رووداو دیجیتاڵ
حکومەتی هۆڵەندا نزیکەی 120 سەربازی دیکە و 3 هێلیکۆپتەر دەنێرێتە عێراق.
حکومەتی هۆڵەندا رۆژی هەینی، 29-9-2023، بڵاویکردەوە، لە چوارچێوەی ئەرکەکانی هاوپەیمانیی ناتۆدا لە عێراق، نزیکەی 120 سەربازی دیکە و سێ هێلیکۆپتەری جۆری چینووک دەگوازێتەوە عێراق.
ئەو بڕیارە لە کاتێکدایە، حکومەتی هۆڵەندا لە تەممووزی ئەمساڵدا رایگەیاند، نزیکەی 145 سەرباز دەنێرێتە عێراق و بڕیارە رۆژی 1-1-2024 بگەن.
ئەرکی ناتۆ لە عێراق لە ئۆکتۆبەری ساڵی 2018 و لەسەر داوای حکومەتی عێراق دەستیپێکرد. ئەرکی هاوپەیمانییە سەربازییەکە بریتییە لە راهێنان و زیادکردنی توانای هێزە ئەمنییەکان بۆ ئەوەی رێگە نەدەن داعش بەهێز بێتەوە. ناتۆ هەروەها دەڵێت، سەقامگیری عێراقی بەلاوە مەبەستە.
ئەرکی سەرەکیی ئەو هێزەی دەنێردرێتە عێراق بریتییە لە دابینکردن و گەیاندنی خواردن و کەرەستە بۆ سەربازەکانیان؛ هەروەها هێلیکۆپتەرەکان بە مەبەستی گواستنەوەی سەربازەکانیان بەکاردەهێنن.
چینووک، هێلیکۆپتەرێکی سەربازیی دروستکراوی کۆمپانیای ڤێرتۆڵی ئەمریکییە. هێلیکۆپتەرەکە لە ساڵی 1962 یەکەمین دانەی لێ دروستکرا و تاوەکو ئێستا نزیکەی 1200 دانەی لێ دروستکراوە.
هۆڵەندا ئەندامێکی هاوپەیمانیی نێودەوڵەتی دژی داعشیشە کە لە ساڵی 2014 بۆ رووبەڕووبوونەوەی داعش دامەزرا. ئەو وڵاتە لە رێگەی ناردنی سەرباز و راوێژکاری سەربازییەوە یارمەتی هێزەکانی پێشمەرگە و هێزە ئەمنییەکانی عێراقی لە رووبەڕووبوونەوەی داعش دا. هۆڵەندا لە پڕۆسەی یەکخستنەوەی هێزەکانی پێشمەرگەش رۆڵێکی کارای هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ