رووداو دیجیتاڵ
لە گەرمەی شایی و هەڵپەڕکێی زەماوەندی بووک و زاواکەی حەمدانیەدا، بووە هاوار، شین و گریان. شایی بووک و زاوا پرسەی بە کۆمەڵی بەدوادا هات و بەشی زۆری کۆڵانەکانی حەمدانیە پرسەیان تێدایە. چەند رۆژێکە هەمووان دەیانەوێ هەواڵی بووک و زاواکە بزانن.
دوای سێ رۆژ لە رووداوی ئاگرکەوتنەوەی حەمدانیە کە بووە هۆی گیانلەدەستدانی زیاتر لە 100 کەس و برینداربوونی زیاتر لە 150ی دیکە، ئەمڕۆ بووک و زاواکە بە جلی رەش و دەست لە ناو دەست لە رێگەی چوون بۆ گۆڕستانی حەمدانیە دەرکەوتن.
ریڤان و حەنین لە کاتێکدا شەوی سێشەممە، 26-09-2023، لە ئامێزی یەکدی خەریکی سەما و دەربڕینی خۆشیی خۆیان بوون لە ئاهەنگی رۆژی هاوژینییان کە سەدان کەس تێیدا ئامادەبوون، پریشکی یاریی ئاگرین لەپڕ هەموو شتێکی گۆڕی، شایی و هەڵپەڕکێ بووە گریان و شین و لە چەند چرکەیەکدا هۆڵەکە بەتەواوی سووتا.
بەپێی ئەو گرتە ڤیدیۆیانەی بڵاوبوونەتەوە، پریشکی یاریی ئاگرین سەرەتا بنمیچی هۆڵەکەی گرتەوە و ئاگر بەسەر سەری بەشدارانی ئاهەنگەکە باری، هەمووان هاواریان کرد و رێگەی دەربازبوون بۆ هەندێکیان نەما و خۆیان و خەونەکانیان لەنێو هۆڵەکە بوونە خەڵووز.
بەپێی لێکۆڵینەوەکانی بەرگریی شارستانی، هۆکاری ئاگرکەوتنەوەکە پابەندنەبوون بووە بە رێنوێنییەکانی بەرگریی شارستانی لەکاتی دروستکردنی هۆڵەکەدا و خراپیی کوالێتیی ئەو کەرەستانە بووە لە دروستکردنیدا بەکارهاتوون. بەوهۆیەشەوە تاوەکو ئێستا خاوەنی هۆڵەکە و زیاتر لە 10 کەسی دیکە دەستگیرکراون.
ئەو کەسانەی تەرمەکانیان بەرەو گۆڕستان برا، میوانی ئاهەنگێکی پێکهێنانی ژیانی هاوژینی بوون کە لەپڕدا و بەهۆی یارییە ئاگرینەکان هۆڵەکە بووە سەرتاپا ئاگر بۆ میوانەکان و بووک و زاوا و بەهۆیەوە دەیان کەسیان سووتان و گیانیان لەدەستدا.
تاوەکو ئێستا زیاتر لە 100 کەس گیانیان لەدەستداوە و هێشتا دەگوترێت چەند کەسێکی دیکەیش بێسەروشوێنن. چیرۆکی زۆر و خەمناک لە دوای رووداوەکە جێمان و چەندین ماڵبات هەموویان یان زۆرینەی ئەندامانی خێزانەکانیان لەدەستدا.
بووک و زاوا لەو کەسانە بوون کە رزگار بوون. چەند رۆژێک هیچ هەواڵێکیان نەبوو و، کەس نەیدەزانی لەکوێن و تەندروستییان چۆنە. پەیام سەربەست، پەیامنێری تۆڕی میدیایی رووداو رۆژی پێنجشەممە، 28-09-2023، چووە لای بووک و زاوا و نزیکەی کاژێرێک قسەی لەگەڵیان دا کرد، بەڵام ئەوان لە دۆخێکی رووخاوی دەروونی دا بوون و نەیاندەتوانی قسە بۆ میدیاکان بکەن.
پەیام سەربەست باسی دۆخی بووک و زاواکە لە زاری خۆیانەوە دەکات و دەڵێت، دۆخێکی دیکەی ناخۆش کە بەسەر ئەواندا هاتووە، بەشێک لە کەسوکاری قوربانییان بە چاوێک سەیریان دەکەن کە ئەوان هۆکاری ئەو مەرگەساتە بووبن، حەنین و ریڤان بە جلوبەرگە رەشەکەیانەوە کاتێک بیریان لەو قسانە دەکردەوە تووند دەستی یەکدییان دەگرت و بە ئاماژەی سەر و بەبێدەنگی دەیانویست پێم بڵێن، "تاوانی ئێمە نییە، کەس حەز ناکات دۆخێکی وا بەسەر دووژمنەکەیشیدا بێت."
فرمێسک لە چاوی بووکەکەی حەمدانیە وشک نابێت؛ بووکەکە ئەمڕۆ دایک و برایەکی بەخاک سپێردران و لەتاو دۆخی کارەساتباری لەهۆش خۆی چووە pic.twitter.com/3yEuqFMIlz
— Rudaw (@Rudawkurdish) September 29, 2023
ئەمڕۆ هەینی بووک و زاوا بە جلی رەش و دەست لە ناو دەستی یەکدی، بەوپەڕی بێ هێزی و خەمبارییەوە لە رێگەی چوون بۆ گۆڕستانی قیامە لە حەمدانیە دەرکەوتن. چیرۆکی دوای ئاهەنگی ئەوان کە ئەم مەرگەساتەی لێ کەوتەوە، رەنگە یان هەرگیز یان تاوەکو کاتێکی دوور و درێژ ساڕێژ نەبێت و نەتوانن ئاهەنگەکەیان تەواو بکەن.
بووک و زاواکەی رووداوی ئاگرگرتنی هۆڵەکەی قەزای حەمدانیە پێکەوە دەرکەوتن
— Rudaw (@Rudawkurdish) September 29, 2023
بووک و زاواکە ئەمڕۆ هەینی 29-09-2023 لە گۆڕستانی حەمدانیە بوون لە کاتی بەخاک سپاردنی تەرمی دایک و برایەکی بووک. وێنە: بڵند تاهیر - رووداو pic.twitter.com/GNEx47r7gN
بووک ئەمڕۆ دایک و برایەکی بەخاک سپێردران. ریڤان و حەنین بەیەکەوە چوونە سەر گۆڕەکەیان، بووک فرمێسک لە چاوەکانی وشک نەدەبوون و زاواش وشکهەڵاتوو و بێ دەسەڵات بە دیار بووکەوە دانیشتووە و هیچی لەدەست نایەت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ