رووداو دیجیتاڵ
رۆژی چوارشەممە، شەڕێکی تووند لەنێوان دوو تیرەی هۆزێکی پارێزگای میسان روویدا. گوتەبێژی تەندروستیی پارێزگاکەش رایگەیاند، حەوت تەرم گەیێندراونەتە دادپزیشکی میسان.
ئێوارەی رۆژی 28-12-2022 لە ناوچەیەکی ناحیەی سەلام لە قەزای مەیموونە لە رۆژهەڵاتی پارێزگای میسان، شەڕ و پێکدادانێکی سەختی هۆزایەتی روویدا. شەڕەکە لەنێو هۆزی ئال زرێرج دروستبووە لەنێوان تیرەی ئەلبوکەریم و ئەلبوغانم؛ تێیدا چەکی سووک و مامناوەند بەکارهاتووە.
ئەمڕۆ پێنجشەممە 29-12-2022، محەممەد کینانی، گوتەبێژی تەندروستیی پارێزگای میسان بە تۆڕی میدیایی رووداوی راگەیاند، "بەهۆی شەڕەکەوە، حەوت [کەس کوژراون] و تەرمەکانیان گەیێندراونەتە دادپزیشکی میسان. هەروەها دوو برینداریش لە نەخۆشخانەی شەهید سەدر چارەسەریان بۆ دەکرێت."
گوتەبێژی تەندروستیی پارێزگای میسان ئاماژەی بەوەش دا، شەڕەکە کاژێر 06:00ی ئێوارەی چوارشەممە روویداوە، بەڵام بەهۆی سەختیی شوێنەکەوە، کاژێر 09:00ی شەو هێزە ئەمنییەکان گەیشتوونەتە شوێنەکە و تەرمەکان گواستراونەتەوە بۆ دادپزیشکیی میسان.
درەنگی شەوی رابردووش، پۆلیسی پارێزگای میسان لە راگەیێندراوێکدا بڵاویکردەوە، هێزێکی ئەمنی لە پۆلیسی میسان و سوپای عێراق گەیشتووەتە شوێنی رووداوەکە. بازنەیەکی ئەمنییان دروستکردووە. شەڕەکەش لەنێوان ئەندامانی یەک هۆز روویداوە لە دەوروبەری ناحیەی سەلام-ی سەر بە قەزای مەیموونە.
پۆلیسی پارێزگای میسان دەڵێت، هێزەکانیان هەڵمەتێکی گەڕان و پشکنینیان دەستپێکردووە و چوار تۆمەتباری شەڕەکەیان دەستگیر کردووە. دەستیشیان بەسەر بڕێک چەک و تەقەمەنیدا گرتووە. بە گوتەی پۆلیس ئەو ناوچەی شەڕەکە تێیدا روویداوە، دوورەدەستە و گەیشتنی هێزەکان بە ناوچەکە سەختە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ