتە جانتاکەیەوە. 

 

13ـی ئەم مانگە دەستەی دەستپاکیی عێراق ئەنجامی راپرسییەکی خۆی بڵاوکردەوە کە لەبارەی بەرتیل وەرگرتن لە بەڕێوەبەرایەتییەکانی تۆمارکردنی خانووبەرە لە عێراق بڵاوکردەوە.

 

بەپێی راپرسییەکە 63٪ـی ئەو کەسانەی چوونەتە بەڕێوەبەرایەتییەکانی خانووبەرە و دەستەکە بۆچوونیان وەرگیراوە، دەڵێن خاویی راییکردنی مامەڵەکان هۆکاری سەرەکیی پەنابردنیانە بۆ بەرتیلدان. 42٪یش راستەخۆ بەرتیلیان داوەتە ئەوانەی کارەکانیان بۆ کردوون.

 

لە بەغدا بەرتیلدان 27.7٪ بووە، بەڕێوەبەرایەتی دووەمی کەرخ، بە 40.4٪ زۆرترین بەرتیلی لێدراوە، خانووبەرەی ئەعزەمییە بە 31.8٪ دووەم و کازمیە بە 31.7٪ سێیەم بووە، بەڕێوەبەرایەتییەکانی شەعب، دووەمی کازمییە، یەکەمی رەسافە ئەم رێژانەیان بە دوای یەکەوە هەبووە: 18.4٪، 19.2٪ و 23٪.