عەممار حەکیم: دەبێت هەڵبژاردن لە کات و ساتی خۆیدا بەڕێوەبچێت

 

عەممار حەکیم ئاماژەی بەوە کرد، ئەو هیچ هۆکارێک بۆ دواخستن و پێشخستنی هەڵبژاردن نابینێت: "پێموایە بنەماکە ئەوەیە کە هەڵبژاردنەکە لە کات و وادەی ئاسایی خۆیدا بەڕێوەبچێ، سرووشتییەکە ئەوەیە، ئەگەر بمانەوێ بیکەینە پێشوەخت دەبێ هۆکار و بەڵگەمان هەبن. کەس ناڵێ بۆچی هەڵبژاردن لە وادەی خۆی دەکەن".

 

سەرۆکی رەوتی حیکمەی نیشتیمانی پێیوایە کە پێشخستنی هەڵبژاردن لە وادەی دیاریکراوی خۆیدا کێشە بۆ کاری حکومەت دروست دەکات: "ئێستا هەر ئەمڕۆ بڵێین هەڵبژاردن دەکەین، ئەگەر بکەوێتە ساڵێکی دیکەش، لە ئێستاوە دەکەوینە ناو جەمسەرگیری. لەناکاو خۆمان لەناو هەڵمەتێکی هەڵبژاردندا دەبینینەوە کە دۆخی گشتی دەشڵەقێنێ و ئەم سەقامگیری و کەڵەكەبوونە پۆزەتیڤە و ئەم پێشڤەچوونەی ئێستامان لەدەست دەچێ، لەبەر هەموو ئەم هۆیانە ئێمە لەگەڵ هەڵبژاردنی پێشوەخت نین."

 

عەممار حەکیم رەتیکردەوە کە لەگەڵ محەممەد شیاع سوودانی، سەرۆکوەزیرانی ئێستای عێراق و هیچ لایەنێکی دیکە بچێتە نێو هاوپەیمانی و گوتی: "تا ئێستا جارێ وادەکەی دیار نییە و هیچ رێکارێک لەو رووەوە نابینین، بۆیە بیرۆکەی هاوپەیمانێتیش جارێ تا ئەم ساتە نە لەگەڵ هێزەکانی نێو چوارچێوە و نە لەگەڵ بەڕێز سوودانی نەکەوتووەتە بەرباس."

 

 

رێبەری رەوتی حیکمە پشتیوانیی رەوتەکەی بۆ حکومەتی ئێستا عێراق دەربڕی: "پێمانوایە لەسەر رێچکەیەکی دروست دەڕوات، خزمەتگوزاری پێشکەش دەکات و دەستکەوتی هەیە و سەرکەوتوو بووە لە بەدیهێنانی جۆرێک لە سەقامگیری و هەروەها پێکەوەژیانی نێوان پێکهاتەکانی پایەدارتر کردووە و لەو رووەوە هاوکاریی کردووە، ئەمانە کۆمەڵێ شتن کە ئێمەش باوەڕمان پێیانە و بەردەوام جەختیان لەسەر دەکەینەوە، بۆیە کاتێک بەڕێز سوودانی ئەمە تەبەنی دەکات و کاری لەسەر دەکات، ئێمە بەهێزەوە پشتیوانی دەبین."

 

هەڵبژاردنی داهاتووی پەرلەمانی عێراق، ئەگەر هیچ رێگرییەکی بۆ دروست نەکرێت، لە ئۆکتۆبەری داهاتوو ئەنجام دەدرێت. 

 

تەمەنی کۆمیسیۆنی هەڵبژاردنەکانی عێراق 07-01-2024 بەسەر دەچوو، بەڵام لە 22-11-2023 پەرلەمانی عێراق مادەی حەوتی یاسای کۆمیسیۆنی هەموار کردەوە و شەش مانگ تەمەنی درێژکردەوە، واتا تاوەکو 07-07-2024.

 

رۆژی 22ی ئایار، پەرلەمانی عێراق درێژکردنەوەی ماوەی کارکردنی کۆمیسیۆنی باڵای سەربەخۆی هەڵبژاردنەکانی تاوەکو 06-01-2025 پەسند کرد، ئەوەش بەمەبەستی بەڕێوەبردنی هەڵبژاردنی پەرلەمانی کوردستان.