رووداو دیجیتاڵ
وەزارەتی دەرەوەی عێراق دژی ئەو گرژییانەیە کە پێرێ لەسەر سنووری نێوان سووریا و ئوردن روویاندا و تێیدا بە درۆن سێ سەربازی ئەمریکا کوژران و 40یشیان برینداربوون. وەزارەتکە داوا دەکات دەرفەت بدرێتە ئەو دانوستاندنەی کە عێراق و ئەمریکا بۆ کشانەوەی هێزەکانی هاوپەیمانیی نێودەوڵەتیی شەڕی دژ بە داعش دەیکەن.
وەزارەتی دەرەوەی عێراق لەبارەی زیادبوونی گرژییەکانی ناوچەی رۆژهەڵاتی نێوەڕاست و هێرشەکانی سەر هێزەکانی ئەمریکا و رووداوەکانی ئیسرائیل و فەلەستین راگەیێندراوێکی بڵاوکردەوە، تێیدا هاتووە: "نیگەرانیی زۆرمان لەبەرامبەر ئەو پێشهاتە ئەمنییانەی ئەمدواییەی ناوچەکە دەردەبڕین و داوای کەمکردنەوەی گرژییە هەرێمییەکان دەکەین بەهۆی ئەو دۆخە هەستیارەی ئێستا و پێویستیی بەهێزکردنی هەوڵە نێودەوڵەتییە هاوبەشەکان لەپێناو سەقامگیری."
سەبارەت بە هێرشە درۆنییەکەی دوێنیی سەر سنووری ئوردن و سووریا، دەڵێت: "زیادکردنی ئەو گرژییە ئەمنییانە رەتدەکەینەوە کە لە باکووری رۆژهەڵاتی ئوردن لەسەر سنووری لەگەڵ سووریا هەن."
باسی ئەو دانوستاندنەشی کردووە کە لەنێوان عێراق و هێزەکانی هاوپەیمانیی نێودەوڵەتیی شەڕی دژ بە داعش هەیە، دەڵێت: "جەخت لەسەر پێویستیی رەخساندنی دەرفەت بۆ ئەو گوتوبێژانە دەکەینەوە کە لەگەڵ لایەنی ئەمریکی دەکرێت و حکومەتی عێراق هەوڵی چڕی تێدا دەدات لەپێناو گەیشتن بە لێکتێگەیشتنی ئەرێنی کە خزمەت بە عێراق و ناوچەکە دەکات."
رۆژی یەکشەممە هێرش کرایە سەر ناوچەیەکی ئوردن لەسەر سنووری لەگەڵ سووریا کە بووە هۆی کوشتنی سێ سەربازی ئەمریکی و برینداربوونی 40ی دیکە.
جۆن کێربی، گوتەبێژی ئەنجوومەنی ئاسایشی نیشتمانیی ئەمریکا بە کەناڵی msnbcـی وڵاتەکەی گوت: "هێرشەکە لە رێگەی یەک درۆنەوە بووە و هەندێک لە سەربازە بریندارەکانیشمان دۆخیان جێگیر نییە".
گوتەبێژی ئەنجوومەنی ئاسایشی نیشتمانیی ئەمریکا ئاماژە بەوەش دەکات، لەکاتی هێرشەکەدا زۆربەی سەربازەکانیان لە خەودا بوون.
بەگوێرەی پێنتاگۆن، لە 17-10-2023ەوە گرووپە چەکدارەکانی نزیکی ئێران لە عێراق کە خۆیان بە موقاوەمەی ئیسلامی لە عێراق دەناسێنن، نزیکەی 160 جار هێزەکانی ئەمریکایان لە هەرێمی کوردستان، رۆژئاوای کوردستان، عێراق و سووریا کردووەتە ئامانج.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ