ئۆپەراسیۆنە هاوبەشەکانى عێراق: 14 ئەندامی داعش لە ئەنبار کوژران

 

 

فەرماندەیی ئۆپەراسیۆنە هاوبەشەکانى عێراق ئەمڕۆ هەینی راگەیێندراوێکی بڵاوکردەوە و تێیدا دەڵێت، بۆردوومانەکە لە ناوچەى حزێمى پارێزگاکە کراوە و 4 حەشارگەى داعش کراونەتە ئامانج. 

 

لە راگەیێندراوەکەدا هاتووە، 14 ئەندامی داعش لە بۆردوومانەکەدا کوژراون کە پێشتێنەى بۆمبڕێژکراویان بەستبوو و نارنجۆکیان پێبوو؛ ئاماژە بەوەش دەکات، لەنێو کوژراوەکاندا چەند بەرپرسێکی رێکخراوە پەڕگیرەکە هەن.

 

فەرماندەیی ئۆپەراسیۆنە هاوبەشەکانى عێراق ئاماژە بەوە دەکات، ئەو بۆردوومانە بەرەبەیانى دوێنێ کراوە و لە شوێنى بۆردوومانەکەیشدا دەست بەسەر چەک و بەڵگەنامەی چەکدارەکاندا گیراوە.

 

رێکخراوی نەتەوە یەکگرتووەکان دەڵێت، نزیکەی 3 بۆ 5 هەزار چەکداری داعش لە عێراق و سووریا هەن و بەشی زۆریان لە بیابانەکانی نێوەڕاستی سووریان.