وەزارەتی ناوخۆی ئێران بۆ زیارەتکاران: هەموو سنوورە وشکانییەکان لەگەڵ عێراق داخراون

 

سەید مەجید میرئەحمەدی، جێگری وەزیری ناوخۆی ئێران بۆ کاروباری ئاسایش و هەروەها سەرۆکی دەستەی زیارەتکارانە، دەڵێت، لەکاتی کردنەوەی سنوورەکان زیارەتکاران ئاگاداردەکەنەوە.

 

هاوکات، سەعید چەلەندەری، بەڕێوەبەری فڕۆکەخانەی ئیمام خومەینی بە میدیای وڵاتەکەی راگەیاندووە، تەواوی گەشتە ئاسمانییەکانی ئەو وڵاتە بۆ بەغدا و نەجەف هەڵوەشێندراونەتەوە. 

 

رۆژی دووشەممە، 29-8-2022 موقتەدا سەدر، رێبەری رەوتی سەدر رایگەیاند، واز لە کاری سیاسی دەهێنێت، دوای ئەوەش لایەنگرانی بەلێشاو چوونە سەر شەقامەکان و داوای دەستلەکارکێشانەوەی حکومەت و "لابردنی گەندەڵکارانیان" دەکرد. 

لە ئێوارەی رۆژی دووشەممە خۆپێشاندەران چوونە سەر بەشێک لە کۆشکەکانی ناوچەی سەوز، پاشان لە کۆشکی حکومەت هێزێکی ئەمنی بە چەک و گازی فرمێسکڕێژ بڵاوەی بەخۆپێشاندەران کرد و رووبەڕووبوونەوە روویدا کە بەهۆیەوە تاوەکو ئێستا لانی کەم 12 خۆپێشاندەر گیانیان لەدەستداوە و نزیکەی 300 خۆپێشاندەریش برینداربوو. 

هاوکات ئێوارەی ئەمڕۆ باڵیۆزخانەی ئێران لە بەغدا داوا لە زیارەتکارانی وڵاتەکەی لە نەجەف و کەربەلا و شارەکانی دیکەی عێراق کرد خۆیان بپارێزن و "زۆر پێویست نەبێت هاتووچۆ نەکەن."

باڵیۆزخانەی ئێران داوای لەو هاووڵاتییانەی کردووە کە بەمەبەستی زیارەتی شوێنە پیرۆزەکانی شیعە لە عێراقن، خۆیان بپارێزن و ئەگەر "زۆر پێویست نەبێت" لە بەغدا، نەجەف، کەربەلا و شارەکانی دیکەی عێراق هاتووچۆ نەکەن.

هاوکات وەزارەتی دەرەوەی ئێرانیش داوای لە هاووڵاتییانی کردووە کە لەم کاتەدا سەردانی عێراق نەکەن.