عێراق
کۆبوونەوەی د. بەرهەم ساڵح، سەرۆککۆماری عێراق و قاسم ئەعرەجی، راوێژکاری ئاسایشی نیشتمانیی عێراق
رووداو دیجیتاڵ
سەرۆککۆماری عێراق رایگەیاند، "بۆردوومانەکانی ئێران و تورکیا بۆ سەر ناوچەکانی هەرێمی کوردستان پێشهاتی مەترسیدارن، قبووڵ ناکرێن و سەروەریی عێراق پێشێل دەکەن، بۆیە دەبێ بووەستێندرێن."
لە راگەیێندراوێکدا کە نووسینگەی راگەیاندنی سەرۆکایەتیی کۆماری عێراق رۆژی هەینی 30-09-2022 بڵاویکردەوە، هاتووە، د. بەرهەم ساڵح، سەرۆککۆماری عێراق پێشوازی لە قاسم ئەعرەجی، راوێژکاری ئاسایشی نیشتمانیی عێراق کرد.
هەر لە راگەیێندراوەکەدا هاتووە: "لە دیدارەکەدا هەردوولا بۆردوومانەکانی ئێرانیان بۆ سەر چەند ناوچەیەکی هەرێمی کوردستان تاوتوێ کرد کە ژمارەیەک شەهید و برینداریان لێکەوتەوە."
لەو چوارچێوەدا د. بەرهەم ساڵح رایگەیاند: "بۆردوومانەکانی ئێران پێشهاتی مەترسیدارن و قبووڵ ناکرێن؛ هەروەها زێدەڕۆیین بۆ سەر سەروەریی و ئاسایش و سەقامگیری وڵاتێک و سەلامەتی هاووڵاتییانی."
رۆژی چوارشەممە 28-09-2022، ئێران لە رێگەی دەیان مووشەکی بالیستی و فڕۆکەی بێفڕۆکەوانی خۆکووژەوە هێرشی کردە سەر بارەگاکانی هێزەکانی رۆژهەڵاتی کوردستان لە شارەکانی کۆیە، پردێ و زڕگوێز، بە هۆیانەوە 17 کەس گیانیان لەدەستدا و نزیکەی 50 کەسی دیکەش برینداربوون.
هێرشەکانی ئێران کاردانەوەی کۆمەڵگەی نێوەدەوڵەتی و چەندین ناوەندی جیهانی و وڵاتانیان بەدوای خۆیاندا هێنا، هەروەها نیگەرانیی تووندی نێوخۆییان لێکەوتەوە.
د. بەرهەم ساڵح گوتیشی: "بۆردوومانە بەردەوامەکانی تورکیا بۆ سەر ناوچەکانی هەرێمی کوردستان قبووڵ ناکرێن و سەروەریی عێراق پێشێل دەکەن؛ بۆیە دەبێ بووەستێندرێن و رێگە لە لێکەوتەکانیشیان بگیرێت."
هەر لە راگەیێندراوەکەی سەرۆکایەتیی کۆماردا هاتووە: "هەردوولا لە دیدارەکەدا جەختیان لەسەر بەدواداچوونی ئەم دۆسیەیە کردەوە لەگەڵ بەرزترین ئاستەکانی وڵاتانی دراوسێ، چونکە ئەمە پێشهاتێکی مەترسیدارە. یەکلاکردنەوەی کێشە و پرسە ئەمنییەکان بە گفتوگۆ و بەدواداچوونی هاوبەش و رێگە دیپلۆماسییەکان دەکرێت."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ