هەڵەیەک روویدا! دووبارە هەوڵبدە
عێراق
"ئەو پرۆسەیە ماوەى دوو مانگ دەخایێنێت و لە چوارچێوەى ئامادەکارییەکانە بۆ سەرژمێرى گشتیى دانیشتووان."
رووداو دیجیتاڵ
یەکەم هەنگاوى کرداریى سەرژمێریى گشتیی دانیشتووان، یەکى ئەیلوول پرۆسەى گەمارۆسازی و ژمارەلێدانى باڵەخانەکان لە عێراق و هەرێمى کوردستان دەستپێدەکات کە دوو مانگ دەخایێنێت.
عەبدولزەهرە هینداوى، گوتەبێژى وەزارەتى پلاندانانى عێراق بە تۆڕى میدیایی رووداوى راگەیاند: "یەکشەممەى داهاتوو پرۆسەى گەمارۆسازی و ژمارەلێدانى باڵەخانەکان لە عێراق لە چوارچێوەى سەرژمێریى گشتیی دانیشتووان دەستپێدەکات کە هەرێمى کوردستانیش دەگرێتەوە."
عەبدولزەهرە هینداوى گوتى: "ئەو پرۆسەیە ماوەى دوو مانگ دەخایێنێت و لە چوارچێوەى ئامادەکارییەکانە بۆ سەرژمێرى گشتیى دانیشتووان."
لەو پرۆسەیەدا تیمەکانى سەرژمێرى بەسەر چەند بلۆکێکدا دابەش دەکرێن بۆ گەمارۆسازی و ژمارەلێدان، هەر بلۆکێک خانوو و باڵەخانەکانى سنوورەکەى دەگاتە 120.
لە دواى 37 ساڵ، بڕیارە لە 20ى تشرینى دووەمى داهاتوو، سەرژمێریى گشتیى دانیشتووان بکرێت کە پارێزگاکانى عێراق و هەرێمى کوردستانیش دەگرێتەوە.
18ـى ئابی 2024، ئەنجوومەنى وەزیرانى عێراق بڕیاریدا ئامێر، پێداویستى، رێگەپێدان و سێرڤەرى پێویست بۆ ناوەندى زانیارییەکانى هەرێمى کوردستان دابین بکات بۆ گواستنەوەى زانیارییەکانى سەرژمێریى گشتیى دانیشتووان لە پارێزگاکانى هەرێمى کوردستان بۆ ناوەندى سەرەکى و بە پێچەوانەوە.
گوتەبێژى وەزارەتى پلاندانانى عێراق رایگەیاند، رێوشوێنەکانى دابینکردنى پێداویستى ئەو ناوەندە دەستیپێکردووە و بەر لە رۆژى سەرژمێرى ئامادە دەبێت.
31ى ئایار تاوەکو 13ى حوزەیران سەرژمێریى ئەزموونى لە عێراق و هەرێمى کوردستان، وەکو ئامادەکارییەک بۆ سەرژمێریی گشتی لە چەند گوند و شارۆچکەیەک دەستیپێکرد.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ