29-08-2022
14:45
نێچیرڤان بارزانی: هەڵوێستەکەى سەدر نیشتمانى و بەرپرسیارانەیە
نێچیرڤان بارزانی، سەرۆکی هەرێمی کوردستان
رووداو - هەولێر
سەرۆکى هەرێمى کوردستان پێشوازیى لە هەڵوێستەکەى موقتەدا سەدر، رێبەرى رەوتى سەدر دەکات بۆ کۆتاییهێنان بە گرژییەکان و داواش لە سەرجەم لایەنەکان دەکات کە دیالۆگ ئەنجامبدەن بۆ چارەسەرکردنى کێشەکان.
30ى ئابى 2022، نێچیرڤان بارزانى، سەرۆکى هەرێمى کوردستان لە تویتێکدا پێشوازى لە هەڵوێستەکەى موقتەدا سەدر، رێبەرى رەوتى سەدر کرد بۆ داواکاریی کۆتاییهێنان بە گرژى و کشاندنەوەى لایەنگرانى لە ناوچەى سەوز و دەڵێت: "پاڵپشتیى هەڵوێستە نیشتمانییە بەرپرسیارانەکەى دەکەین و دەخوازین ئاسایش و سەقامگیرى باڵ بەسەر وڵاتدا بکێشێت".
سەرۆکى هەرێمى کوردستان دەڵێت: "بانگهێشت دووپات دەکەینەوە بۆ سەرجەم هێز و لایەنەکان بۆ ئەنجامدانى دیالۆگ لە پێناو چارەسەرى کێشەکان و رزگاکردنى عێراق لەم دۆخە قورسە".
ئەمڕۆ موقتەدا سەدر لە کۆنگرەیەکى رۆژنامەڤانیدا لە نەجەف ماوەى کاژێرێکى دایە لایەنگرانى رەوتەکەی بۆ کشانەوە لە خۆپێشاندان و مانگرتن لە ناوچەی سەوز و راگەیاند، نیگەران بووە لەوەى روویداوە و داواى لێبووردنى لە گەلى عێراق کرد.
دوای پەیامەکەی رێبەری رەوتی سەدر، لایەنگرانی رەوتەکە لە ناوچەی سەوز دەستیان بە کشانەوە کرد و پەیامنێری رووداو رایگەیاند، خۆپێشاندەران ناوچەی سەوزیان چۆڵکرد.
29ى ئاب موقتەدا سەدر، رێبەری رەوتی سەدر رایگەیاند، واز لە کاری سیاسی دەهێنێت، دوای ئەوەش لایەنگرانی خۆپێشاندانیان ئەنجامدا و گرژى لێکەوتەوە کە بەهۆیەوە 25 خۆپێشاندەر گیانیان لەدەستداوە و زیاتر لە 380 خۆپێشاندەریش برینداربوون.
14:32
حەلبووسی: هەڵوێستەکەی سەدر بە قەبارەی عێراقە
محەممەد حەلبووسی، سەرۆکی پەرلەمانی عێراق
محەممەد حەلبووسی، سەرۆکی پەرلەمانی عێراق سوپاسی موقتەدا سەدر، رێبەری رەوتی سەدری کرد کە داوای لە لایەنگرانی کرد کۆتایی بە شەڕ و خۆپێشاندان و مانگرتن بهێنن و بگەڕێنەوە ماڵەکانیان. حەلبووسی راشیگەیاند، هەڵوێستەکەی سەدر بە قەبارەی عێراقە.
محەممەد حەلبووسی لە تویتەر ئاماژەی بەوە کرد: "سوپاس بۆ ئێوە بەڕێز سەید موقتەدا سەدر، هەڵوێستەکەتان بە قەبارەی عێراقە، کە شایەنی زۆرە لە ئێمە."
زیاتر بخوێنەوە
13:17
سەدر بۆ لایەنگرانی: لە کاژێرێکدا بکشێنەوە
موقتەدا سەدر، رێبەری رەوتی سەدر
رووداو دیجیتاڵ
رێبەرى رەوتى سەدر ماوەى کاژێرێکى دایە لایەنگرانى رەوتەکەی بۆ کشانەوە لە خۆپێشاندان و مانگرتن لە ناوچەی سەوز و راگەیاند، نیگەران بووە لەوەى روویداوە و داواى لێبووردنى لە گەلى عێراق کرد.
رۆژی 30ى ئابى 2022، موقتەدا سەدر، رێبەرى رەوتى سەدر لە کۆنفڕانسێکی رۆژنامەڤانیدا رایگەیاند، نیگەران بووە لەوەى روویداوە و گوتى: "داواى لێبووردن لە گەلى عێراق دەکەم و عێراق زەرەرمەندی یەکەمە لەوەى کە روویدا؛ بکوژ و کوژراو پێکەوە لە ئاگردان سەر بە هەرچ لایەنێک بن."
موقتەدا سەدر گوتیشى: "پێشتر نیشتمانەکەم دیلى گەندەڵى بوو، بەڵام ئێستا دیلى گەندەڵى و تووندوتیژییە و هیوام دەخواست خۆپێشاندانى ئاشتییانە هەبێت بەبێ چەک. هەر شۆڕشێک تووندوتیژى لەگەڵدا بێت، شۆڕش نییە و من رەخنە لە شۆڕشى رەوتى سەدریش دەگرم."
رێبەرى رەوتى سەدر ماوەى یەک کاژێرى دایە لایەنگرانى بۆ کشانەوە لە ناوچەی سەوز، هەڕەشەى ئەوەى کرد کە ئەگەر بەدەم ئەو داواکارییەوە نەچن، تەنانەت خۆی لە رەوتی سەدریش بێبەرى دەکات و گوتی، "رشتنى خوێنى عێراقى حەرامە."
موقتەدا سەدر سوپاسى هێزە ئەمنییەکان و کارمەندانى حەشدی شەعبی و فەرماندەى گشتیى هێزە چەکدارەکان کرد بۆ پاراستنى دۆخەکە.
هەڵکەوت عەزیز، پەیامنێری رووداو لە بەغدا رایگەیاند، دوای گوتارەکەی موقتەدا سەدر، لایەنگرانی دەستیان بە کشانەوە کرد و بەرە بەرە ناوچەی سەوز چۆڵ دەکەن.
مستەفا کازمی، سەرۆکوەزیرانی عێراق دوای گوتارەکەی سەدر لە تویتەر پەیامێکی بڵاوکردەوە و پێشوازیی لەو بانگەوازە کرد و گوتی، بانگەوازەکەی سەدر بۆ راگرتنی تووندوتیژییەکان و رشتنی خوێنی عێراقییەکان "لەوپەڕی بەرپرسیارێتیدایە".
سەرۆکوەزیرانی عێراق هەروەها باسی لەوەش کرد کە بانگەوازەکەی سەدر هەموو بەرپرسیارێتییەکی ئەخلاقی و نەتەوەیی تێدایە بۆ رێگە گرتن لە پەرەسەندنی تووندوتیژییەکان و دەستپێکردنی دیالۆگێکی نیشتمانیی بەرهەمدار بۆ چارەسەرکردنی قەیرانەکان.
رۆژی دووشەممە، 29-8-2022 موقتەدا سەدر، رێبەری رەوتی سەدر رایگەیاند، واز لە کاری سیاسی دەهێنێت، دوای ئەوەش لایەنگرانی بەلێشاو چوونە سەر شەقامەکان و داوای دەستلەکارکێشانەوەی حکومەت و "لابردنی گەندەڵکارانیان" دەکرد.
لە ئێوارەی رۆژی دووشەممە خۆپێشاندەران چوونە سەر بەشێک لە کۆشکەکانی ناوچەی سەوز، پاشان لە کۆشکی حکومەت هێزێکی ئەمنی بە چەک و گازی فرمێسکڕێژ بڵاوەی بە خۆپێشاندەران کرد و رووبەڕووبوونەوە روویدا کە بەهۆیەوە تاوەکو ئێستا لانی کەم 25 خۆپێشاندەر گیانیان لەدەستداوە و زیاتر لە 380 خۆپێشاندەریش برینداربوون.
12:58
ئەرشەد ساڵحی: رێگە نادەین رووداوەکانی بەغدا لە کەرکووک دووبارە ببنەوە
ئەرشەد ساڵحی لەگەڵ چەکداری حەشدی تورکمانی
رووداو-هەولێر
لە گرتەیەکی ڤیدیۆییدا ئەرشەد ساڵحی، سەرۆکی پێشووی بەرەی تورکمانی و ئەندامی ئەنجوومەنی نوێنەرانی عێراق دەڵێت، لەو ژینگە ئاڵۆزەی عێراق پێیدا تێدەپەڕێت، لەگەڵ هێزی چەکداری تورکماندا بەرگری لە کەرکووک دەکەن و رێگە نادەن رووداوەکانی بەغدا لە کەرکووک دووبارە ببێتەوە.
ئەرشەد ساڵحی، سەرۆکی پێشووی بەرەی تورکمانی و ئەندامی ئەنجوومەنی نوێنەرانی عێراق شەوی دووشەممە 29ی ئابی 2022 ئەو گرتە ڤیدیۆییەی لە هەژماری تایبەتیی خۆی لە تۆڕی کۆمەڵایەتیی تویتەر بڵاوکردەوە.
ساڵحی لەگەڵ ژمارەیەک چەکداری حەشدی تورکمانیدا دەرکەوتووە و بە تورکمانی قسە دەکات و دەڵێت، ئاڵۆزییەکانی ئاسایش لە بەغدا پەرەیسەندووە و ئێمە لەگەڵ هێزی چەکداری تورکماندا ئاسایشی کەرکووک کۆنترۆڵ دەکەین.
ئەرشەد ساڵحی هەروەها دەڵێت، ئەو هێزە تورکانە، هێزی بەرگریی کەرکووکە و بەرگری لە تورکمانەکان و کەرکووکییەکان دەکات، رێگە نادەن رووداوەکانی بەغدا لە کەرکووک دووبارەببێتەوە.
دەقی قسەکانی ئەرشەد ساڵحی، ئەندامی ئەنجوومەنی نوێنەرانی عێراق:
"ئێستا لە کەرکووکین، لە کەرکووک بە راشکاوی دەیڵێم، ئاڵۆزییەکانی ئاسایش لە بەغدا کەمێک پەرەیسەندووە. ئێمە پشت بە خودا ئاسایشی کەرکووک بە باشترین شێوە کۆنترۆڵ دەکەین. لێرە پۆلیس، سەرباز و هەموو هێزەکان پێکەوەن، بەڵام ئێستا لەگەڵ هێزەکەی خۆماندا پێکەوەین. لەگەڵ هێزی تورکمان، لەگەڵ هێزی چەکداری تورکمان پێکەوەین. ئەمانە هێزی بەرگریی کەرکووکن. هێزی بەرگریی کەرکووک هێزێکە بەرگری لە تورکمانەکان و کەرکووکییەکان دەکات. پشت بە خودا ئاسایشی کەرکووک پارێزراوە، با کەس بیر لەوە نەکاتەوە لێرە رووداو رووبدات. لە کاتێکدا ئێستا سەربازمان هەیە، با کەس نیگەران نەبێت. رووداوەکانی لە بەغدا روودەدەن لە ناوچەکانی ئێمەدا روونادەن".
زیاتر بخوێنەوە
12:42
کەنەدا داوا لە هاووڵاتییانی دەکات عێراق جێبهێڵن
رووبەڕووبوونەوەی خۆپێشاندەران و هێزە ئەمنییەکان لە ناوچەی سەوز، وێنە: Ahmad Al-Rubaye / AFP
رووداو-هەولێر
کەنەدا داوا لە هاووڵاتییانی دەکات کە بە بەکارهێنانی گەشتی ئاسمانیی بارزگانی، عێراق جێبهێڵن.
رۆژی سێشەممە، 30ـی ئابی 2022، باڵیۆزخانەی کەنەدا لە بەغدا لە تویتێکدا رایگەیاند، بەهۆی شەڕ و پێکدادانی دژوار لەنێوان "خۆپیشاندەران و میلیشیا و هێزە ئەمنییەکاندا، ئەگەر لە عێراق بیت و رێگەتان پێبدرێت، لەڕێگەی گەشتی ئاسمانیی بازرگانییەوە وڵاتەکە جێبهێڵن". دەشڵێت، ئەگەر پێتان بکرێت، ئەوە بکەن بۆ ئێوە سەلامەتترە.
هاوکات هێڵێکی گەرمیان بۆ ئەو "کەنەدییانەی پێویستییان بە هاوکاری هەیە" داناوە بۆ ئەوەی لەو رێگەیەوە پەیوەندی بە باڵیۆزخانەی کەنەدا لە بەغدا بکەن.
پێشتریش گریگۆری گالیگن، باڵیۆزی کەنەدا لە عێراق نیگەرانیی وڵاتەکەی لە پێکدادانەکانی عێراق راگەیاند و گوتی کە دۆخەکە "زۆر مەترسیدارە و لەوانەیە بەخێرایی لە کۆنترۆڵ دەرچێت". هەروەها گوتیشی، کەنەدا داوا لە هەموو لایەنەکان دەکات هەنگاوبنێن بۆ ئەوەی بەخێرایی دۆخەکە دامرکێننەوە و ناکۆکیی نێوانیان لەڕێگەی دانوستاندن و لەپێناو بەرژەوەندیی هەموو عێراقییەکان چارەسەر بکەن.
پێش ئەوەش هەریەک لە کوێت و تورکیا داوایان لە هاووڵاتییەکانیان کرد بۆ ئەوەی "هەرچی زووە" عێراق جێبهێڵن و داواشیان لەوانە کرد کە بەنیازن سەردانی عێراق بکەن، گەشتەکانیان هەڵبوەشێننەوە.
بەگوێرەی سەرچاوە تەندروستییەکانی عێراق، بەهۆی شەڕ و پێکدادانەکانی دوێنێ تاوەکو ئەمڕۆی بەغدا و چەند پارێزگایەکی باشووری عێراق لەنێوان خۆپێشاندەران و هێزە ئەمنییەکان، لانیکەم 25 کەس کوژراون و 380 کەسی دیکەش بریندار بوونە.
گرژییەکانی نێوەڕاست و باشووری عێراق دوای ئەوە هات رۆژی دووشەممە موقتەدا سەدر، رێبەری رەوتی سەدر وازهێنانی لە کاری سیاسی راگەیاند.
12:25
پەیامنێری رووداو: چەند هاوەنێک ئاراستەی خۆپێشاندەران لە ناوچەی سەوز کران
لایەنگرانی رەوتی سەدر لە بەغدا. وێنە: مستەفا گۆران - رووداو
مستەفا گۆران، پەیامنێری رووداو لەنێو شەڕ و ئاڵۆزییەکانی بەغداو لە گرتە ڤیدیۆییەکەدا دەڵێت، لە ناوچەی سەوز چەند گوللـە هاوەنێک ئاراستەی خۆپێشاندەران و لایەنگرانی سەدر کران.
پەیامنێری رووداو راشیگەیاند، خۆپێشاندەران لە ترسی گوللـەی قەناس خۆیان لەژێر بەربەستەکان دەشارنەوە.
زیاتر بخوێنەوە🔴بەپەلە؛ لە ناوچەی سەوز چەند هاوەنێک ئاراستەی خۆپێشاندەران و لایەنگرانی سەدر کرا #المنطقه_الخضراء #بغداد pic.twitter.com/pz2VClHrs8
— Rudaw (@Rudawkurdish) August 30, 2022
12:20
ئۆپەراسیۆنە هاوبەشەکان بۆ بازگەکان: دڵنیاببنەوە بارهەڵگرەکان چەک و تەقەمەنی نابەنە ناو بەغدا
دیمەنی شەقامێکی بەغدا. وێنە: مستەفا گۆران - رووداو
فەرماندەیی ئۆپەراسیۆنە هاوبەشەکانى بەغدا فەرمانیدا بە پشکنینى سەرجەم ئەو ئۆتۆمبێل و بارهەڵگرانەى دەچنە نێو شاری بەغدا، بۆ رێگرى لە گواستنەوەى چەک و تەقەمەنى.
بەگوێرەى نووسراوێک، کە 30ى ئابى 2022، فەرماندەیی ئۆپەراسیۆنە هاوبەشەکانى بەغدا ئاراستەى چەند یەکەیەکى سەر بەو فەرماندەییەی کردووە، دەبێت پشکنین بۆ ئەو بارهەڵگرانە بکرێت، کە خۆراک، بەروبوومى کشتوکاڵى، دەرمان و کەلوپەلی تەندروستى و سووتەمەنی دەگوازنەوە و لە دەروازەکانەوە دەچنە نێو بەغدا بۆ دڵنیابوون لەوەى چەک و تەقەمەنیان تێدا نییە.
ئەو رێوشوێنەى هێزە ئەمنیەکان لە دواى ئەوە بوو کە لە 29ى ئابەوە قەدەخەى هاتووچۆ لە بەغدا راگەیێندراوە، بەوهۆیەوە نرخی کاڵا بەرزبووەتەوە، بۆیە بڕیاردراوە بە رێگەدان بەو بارهەڵگرانەی کاڵا و پێداویستیی خۆراک دەگوازنەوە.
لە دوێنی ئێوارە 29-08-2022، شەڕ و پێکدادان لە نێوان لایەنگرانی رەوتی سەدر و هێزە ئەمنییەکانی عێراق دەستیپێکردووە، بەپێی ئامارە بەراییەکان 25 خۆپێشاندەر کوژراون و 350 خۆپێشاندەریش بریندارن، لەنێو هێزە ئەمنییەکانیش کوژراو و بریندار هەن.
زیاتر بخوێنەوە
12:17
موقتەدا سەدر قسە دەکات
موقتەدا سەدر
موقتەدا سەدر، رێبەری رەوتی سەدر پاش کەمێکی دیکە لە حەنانەی نەجەف لە کۆنگرەیەکی رۆژنامەڤانیدا قسە دەکات.
زیاتر بخوێنەوە
11:28
شانەى راگەیاندنى ئەمنى: ڤیدیۆى دابەزاندنى هێز لە ناوچەى سەوز کۆنە
وێنەی ئەو هێلیکۆپتەرەی کە لە تۆڕە کۆمەڵایەتییەکان بڵاوکراوەتەوە
رووداو - هەولێر
شانەى راگەیاندنى ئەمنیى عێراق دەڵێت، بڵاوکردنەوەی ئەو ڤیدیۆیەى کە تێیدا دابەزاندنى نیشانەشکێن لە سەربانى باڵەخانەکانى ناوچەى سەوز دەبیندرێت، نوێ نییە و دەشڵێت: "نابێت هەواڵى ساختە بگوازرێتەوە و هەندێک کەس بەمەبەست ئەو بابەتانە بڵاودەکەنەوە".
رۆژی 30ى ئابى 2022، شانەى راگەیاندنى ئەمنیى عێراق روونکردنەوەیەکى بڵاوکردەوە و تێیدا ئاماژەى بەوەدا کە ئەو ڤیدیۆیەى لەبارەى دابەزاندنى نیشانەشکێن بە فڕۆکە لەسەر باڵەخانەکانى ناوچەى سەوزى بەغدا بڵاوکراوەتەوە، نوێ نییە و مەشقى کۆنى هێزى دژە تیرۆرى عێراقە.
شانەى راگەیاندنى ئەمنیى عێراق داوایکرد کە هەواڵى ساختە و هەڵبەستراو بڵاونەکرێنەوە و دەڵێت: "کەسانێک هەن بەمەبەست ئەو جۆرە بابەتانە بڵاودەکەنەوە".
ئەو روونکردنەوەیە لەدواى ئەوە هات کە لە نێو تۆڕە کۆمەڵایەتییەکانى عێراق گرتەى ڤیدیۆیی تایبەت بە شەڕى نێوان گرووپە چەکدارەکان و رێوشوێنى ھێزە ئەمنییەکان بڵاودەکرێتەوە بەبێ ئەوەى راستیى ئەو دیمەنانە یەکلایی بووبێتەوە.
لە شەوى رابردووەوە پێکدادان لە نێوان لایەنگرانی رەوتی سەدر و بەشێک لە هێزە ئەمنییەکانی عێراق دەستیپێکردووە و تاوەکو ئێستاش بەردەوامە. سەرچاوەیەک لە وەزارەتی تەندروستیی عێراق بە رووداوی گوت، بەوهۆیەوە تاوەکو ئێستا 25 کەس کوژراون و زیاتر لە 350 کەسیش بریندار بوون.
11:21
مەسرور بارزانی بۆ کازمى: حکومەتى هەرێمى کوردستان ئامادەی هاوکارییە
مەسرور بارزانی و مستەفا کازمى
مەسرور بارزانى، سەرۆکى حکومەتى هەرێمى کوردستان رایگەیاند بە تەلەفۆن قسەی لەگەڵ مستەفا کازمى، سەرۆکوەزیرانی عێراق کردووە و ئامادەیی حکومەتەکەى پیشانداوە بۆ یارمەتیدان لەپێناو هێنانەکایەى ئاشتى و سەقامگیرى لە هەموو عێراقدا.
رۆژی 30ى ئابى 2022، مەسرور باززانى، سەرۆکى حکومەتى هەرێمى کوردستان رایگەیاند، بە تەلەفۆن قسەی لەگەڵ مستەفا کازمى، سەرۆکوەزیرانى عێراق کردووە و نیگەرانى خۆى دەربڕیوە بەرانبەر بەو تەوژمە نوێیەى تووندوتیژى لەعێراق و ئامادەیی حکومەتى هەرێمى کوردستانى پیشانداوە بۆ هاوکاریکردن لەپێناو هێنانەکایەى ئاشتى و سەقامگیرى لە هەموو عێراقدا.
مەسرور بارزانى دەڵێت: "کاتى ئەوە هاتووە دیالۆگێکى گشتگیر و روون هەبێت لەبارەى پرسە قووڵ و مەترسیدارەکان کە رووبەڕووى وڵات دەبێتەوە و پێویستە بوێریمان هەبێت بۆ دیاریکردنى کڕۆکى ناکۆکییەکانى نێوانمان و دەبێت ئەوە لەبەرچاو بگرین کە ئەو دۆخەى ئێستا هەمووانى تێداین پێویستى بە چارەسەرێکى هەمیشەیی هەیە."
ئەو پەیوەندییە تەلەفۆنیەى نێوان مەسرور بارزانى و مستەفا کازمى لەکاتێکدایە لە 29ى ئابەوە خۆپیشاندان و پێکدادان لە بەغدا و چەند پارێزگایەکى دیکەى عێراق دەستیپێکردووە و بە گوێرەی زانیارییە سەرەتاییەکان 25 کەس کوژراون و 380 کەسی دیکەش بریندار بوونە.
زیاتر بخوێنەوە
10:33
پەیامنێری رووداو: رووبەڕووبوونەوەکان زیادیان کردووە
دیمەنی ئەمڕۆی رووبەڕووبوونەوەکان
هەردی محەممەد، پەیامنێری رووداو لە بەغدا لە شوێنی رووبەڕووبوونەوە چەکدارییەکانەوە باسی لە دۆخی شەڕ و رووبەڕووبوونەوەکانی کرد و لە کاتی قسەکانیدا ئەو خۆپێشاندەرانەی لە نزیکی بوون چەکی قورسیان بەکارهێنا.
پەیامنێری رووداو رایگەیاند، رووبەڕووبوونەوەکان زیادیان کردووە و خۆپێشاندەران و چەکدارەکان بە گوتاف دانەوە بەردەوامن لە داواکارییەکانیان.
زیاتر بخوێنەوە
10:22
وەزارەتی تەندروستیی عێراق بۆ رووداو: ژمارەی گیانلەدەستدان گەیشتە 25 کەس
بەخاکسپاردنی ژمارەیەک خۆپێشاندەر کە بەهۆی گرژییەکانەوە گیانیان لەدەستداوە، وێنە: Qassem al-KAABI / AFP
رووداو-هەولێر
پەیامنێری رووداو لە بەغدا لەسەر زاری سەرچاوەیەک لە وەزارەتی تەندروستیی عێراقەوە رایگەیاند، بەهۆی بەردەوامیی گرژیی و ئاڵۆزییەکانی بەغداوە، ژمارەی گیانلەدەستدان بۆ 25 کەس بەرزبووەتەوە.
رۆژی سێشەممە، 30ـی ئابی 2022، هەڵکەوت عەزیز، پەیامنێری رووداو کە رووماڵی گرژییەکانی بەغدا دەکات لەسەر زاری سەرچاوەیەک لە وەزارەتی تەندروستییەوە گوتی، بەهۆی بەردەوامیی گرژیی و پێکدادانی نێوان لایەنگرانی سەدر و هێزە ئەمنییەکان، تاوەکو ئێستا 25 کەس گیانیان لەدەستداوە و 380 کەسیش بریندار بوون.
سەرچاوە تەندروستییەکان باس لەوە دەکەن کە ئەوانەی گیانیان لەدەستداوە "لایەنگری موقتەدا سەدر، رێبەری رەوتی سەدرن".
هاوکات لە چەند شارێکی دیکەی باشووری عێراقیش لەوانە شارەکانی بەسرە، زیقار، بابل، کەربەلا و میسان خۆپێشاندانەکان گرژییان لێکەوتووەتەوە، بەڵام تاوەکو ئێستا هیچ ئامارێکی فەرمی لەبارەی زیانە گیانییەکان بڵاونەکراونەتەوە.
ئەوەش لەکاتێکدایە کە لەدوای ئەوەی رۆژی دووشەممە موقتەدا سەدر وازهێنانی هەمیشەیی خۆی لە کاری سیاسی راگەیاند، لایەنگرانی ئەو دەستیان بە خۆپێشاندان کرد و دواتر گرژیی کەوتە نێوان ئەوان، سوپای عێراق و چەکدارانی حەشدی شەعبی.
پێکدادانەکان تا راددەیەک لەدوای نیوەشەو هێوربوونەوەیان بەخۆیەوە بینی، بەڵام سەر لەبەیانیی ئەمڕۆ سێشەممە 30-08-2022، شانەی شانەى راگەیاندنی ئەمنیى عێراق گوتی، چوار مووشەک ئاراستەى ناوچەى سەوزى بەغداى پایتەخت کراون کە بارەگاى زۆربەى دامەزاوەکانى دەوڵەت و نێردە دیبلۆماسییەکانى تێدایە.
بەپێی شانەى راگەیاندنى ئەمنیى عێراق، مووشەکەکان لە شوێنێکى نیشتەجێبوون کەوتوونەتە خوارەوە و زیانی ماڵییان لێکەوتووەتەوە.
زیاتر بخوێنەوە
09:14
شانەى راگەیاندنى ئەمنی: چوار موشەک ئاراستەى ناوچەى سەوز کران
لە ناوچەی سەوز دووکەڵ لە پشتی خۆپێشاندەرانەوە بەرزدەبێتەوە، وێنە: AFP
رووداو - هەولێر
شانەى راگەیاندنى ئەمنیى عێراق دەڵێت، چوار مووشەک ئاراستەى ناوچەى سەوزى بەغداى پایتەخت کراون کە بارەگاى زۆربەى دامەزاوەکانى دەوڵەت و نێردە دیبلۆماسییەکانى تێدایە.
30ى ئابى 2022، شانەى راگەیاندنى ئەمنیى عێراق لەبارەی هێرشە مووشەکییەکەوە راگەیێندراوێکى بڵاوکردەوە گوتی، چوار موشەک ئاراستەى ناوچەى سەوزى بەغداى پایتەخت کراون و لە شوێنێکى نیشتەجێبوون کەوتوونەتەخوارەوە.
شانەى راگەیاندنى ئەمنیى عێراق لەبارەی زیانی مووشەکەکانەوە باسی لەوە کردووە، ئەو چوار مووشەکە لە هەردوو ناوچەى حەبیبییە و بەلەدیاتى رۆژهەڵاتى بەغداوە ئاراستەى ناوچەى سەوز کراون و بەهۆیانەوە زیانی ماددی بە چەند خانوو و باڵەخانەیەکی شوێنی نیشتەجێبوون کەوتووە.
ئاراستەکردنى ئەو مووشەکانە هاوکاتە لەگەڵ ئاڵۆزبوونى دۆخى ئەمنى لە بەغداى پایتەخت بەهۆى پێکدادانى نێوان گرووپى چەکداریى سەرایا سەلامى سەر بە رەوتى سەدر و گرووپە چەکدارەکانى دیکە.
رۆژی دووشەممە، 29-8-2022 موقتەدا سەدر، رێبەری رەوتی سەدر رایگەیاند، واز لە کاری سیاسی دەهێنێت، دوای ئەوەش لایەنگرانی بەلێشاو چوونە سەر شەقامەکان و داوای دەستلەکارکێشانەوەی حکومەت و "لابردنی گەندەڵکارانیان" دەکرد.
لە ئێوارەی رۆژی دووشەممە خۆپێشاندەران چوونە سەر بەشێک لە کۆشکەکانی ناوچەی سەوز، پاشان لە کۆشکی حکومەت هێزێکی ئەمنی بە چەک و گازی فرمێسکڕێژ بڵاوەی بە خۆپێشاندەران کرد و رووبەڕووبوونەوە روویدا کە بەهۆیەوە تاوەکو ئێستا لانی کەم 15 خۆپێشاندەر گیانیان لەدەستداوە و نزیکەی 300 خۆپێشاندەریش برینداربوون.
زیاتر بخوێنەوە
08:17
ئەمریکا: نابێت ئاسایش، سەقامگیری و سەروەریی عێراق بخرێتە مەترسییەوە
چەند گەنجێک لە بەردەم کۆشکی حکومەت لە ناوچەی سەوزی بەغدا، وێنە: AFP
رووداو-هەولێر
وەزارەتی دەرەوەی ئەمریکا سەرکۆنەی گرژییەکانی عێراق دەکات و داوا لە هەموو لایەنێک دەکات دان بە خۆیاندا بگرن و بەدوای رێگەی چارەسەردا بگەڕێن.
ڤێدانت پاتێڵ، جێگری گوتەبێژی وەزارەتی دەرەوەی ئەمریکا لە کۆنفرانسێکی رۆژنامەڤانیدا رایگەیاند، ئەوان ئاگاداری دۆخی عێراقن و گوتی، ئەو هەواڵانەی لەو بارەیەوە دەیانبیستن "بێزارکەرن".
جێگری گوتەبێژی وەزارەتی دەرەوەی ئەمریکا گوتیشی، ئاگاداری لەکارخستنی دامەزراوەکانی حکومەتن و "ئەوەش مەترسیی تووندوتیژی زیاددەکات"؛ ئاماژەی بەوەش کرد: "نابێت ئاسایش، سەقامگیری و سەروەریی عێراق بخرێتە مەترسییەوە."
جێگری گوتەبێژی وەزارەتی دەرەوەی ئەمریکا باسی ئاماژەی بەوە کە ئاگاداری ئەوەن گرژییەکان قوربانییان لێکەوتووەتەوە و لەو بارەیەوە گوتی، وەکو ئەمریکا "بەهەموو شێوەیەک بەکارهێنانی تووندوتیژی سەرکۆنە دەکەین".
رۆژی دووشەممە، 29-8-2022 موقتەدا سەدر، رێبەری رەوتی سەدر رایگەیاند، واز لە کاری سیاسی دەهێنێت، دوای ئەوەش لایەنگرانی بەلێشاو چوونە سەر شەقامەکان و داوای دەستلەکارکێشانەوەی حکومەت و "لابردنی گەندەڵکارانیان" دەکرد.
لە ئێوارەی رۆژی دووشەممە خۆپێشاندەران چوونە سەر بەشێک لە کۆشکەکانی ناوچەی سەوز، پاشان لە کۆشکی حکومەت هێزێکی ئەمنی بە چەک و گازی فرمێسکڕێژ بڵاوەی بە خۆپێشاندەران کرد و رووبەڕووبوونەوە روویدا کە بەهۆیەوە تاوەکو ئێستا لانی کەم 15 خۆپێشاندەر گیانیان لەدەستداوە و نزیکەی 300 خۆپێشاندەریش برینداربوون.
ڤێدانت پاتێڵ گوتیشی، ئێستا کاتی دانوستاندنە و "هانی هەموو ئەو لایەنانە دەدەین کە پەیوەندییان بە دۆخەکەوە هەیە دان بەخۆیاندا بگرن".
لەبارەی خۆپیشداندانیشەوە، پاتێل ئاماژەی بەوە کرد کە خۆپیشاندانی ئاشتییانە مافێکی بنچینەیی دیموکراسییەتە، بەڵام داواشی لە خۆپێشاندەران کرد رێز لە موڵک و دامەزراوەکانی حکومەتی عێراق بگرن.
دەقی گوتەکانی ڤێدانت پاتێڵ، جێگری گوتەبێژی وەزارەتی دەرەوەی ئەمریکا:
"هەواڵەکان لەبارەی گرژیی سەرتاسەریی عێراق بێزارکەرن، لەکاتێکدا رێگە بە دامەزراوەکانی عێراق نادرێت کار بکەن. ئەمەش مەترسیی تووندوتیژی زیاد دەکات. نابێت ئاسایش، سەقامگیریی و سەروەریی عێراق بخرێتە مەترسییەوە. ئێمە ئاگاداری هەواڵی هەڵکشانی گرژییەکان و لێکەوتنەوەی قوربانیانین و بە هەموو شێوەیەک بەکارهێنانی تووندوتیژی سەرکۆنە دەکەین. ئێستا کاتی دانوستاندنە و هەموو ئەو لایەنانە هاندەدەین کە پەیوەندییان بە دۆخەکەوە هەیە بۆ ئەوەی دان بەخۆیاندا بگرن و بەدوای رێگەی چارەسەردا بگەڕێن. مافی خۆپێشاندانی ئاشتییانە بنەمایەیکی بنچینەیی دیموکراسییەتە، بەڵام دەبێت خۆپێشاندەران رێز لە موڵک و دامەزراوەکانی حکومەتی عێراق بگرن کە هەر موڵکی خەڵکی عێراقن و خزمەت بەوان دەکەن."
زیاتر بخوێنەوە
08:05
بەهۆی ئاڵۆزییەکانەوە دەروازە سنوورییەکانی ئێران و عێراق داخران
دەروازەی نێودەوڵەتیی حاجی ئۆمەران
رووداو-هەولێر
بەهۆی ئاڵۆزیی شارەکانی عێراق دوای بڕیاری دەستلەکارکێشانەوەی موقتەدا سەدر لە سیاسەت، ئێران هەموو دەروازە سنوورییەکانی لەگەڵ عێراق داخست.
قایمقامێتیی شارەکانی سەر سنووری نێوان ئێران و عێراق رایانگەیاند، حکومەتی عێراق دوای دەستپێکردنی ناڕەزایەتییەکانی بەغدا و روودانی شەڕ و ئاڵۆزی لە هەندێک لە شارەکانی ئەو وڵاتە، بڕیاری قەدەخەی هاتووچۆی داوە و بەو هۆیەش لە ئێوارەی دووشەممەوە دەروازەی سنووریی ئەو پارێزگایانەی هاوسنووری عێراقن، هاتووچۆیان راگرتووە.
لەسەر ئەو بنچینەیەش دەروازە سنوورییەکانی مێهران لە پارێزگای ئیلام، قەسری شیرین لە پارێزگای کرماشان، چەزابە لە پارێزگای فارس و شەلەمچەش لە پارێزگای خوزستان داخران.
راگەیێندراوی بڵاوکراوەی ئەو شارانەی سنوور ئاماژە بەوە دەکەن، داخرانی دەروازە سنوورییەکان تەنیا تایبەتە بە زیارەتکاران و هیچ ئاماژەیەک بە داخرانیان بە رووی بارهەڵگرەکاندا نییە.
رۆژی دووشەممە، 29-8-2022 موقتەدا سەدر، رێبەری رەوتی سەدر رایگەیاند، واز لە کاری سیاسی دەهێنێت، دوای ئەوەش لایەنگرانی بەلێشاو چوونە سەر شەقامەکان و داوای دەستلەکارکێشانەوەی حکومەت و "لابردنی گەندەڵکارانیان" دەکرد.
لە ئێوارەی رۆژی دووشەممە خۆپێشاندەران چوونە سەر بەشێک لە کۆشکەکانی ناوچەی سەوز، پاشان لە کۆشکی حکومەت هێزێکی ئەمنی بە چەک و گازی فرمێسکڕێژ بڵاوەی بە خۆپێشاندەران کرد و رووبەڕووبوونەوە روویدا کە بەهۆیەوە تاوەکو ئێستا لانی کەم 15 خۆپێشاندەر گیانیان لەدەستداوە و نزیکەی 300 خۆپێشاندەریش برینداربوون.
زیاتر بخوێنەوە
01:13
حەشدی شەعبی هێز رەوانەی کەرکووک دەکات
رووداو
هەردی محەممەد، پەیامنێری رووداو رایگەیاند، حەشدی شەعبی "ژمارەیەکی زۆر" هێزی رەوانەی کەرکووک کردووە و لە سنووری نێوان پارێزگای کەرکووک لەگەڵ هەولێر و سلێمانی هێزەکانی جێگیر کردووە.
زیاتر بخوێنەوەوێنەی ناردنی هێزەکانی حەشدی شەعبی بۆ سنووری کەرکووک. pic.twitter.com/cactizljuE
— Rudaw (@Rudawkurdish) August 29, 2022
00:53
تورکیا داوا لە هاووڵاتییانی دەکات گەشت بۆ عێراق نەکەن
وەزارەتی دەرەوەی تورکیا داوا لە هاووڵاتییانی دەکات گەشت بۆ عێراق نەکەن و ئەوانەی لە عێراقیشن لە دۆخی نەخوازراودا پەیوەندی بە باڵیۆزخانە و کۆنسوڵخانەکانیانەوە بکەن.
لە راگەیێندراوێکدا وەزارەتی دەرەوەی تورکیا بە هاووڵاتییانی راگەیاندووە، ئەگەر "ناچارنەبن گەشت بۆ عێراق مەکەن."
وەزارەتی دەرەوەی تورکیا داوای لەو هاووڵاتییانەشی کردووە کە لە عێراقن، لە هەر دۆخێکی نەخوازراودا پەیوەندی بە هێڵە گەرمەکانی باڵیۆزخانەی تورکیا لە بەغدا و کۆنسوڵگەرییەکانیەوە بکەن، داوایشی کردووە، خۆیان لە گۆڕەپانی خۆپێشاندەران و ناوچە گەرمەکان دووربخەنەوە.
23:43
حکومەتی عێراق رۆژی سێشەممەی وەکو پشووی فەرمی راگەیاند
ئەمیندارێتیی گشتیی ئەنجوومەنی وەزیرانی عێراق رایگەیاند، بە فەرمانی مستەفا کازمی رۆژی سێشەممە 30-08-2022 لە سەرجەم پارێزگاکانی عێراق پشووی فەرمییە.
بەپێی راگەیێندراوی ئەمیندارێتییەکە، جگە لەوەی لە سەرجەم پارێزگاکانی عێراق پشووی فەرمی دەبێت، قەدەخەی هاتووچۆش بەردەوام دەبێت لە هەموو پارێزگاکانی عێراق.
23:00
محەممەد حەلبووسی: ئەوەى ئێستا پێی گەیشتووین ئاماژەیە بۆ مەترسییەکى گەورە
چەند خۆپێشاندەرێک لە بەغدا. وێنە: AFP
سەرۆکى پەرلەمانى عێراق رایگەیاند، ئەوەى ئێستا پێی گەیشتوون لە عێراق ئاماژەیە بۆ "مەترسییەکى گەورە" کە ناکرێت لێى بێدەنگ بن یان بەجێبهێڵدرێت تاوەکو زیاتر ئاڵۆز بێت.
محەممەد حەلبووسی، سەرۆکى پەرلەمانى عێراق راگەیێندراوێکی لەبارەی دۆخی عێراق بڵاوکردەوە و رایگەیاند، ئەوەى ئەمڕۆ پێی گەیشتوون ئاماژەیە بۆ "مەترسییەکى گەورە" و ئەوەش مایەى بێدەنگبوون یان بەجێهێشتنى نییە بۆئەوەى ئاڵۆزتر ببێت بەبێ دەستوەردانى کەسانى عاقڵ و کاریگەر لە سەرکردە سیاسی و ئایینى و عەشایەرییەکان، بە ئاراستەى هێورکردنەوە و دانبەخۆداگرتن و هۆشداریدان لە ئاژاوەگێڕى و رشتنى خوێنى هاووڵاتییان لەڕێگەى بەکارهێنانى چەک لەلایەن هەر لایەکەوە بێت.
سەرۆکی پەرلەمانی عێراق داواى لە هەموو لایەنەکان کردووە، ئاگرى ئەو "فیتنەگێڕییە" بکوژێننەوە و بگەنە لێکتێگەیشتن بۆ پاراستنى سەروەریى وڵات و سەقامگیرییەکەى و رۆچوون بەرەو پێکدادانێک کە هەموو لایەک تێیدا زەرەرمەند دەبن.
رۆژی 29ى ئابى 2022، موقتەدا سەدر، رێبەرى رەوتى سەدر بڕیاریدا دەستبەردارى کارى سیاسى ببێت و بەدوایدا لایەنگرانى رەوتەکەى لە بەغدا خۆپێشاندانیان کرد و چوونە نێو ناوچەى سەوز کە بارەگاى زۆربەى دامەزراوەکانى دەوڵەتى تێدایە.
دوای خۆپێشاندانی لایەنگرانی رەوتی سەدر، کە چوونە نێو کۆشکی کۆماریی عێراقیش، فەرماندەیی ئۆپەراسیۆنە هاوبەشەکانى عێراق لە کاژێر 15:30ى ئەمڕۆوە بڕیارى قەدەخەى هاتووچۆی لە بەغدا راگەیاند.
مستەفا کازمى، سەرۆکوەزیرانی عێراق داواى لە موقتەدا سەدر، رێبەرى رەوتى سەدر کرد خۆپێشاندەران لە دامەزراوە حکومییەکان بکشێنێتەوە و هەموولایەک دان بەخۆدا بگرن و دەڵێت، "پەرەسەندنە مەترسیدارەکانى عێراق ئاماژەن بۆ مەترسیداریى ئەنجامى بەردەوامیى ناکۆکییە سیاسییەکان."
22:44
مستەفا کازمی: سوپاسی داوای سەدر و هادی عامری دەکەم بۆ وەستاندنی تووندوتیژی
مستەفا کازمی، سەرۆکوەزیرانی عێراق رایدەگەیێنێت، سوپاسی داوای سەدر و هادی عامری دەکەم بۆ وەستاندنی تووندوتیژی، هەروەها هەموو ئەو لایەنانەی داوای ئارامییان کردووە.
21:50
کازمی: تەقەکردن و بەکارهێنانی گولـلەی زیندوو دژی خۆپێشاندەران بە هەموو شێوەیەک قەدەخەیە
لایەنگرێکی سەدر لە خۆپێشاندانەکانی بەغدا چەند قەوانێکی فیشەکی بەدەستەوە گرتووە. وێنە: AFP
مستەفا کازمی بڕیاریدا "لێکۆڵینەوەی خێرا" لە رووداوەکانی ناوچەی سەوز و سەرچاوەی تەقەکردنەکان بکرێت، کەمتەرخەمەکان دیاری بکەن و بەپێی یاسا لێپرسینەوەیان لەگەڵدا بکەن.
بەپێی راگەیێندراوێکی نووسینگەی سەرۆکوەزیرانی عێراق، مستەفا کازمی، فەرماندەی گشتیی هێزە چەکدارەکان، بڕیار دراوە بەوەی "تەقەکردن و بەکارهێنانی گولـلەی زیندوو لە دژی خۆپێشاندەران لە هەر لایەنێکی ئەمنی، یان سەربازی و چەکداری بە هەموو شێوەیەک قەدەخەیە."
فەرماندەی گشتیی هێزە چەکدارەکان و سەرۆکوەزیرانی عێراق جەختی لەوە کردووەتەوە، پێویستە وەزارەت و دەستە و دەزگا ئەمنی و سەربازییەکان، کار بە چوارچێوە و دەسەڵات و رێکخستنە رێگەپێدراوەکانیان بکەن.
کازمی هێزە ئەمنییەکان بە بەرپرس دەزانێت لە پاراستنی خۆپێشاندەران و دەڵێت، بە "هەر سەرپێچیکردنێکی رێنوێنیی ئەمنی، ئەوا رووبەڕووی لێپرسینەوەی یاسایی دەبنەوە."
هاوکات فەرماندەی گشتیی هێزە چەکدارەکانی عێراق داوایکردووە، "لێکۆڵینەوەی خێرا لە رووداوەکانی ناوچەی سەوز و سەرچاوەی تەقەکان بکرێت، کەمتەرخەمەکان دیاری بکەن و بەپێی یاسا لێپرسینەوەیان لەگەڵدا بکەن."
مستەفا کازمی داوایشی لە هاووڵاتییان کردووە پابەندی رێنوێنییە ئەمنییەکان و بڕیاری قەدەخەی هاتووچۆ بن.
21:40
نێچیرڤان بارزانی: هه‌رێمى كوردستان وه‌ك هه‌ميشه هاريكار ده‌بێت بۆ چاره‌سه‌رى و لێكگه‌يشتنى لايه‌نه عێراقييه‌كان
نێچیرڤان بارزانی، سەرۆکی هەرێمی کوردستان
سەرۆکی هەرێمی کوردستان پەیامێکی لەبارەی دۆخی عێراقەوە بڵاوکردەوە و داوا لە لایەنەکان دەکات دان بە خۆیاندا بگرن و "رێگە نەدەن دۆخەکە لەوە زیاتر لە کۆنترۆڵ دەربچێت."
نێچیرڤان بارزانی، سەرۆکی هەرێمی کوردستان لە پەیامەکەیدا "نیگەرانیی قووڵی" لەبارەی پێشهاتە سیاسی و ئەمنییەکانی ئەمڕۆی بەغدا و چەند شوێنێکی دیکەی عێراق دەربڕیوە و داوا لە هەموو لایەک دەکات "ئەوپەڕی دان بە خۆیاندا بگرن و رێگە نەدەن دۆخەکە لەوە زیاتر لە کۆنترۆڵ دەربچێت."
سەرۆکی هەرێمی کوردستان دەڵێت، خۆپێشاندانی ئاشتيیانه مافێكى ده‌ستووريى پارێزراوه، "به‌ڵام ئاڵۆزى و راگرتنى دامه‌زراوه‌كانى ده‌وڵه‌ت هيچ كێشه‌يه‌ك چاره‌سه‌ر ناكات و دۆخه‌كه ئاڵۆزتر ده‌كات، بۆيه ده‌بێت شكۆى دامه‌زراوه‌كانى ده‌وڵه‌ت پارێزراو بێت و رێگرى له ئه‌رك و كاره‌كانيان نه‌كرێت."
نێچیرڤان بارزانی بە پێویستی دەزانێت هێزه ئه‌منييه‌كان به‌وپه‌ڕى ئاگايى و وشيارييه‌وه مامه‌ڵه له‌گه‌ڵ دۆخه‌كه‌دا بكه‌ن و "رێگه نه‌درێت خۆپێشاندان و رووداوه‌كان ببنه هۆى تێكچوونى زياترى دۆخى ئه‌منى و كه‌وتنه‌وه‌ى قوربانى له‌نێوان عێراقييه‌كاندا."
لە بەشێکی دیکەی پەیامەکەیدا سەرۆکی هەرێمی کوردستان ئاماژەی بەوە کردووە، دۆخی وڵاتەکە "ئەوپەڕی دانایی و گەڕانەوە بۆ لۆژیک و دەستپێکردنی گفتوگۆیەکی نیشتمانی و بەرپرسانە و هاریکاریی هەمووانی دەوێت، بۆئەوەی عێراق لەو دۆخە سەختە رزگاری ببێت و کار لە کار نەترازێت."
هەروەها نێچیرڤان بارزانی جارێکی دیکە هەموو هێز و لایەنە پەیوەندیدارە عێراقییەکانی بانگهێشتی هەولێر کردووە بۆئەوەی کۆببنەوە و دەست بە گفتوگۆ بکەن، جەختی لەوەش کردووەتەوە کە "هه‌رێمى كوردستان وه‌كو هه‌ميشه هاريكار ده‌بێت بۆ چاره‌سه‌رى و لێكگه‌يشتنى لايه‌نه عێراقييه‌كان."
دەقی پەیامەکەی نێچیرڤان بارزانی، سەرۆکی هەرێمی کوردستان:
له نزيكه‌وه و به نيگه‌رانييه‌كى قووڵه‌وه له پێشهاته سياسى و ئه‌منييه‌كانى ئه‌مڕۆى به‌غدا و چه‌ند شوێنێکی دیکه‌ی وڵات ده‌ڕوانين. داوا له هه‌موو لايه‌ك ده‌كه‌ين ئه‌وپه‌ڕى دان به خۆياندا بگرن و ڕێگه نه‌ده‌ن دۆخه‌كه له‌وه زياتر له كۆنترۆڵ ده‌ربچێت.
خۆپيشاندانى ئاشتيانه مافێكى ده‌ستووريى پارێزراوه، به‌ڵام ئاڵۆزى و ڕاگرتنى دامه‌زراوه‌كانى ده‌وڵه‌ت هيچ كێشه‌يه‌ك چاره‌سه‌ر ناكات و دۆخه‌كه ئاڵۆزتر ده‌كات، بۆيه ده‌بێ شكۆى دامه‌زراوه‌كانى ده‌وڵه‌ت پارێزراو بێت و ڕێگرى له ئه‌رك و كاره‌كانيان نه‌كرێت.
هه‌روه‌ها له‌سه‌ر هێزه ئه‌منييه‌كان پێويسته به‌وپه‌ڕى ئاگايى و وشيارييه‌وه مامه‌ڵه له‌گه‌ڵ دۆخه‌كه‌دا بكه‌ن و ڕێگه نه‌درێت خۆپيشاندان و ڕووداوه‌كان ببنه هۆى تێكچوونى زياترى دۆخى ئه‌منى و كه‌وتنه‌وه‌ى قوربانى له‌نێوان عێراقييه‌كاندا.
دۆخى وڵات ئه‌وپه‌ڕى دانايى و گه‌ڕانه‌وه بۆ لۆژێك و ده‌سپێكردنى گفتوگۆيه‌كى نيشتمانى و به‌رپرسانه و هاريكاريى هه‌مووانى ده‌وێت بۆ ئه‌وه‌ى عێراق له‌و دۆخه سه‌خته ڕزگارى ببێت و كار له كار نه‌ترازێت.
دووپاتى ده‌كه‌ينه‌وه كه هه‌رێمى كوردستان وه‌ك هه‌ميشه هاريكار ده‌بێت بۆ چاره‌سه‌رى و لێكگه‌يشتنى لايه‌نه عێراقييه‌كان، بۆيه دووباره هه‌موو هێز و لايه‌نه په‌يوه‌نداره عێراقييه‌كان بانگهێشت ده‌كه‌ين بۆ ئه‌وه‌ى بێن له هه‌ولێر كۆببنه‌وه و ده‌ست به گفتوگۆيه‌كى جددى بۆ تێپه‌ڕاندنى ئه‌م دۆخه ئاڵۆزه‌ى وڵات بكه‌ن.
نێچيرڤان بارزانى
سه‌رۆكى هه‌رێمى كوردستان
2022/8/29
21:17
بەربژێرى پێشووى پۆستى سەرۆکوەزیران: زیانگەیاندن بە موقتەدا سەدر هێڵى سوورە
موقتەدا سەدر و محەممەد جەعفەر سەدر
بەربژێرى پێشووى هاوپەیمانیى رزگارکردنى نیشتمان بۆ پۆستى سەرۆکوەزیران هۆشداریی دایە نەیارانى رەوتى سەدر و رایگەیاند، "زیانگەیاندن بە موقتەدا سەدر هیڵى سوورە."
لە تویتێکدا محەممەد جەعفەر سەدر، بەربژێرى پێشووى رەوتى سەدر و هاوپەیمانیى رزگارکردنى نیشتمان بۆ پۆستى سەرۆکوەزیران هۆشداریى داوەتە نەیارانى رەوتەکە لەبارەى موقتەدا سەدر، سەرۆکى ئەو رەوتە.
محەمەد جەعفەر سەدر نووسیویەتى، "سەید موقتەدا سەدر سەرکردەمانە بۆ هەموو باشییەک، زیانگەیاندن پێى هێڵى سوورە، ئاگاداربن."
ئەو کاردانەوەیەى ناوبراو، کە ئامۆزاى موقتەدا سەدرە، لەدواى ئەوە دێت کە رێبەرى رەوتى سەدر بڕیاریدا لە پرۆسەى سیاسى بکشێتەوە و لایەنگرانى لە بەغداى پایتەخت و چەند پارێزگایەکى دیکەى عێراق دەستیان بە خۆپێشاندان کرد.
رۆژی 23ى ئایاری 2022 محەمەد جەعفەر سەدر، وەکو بەربژێرى رەوتى سەدر لەلایەن هاوپەیمانیى رزگارکردنى نیشتمان ناسێندرا، کە پارتى دیموکراتى کوردستان و هاوپەیمانیى سەروەری بەشداربوون تێیدا، بەرلەوەى لەگەڵ دەستلەکارکێشانەوەى پەرلەمانتارانى فراکسیۆنى سەدر، بەربژێرکردنى ئەویش بکشێندرێتەوە.
21:15
چوارچێوەى هاوئاهەنگى: داوا لە سەدر دەکەین بگەڕێتەوە بۆسەر مێزى گفتوگۆ
لایەنگرانی سەدر لە خۆپێشاندانەکانی بەغدا وێنەی رێبەرەکەیانیان بەرزکردووەتەوە. وێنە: AFP
هاوپەیمانیى چوارچێوەى هاوئاهەنگى داواى لە رەوتى سەدر کرد بگەڕێتەوە سەر مێزى گفتوگۆ بە مەبەستى گەیشتن بە لێکتێگەیشتنى هاوبەش، داواش لە ناوەندە ئایینى و سیاسییەکان دەکات دەستپێشخەرییان هەبێت بۆ رێگرى لە "فیتنەگێڕى."
لە راگەیێندراوێکدا هاوپەیمانیی چوارچێوەى هاوئاهەنگى داواى لە رەوتى سەدر کردووە، بگەڕێتەوە بۆسەر مێزى گفتوگۆ و کارکردن لەپێناو گەیشتن بە لێکتێگەیشتنى هاوبەش و گەیشتن بە نەخشەڕێیەکی روون بە پشتبەستن بە یاسا و دەستوور لەپێناو هێنانەدیی بەرژەوەندیى گەلى عێراق.
چوارچێوەى هاوئاهەنگى داوا لە هەموو ناوەندە سیاسی و ئاینییەکان دەکات، رۆڵ و دەستپێشخەرییان هەبێت لەپێناو دوورخستنەوەى "فیتنەگێڕى و زاڵکردنى زمانى دیالۆگ."
لە بەشێکى دیکەى راگەیێندراوەکەدا ئەوە خراوەتەڕوو، "پێویستە دامەزراوەکانى دەوڵەت و بەرژەوەندیى گشتى و تایبەت بپارێزرێت و پاڵپشتیى دەوڵەت و پاراستنى دەبین."
ئەو هەڵوێستەى چوارچێوەى هاوئاهەنگى لەدواى ئەوە هات کە ئەمڕۆ موقتەدا سەدر، رێبەرى رەوتى سەدر بڕیاریدا لە پرۆسەى سیاسى بکشێتەوە و لایەنگرانى لە بەغدا و چەند پارێزگایەکى دیکە دەستیان بە خۆپێشاندان کرد، بەڵام هێزە ئەمنییەکان رووبەڕووی خۆپێشاندەران بوونەوە و لە ئەنجامدا لانیکەم چوار خۆپێشاندەر کوژراون و دەیانی دیکەش بریندارن.
20:37
بەریتانیا داوای پاراستنی گیانی خۆپێشاندەران و باڵەخانە حکومییەکان دەکات
لایەنگرێکی سەدر لە خۆپێشاندانەکانی بەغدا ئاڵای عێراقی بەرزکردووەتەوە. وێنە: AFP
جێگری باڵیۆزخانەی بەریتانیا داوای پاراستنی گیانی خۆپێشاندەران و باڵەخانە حکومییەکانی عێراق دەکات.
جەیمس داونەر، جێگری باڵیۆزی بەریتانیا لە عێراق لە هەژماری تایبەتی خۆی لە تویتەر سەبارەت بە خۆپێشاندانەکان و ئاڵۆزییەکانی عێراق لە راگەیێندراوێکدا، نیگەرانیی وڵاتەکەیی بەرامبەر بە رووداوەکانی ئەمڕۆی عێراق دەربڕی، بەتایبەتی ئەو راپۆرتانەی باس لە قوربانی دەکەن.
جێگری باڵیۆزی بەریتانیا لە عێراق لە پەیامەکەیدا دەڵێت، "داوا لەوانە دەکەین کە لەسەر شەقامەکانن، خۆیان بەدووربگرن لە تووندوتیژی و دەبێت خۆپێشاندانەکان ئاشتییانە بن، چونکە عێراقییەکان شیاوی ئەوە نین وڵاتەکەیان بە شەڕ و تووندوتیژییەوە تێوەبگلێندرێت."
جەیمس داونەر ئاماژەی بەوەش کردووە، "عێراق پێویستی بەوەیە دامودەزگاکانی بە شێوەیەکی ئاسایی کار بکەن، تاوەکو بتوانن رووبەڕووی ئەو ئاڵنگارییانە ببنەوە و ئەو خزمەتگوزارییانەش پێشکێش بکەن کە لەپێناویدا دامەزراون، داوا لە سەرجەم خۆپێشاندەرانیش دەکەین خۆیان بەدووربگرن لەوەی هەڵبکوتنە سەر باڵەخانە حکومییەکان."
ئەو بەرپرسەی باڵیۆزخانەی بەریتانیا لە درێژەی پەیامەکەیدا ئەوەی خستووەتەڕوو، "هێزە شەرعییە ئەمنییەکان، تاکە هێزن دەتوانن گیانی هاووڵاتییانی عێراقی و باڵەخانە حکومییەکان بپارێزن. داوا لە سەرجەم لایەنەکان دەکەین دیالۆگ بکەنە کاری لەپێشینەیان بۆ گەیشتن بە چارەسەرێکی ئاشتییانە و یاساییانە لەپێناو گەلی عێراقدا."
رۆژی 29-08-2022 موقتەدا سەدر، رێبەری رەوتی سەدر لەڕێگەی تویتێکەوە رایگەیاند واز لە سیاسەت دەهێنێت. هەر دوای تویتەکە، لایەنگرانی رەوتی سەدر چوونە سەر شەقامەکانی ناوچەی سەوز. هێزە ئەمنییەکان رووبەڕووی خۆپێشاندەران بوونەوە و تاوەکو ئێستا لانیکەم چوار خۆپێشاندەر کوژراون.
18:56
پەیامی ئەمریکا بۆ لایەنەکانی عێراق: بە دیالۆگ جیاوازییەکان چارەسەر بکەن نەک رووبەڕووبوونەوە
باڵیۆزخانەی ئەمریکا لە عێراق داوای هێورکردنەوەی دۆخی عێراق دەکات و رایدەگەیێنێت، نابێت ئاسایشی وڵاتەکە بخرێتە ژێر مەترسییەوە.
لە راگەیێندراوێکدا باڵیۆزخانەی ئەمریکا لە بەغدا نیگەرانیی وڵاتەکەی لەبارەی رووداوەکانی ئەمڕۆی عێراق، بەتایبەت بەغدا، دەربڕی و دەڵێت، "ئەو راپۆرتانەی باس لە گرژیی دۆخەکە لە تەواوی عێراق دەکەن، مایەی دڵگرانییە، لەو کاتەی دامودەزگا عێراقییەکان رێگەیان پێنادرێت بە ئاسایی کار بکەن."
لە درێژەی راگەیێندراوەکەی باڵیۆزخانەی ئەمریکا لە بەغدا هاتووە، نیگەرانن لە ئاڵۆزبوونی دۆخەکە و داواش لە سەرجەم لایەنەکان دەکەن ئارامی بپارێزن و خۆیان بەدووربگرن لە هەر کردەوەیەک کە ببێتە هۆی دروستبوونی تووندوتیژیی زیاتر.
باڵیۆزخانەی ئەمریکا داوای ئەوەی کردووە کە ئاسایش، سەقامگیری و سەروەریی عێراق نەخرێتە مەترسییەوە و دەڵێت، "ئێستا کاتی دیالۆگە بۆ چارەسەرکردنی ناکۆکییەکان، نەک رووبەڕووبوونەوە."
هەر لەو راگەیێندراوەدا باڵیۆزخانەی ئەمریکا ئەوەی خستووەتەڕوو، مافی خۆپێشاندان پایەیەکی گرنگی دیموکراسییە، بەڵام پێویستە خۆپێشاندەران رێز لە دامودەزگاکانی حکومەتی عێراق بگرن، کە لەپێناو خزمەتکردنی گەلی عێراق دانراوە و دەبێت رێگەش بدرێت بە ئاسایی کار بکەن.
لەلایەکی دیکەوە، وەزارەتی دەرەوەی ئەمریکا رەتیدەکاتەوە باڵیۆزخانەیان لە بەغدا چۆڵ کرابێت.
گوتەبێژی وەزارەتی دەرەوەی ئەمریکا، سەبارەت بەو دەنگۆیانەی کە باس لە چۆڵکردنی باڵیۆزخانەکەیان دەکەن لە بەغدای پایتەخت رایگەیاند، ئەو دەنگۆیانە راست نین.
رۆژی دووشەممە 29-08-2022 موقتەدا سەدر، رێبەری رەوتی سەدر لەڕێگەی تویتێکەوە وازهێنانی خۆی لە پرۆسەی سیاسی راگەیاند، دواتر لایەنگرانی رەوتەکە لە بەغدا و پارێزگاکانی دیکەی عێراق دەستیان بە خۆپێشاندان کرد.
18:47
دەسەڵاتی فڕۆکەوانیی مەدەنیی عێراق بۆ رووداو: هیچ گەشتێک رانەگیراوە
گوتەبێژی دەسەڵاتی فڕۆکەوانیی مەدەنیی عێراق بە تۆڕی میدیایی رووداوی راگەیاند، ئەو دۆخەی ئێستای عێراق کاریگەریی لەسەر گەشتە ئاسمانییەکان نەبووە و بەپێی خشتەی خۆیان بەڕێوەدەچن.
جیهاد کازم، گوتەبێژی دەسەڵاتی فڕۆکەوانیی مەدەنیی عێراق ئاماژەی بەوەش کرد، هیچ گەشتێکی ئاسمانی رانەگیراوە و گەشتەکانی فڕۆکەخانەی بەغدا بەردەوامن.
18:39
بەرهەم ساڵح: دۆخەکە لە دەست دەربچێت هەموومان زیانمەند دەبین
بەرهەم ساڵح، سەرۆککۆماری عێراق
سەرۆککۆماری عێراق پەیامێکی لەبارەی خۆپێشاندانەکان بڵاوکردەوە و رایگەیاند، دۆخەکە وا دەخوازێت هەمووان دان بە خۆیاندا بگرن و "ئەگەر لەدەست دەربچێت هەموومان زیانمەند دەبین."
بەرهەم ساڵح، سەرۆککۆماری عێراق لە پەیامەکەیدا داوای لە هەموو لایەنەکان کردووە، پابەندبن بە ئارامی و دان بە خۆیاندا بگرن بۆ رێگریکردن لە پەرەسەندنی دۆخەکە و دەشڵێت، ئەگەر دۆخەکە "لەدەست دەربچێت، هەموومان زیانمەند دەبین."
سەرۆککۆماری عێراق ئاماژەی بەوەش کردووە، خۆپێشاندانی ئاشتییانە و دەربڕینی بیروڕا مافێکی دەستووریی گەرەنتیکراوە، بەڵام تێکدانی دامودەزگاکانی دەوڵەت بە "مەترسیدار" ناودەبات و دەڵێت، "وڵات و بەرژەوەندییەکانی هاووڵاتییان دەخاتە مەترسییەکی گەورەوە."
رۆژی 29ى ئابى 2022، موقتەدا سەدر، رێبەرى رەوتى سەدر بڕیاریدا دەستبەردارى کارى سیاسى ببێت و بەدوایدا لایەنگرانى رەوتەکەى لە بەغدا خۆپێشاندانیان کرد و چوونە نێو ناوچەى سەوز کە بارەگاى زۆربەى دامەزراوەکانى دەوڵەتى تێدایە.
دوای خۆپێشاندانی لایەنگرانی رەوتی سەدر، کە چوونە نێو کۆشکی کۆماریی عێراقیش، فەرماندەیی ئۆپەراسیۆنە هاوبەشەکانى عێراق لە کاژێر 15:30ى ئەمڕۆوە بڕیارى قەدەخەى هاتووچۆی لە بەغدا راگەیاند، دواتریش قەدەخەی هاتووچۆی لە سەرجەم پارێزگاکانی عێراق لە کاژێر 19:00ی ئەمڕۆوە تاوەکو کاتێکی نادیار راگەیاند.
پێشتر مستەفا کازمى، فەرمانی دا بە راگرتنى کۆبوونەوەکانى ئەنجوومەنى وەزیران پاش ئەوەى خۆپێشاندەرانى لایەنگرى رەوتى سەدر چوونە نێو ناوچەى سەوز؛ داواى لە موقتەدا سەدریش کرد خۆپێشاندەران لە دامەزراوە حکومییەکان بکشێنێتەوە و هەموولایەک دان بەخۆدا بگرن، گوتیشی، "پەرەسەندنە مەترسیدارەکانى عێراق ئاماژەن بۆ مەترسیداریى ئەنجامى بەردەوامیى ناکۆکییە سیاسییەکان."
18:14
ئۆپەراسیۆنە هاوبەشەکان بۆ هاووڵاتییانی عێراق: پەیوەست بن بە بڕیارى قەدەخەى هاتووچۆ
فەرماندەى ئۆپەراسیۆنە هاوبەشەکانى عێراق داوا لە هاووڵاتییان دەکات پەیوەست بن بە بڕیارى قەدەخەى هاتووچۆ و دووربکەونەوە لە "پڕوپاگەندەى فریودەر."
فەرماندەیی ئۆپراسیۆنە هاوبەشەکانى عێراق رایگەیاند، پاراستنى دۆخى ئەمنى بەرپرسیارێتیى هەموولایەکە و داوا لە هاووڵاتییان دەکات "هاوکاریى تەواوى دەزگا ئەمنییەکان بکەن و پەیوەست بن بە بڕیارى قەدەخەى هاتووچۆوە و خۆیان بەدوور بگرن لە پڕوپاگەندەى فریودەر، کە هۆکارى ئاڵۆزبوونى زیاترى دۆخەکەیە".
ئەو فەرماندەییە ئاماژە بەوەش کردووە، هێزە ئەمنییەکان ئێستا کار دەکەن بۆ پاراستنى ئاسایش و سەقامگیرى.
17:32
قەدەخەی هاتووچۆ لە هەموو پارێزگاکانی عێراق راگەیێندرا
خۆپێشاندەران لەبەردەم کۆشکی حکومی لە بەغدا. وێنە: AFP
دوای خۆپێشاندانی لایەنگرانی رەوتی سەدر لە بەغدا و چەند شارێکی دیکەی عێراق، فەرماندەیی ئۆپەراسیۆنە هاوبەشەکانى عێراق قەدەخەى هاتووچۆى لە سەرجەم شارەکانى عێراق راگەیاند.
بەگوێرەى بڕیارەکەی فەرماندەیی ئۆپەراسیۆنە هاوبەشەکانی عێراق، قەدەخەى هاتووچۆ لە کاژێر 19:00ی ئەمڕۆوە لە سەرجەم شارەکانى عێراق دەچێتە واری جێبەجێکردنەوە و کاتی کۆتاییهاتنی قەدەخەکەش دیار نییە.
ئەو بڕیارە لەدواى ئەوە بوو کە لایەنگرانى رەوتى سەدر لە بەغدا و چەند شارێکى دیکە دەستیان بە خۆپێشاندان کرد و هەڵیانکوتایە سەر کۆشکی کۆماری و گرژی و ئاڵۆزی لە خۆپێشاندانەکاندا کەوتەوە.
پێشتر فەرماندەیی ئۆپەراسیۆنە هاوبەشەکانى عێراق لە کاژێر 15:30ى ئەمڕۆوە بڕیارى قەدەخەى هاتووچۆ لە بەغداى پایتەختی عێراق راگەیاند.
ئەو خۆپێشاندانە لەدواى ئەوە بوو کە موقتەدا سەر، رێبەرى رەوتى سەدر بڕیاریدا کە دەستبەرداى کارى سیاسى ببێت.
بەپێی زانیارییەکانی هەڵکەوت عەزیز، پەیامنێری رووداو لە بەغدا، لەبەردەم کۆشکی حکومی لە بەغدا تاوەکو ئێستا دوو خۆپێشاندەر کوژراون و ژمارەیەکیش لە خۆپێشاندەران بریندار بوون.
دوای بڕیاری وازهێنانی سەدر لە سیاسەت، نووسینگەی سەدر لە تویتێکدا سێ بڕیاری رێبەری رەوتەکەی بڵاوکردەوە و تێیدا ئاماژەی بەوە داوە، بەشداریکردن لە کاری سیاسی، حکومی و هەموو دامەزراوە و دەزگاکانی سەر بە حکومەت بە ناوی رەوتی سەدرەوە بە هەموو شێوەیەک قەدەخەیە.
لیژنەی ناوەندی خۆپێشاندانەکانی ناوچەی سەوزی بەغدا ئەمڕۆ هەڵپەساردنی کارەکانی راگەیاند، دوای ئەوەی موقتەدا سەدر، رێبەری رەوتی سەدر وازهێنانی لە کاری سیاسی راگەیاند.
هەر بەهۆی خۆپێشاندانی لایەنگرانی سەدر لە ناوچەی سەوزی بەغدا و پارێزگاکانی دیکەی عێراق، وەزارەتى پەروەردەى عێراق بڕیاریدا تاقیکردنەوەکانى خولى دووەمى خوێندنى سەرەتایی و ناوەندی بۆ کاتێکى نادیار دوابخات.
هاوکات مستەفا کازمى داواى لە موقتەدا سەدر، رێبەرى رەوتى سەدر کردووە خۆپێشاندەران لە دامەزراوە حکومییەکان بکشێنێتەوە و هەموولایەک دان بەخۆدا بگرن و دەڵێت، "پەرەسەندنە مەترسیدارەکانى عێراق ئاماژەن بۆ مەترسیداریى ئەنجامى بەردەوامیى ناکۆکییە سیاسییەکان."
17:03
وەزارەتی پەروەردەی عێراق تاقیکردنەوەکانی خولی دووەم بۆ کاتێکی نادیار دوادەخات
هۆڵێکی تاقیکردنەوە لە قوتابخانەیەکی عێراق
بەهۆی خۆپێشاندانی لایەنگرانی سەدر لە ناوچەی سەوزی بەغدا و پارێزگاکانی دیکە، وەزارەتى پەروەردەى عێراق تاقیکردنەوەکانى خولى دووەمى خوێندنى سەرەتایی و ناوەندیی بۆ کاتێکى نادیار دواخست.
وەزارەتى پەروەردەى عێراق رایگەیاند، بڕیاری داوە تاقیکردنەوەى وزاریى خولى دووەمى خوێندنى سەرەتایی و ناوەندى بۆ ساڵى خوێندنى 2021 - 2022 بۆ کاتێکى نادیار دوابخات.
لە راگەیێندراوەکەى وەزارەتى پەروەردەدا هاتووە، "ئەو بڕیارە بەهۆى ئەو دۆخە لەناکاوەیە کە وڵاتەکەمان پێیدا تێپەڕدەبێت و بڕیارەکە لەپێناو پاراستنى گیانى خوێندکاراندا بووە."
ئەمڕۆ 29ى ئابى 2022، موقتەدا سەدر، رێبەرى رەوتى سەدر، بڕیاریدا دەستبەردارى کارى سیاسى ببێت و بەدوایدا لایەنگرانى رەوتەکەى لە بەغدا خۆپێشاندانیان کرد و چوونە نێو کۆشکی کۆماریی عێراق لە ناوچەی سەوزی بەغدا.
دوای خۆپێشاندانی لایەنگرانی رەوتی سەدر، فەرماندەیی ئۆپەراسیۆنە هاوبەشەکانى عێراق لە کاژێر 15:30ى ئەمڕۆوە بڕیارى قەدەخەى هاتووچۆی لە بەغدا راگەیاند.
مستەفا کازمی، سەرۆکوەزیرانی عێراق لە راگەیێندراوێکدا داوای لە موقتەدا سەدر کردووە، داوا لە لایەنگرانی رەوتەکەی بکات ناوچەی سەوز جێبهێڵن.
17:00
یونامی لەبارەی دۆخی عێراقەوە: "زۆر مەترسیدارە"
خۆپێشاندەران لەنێو کۆشکی کۆماریی عێراق. وێنە: AFP
نوێنەرایەتیی رێکخراوی نەتەوە یەکگرتووەکان لە عێراق - یۆنامی داوا لە خۆپێشاندەران دەکات بە زووترین کات لە ناوچەی سەوز بکشێنەوە و سەرجەم باڵەخانە حکومییەکان چۆڵ بکەن و رێگە بە حکومەت بدەن بەردەوام بێت لەسەر کارەکانیان کە لە خزمەت گەلی عێراق دایە، دۆخەکەش بە "زۆر مەترسیدار" ناودەبات.
یونامی لە راگەیێندراوێکدا، هەڵکوتانە سەر کۆشکی کۆماریی عێراق و چوونە نێو ناوچەی سەوز لەلایەن خۆپێشاندەرانەوە، بە "پێشهاتێکی مەترسیدار" ناوبرد و داوای کرد دامودەزگاکانی حکومەت لە هەر بارودۆخێکدا بن، دەبێت بێ ئاڵنگاری بتوانن کارەکانیان بکەن و رێز لە دەستوور بگیرێت.
هاوکات یونامی داوای لە خۆپێشاندەران کردووە، دان بە خۆیاندا بگرن و دۆخەکە بە هێمنی بهێڵنەوە، هاوئاهەنگی لەگەڵ هێزە ئەمنییەکان بکەن و خۆیان بەدووربگرن لە هەر کارێک کە ببێتە هۆی زیاتر ئاڵۆزبوونی رەوشەکە.
لە درێژەی راگەیێندراوەکەدا، نوێنەرایەتیی نەتەوە یەکگرتووەکان لە عێراق داوا لە لایەنە سیاسییەکانیش دەکات کار بکەن بۆ هێورکردنەوەی دۆخەکە و بگەڕێنەوە بۆ دیالۆگ کە تاکە رێگەیە بۆ چارەسەرکردنی جیاوازییەکان و دەشڵێت، نابێت عێراق بکرێتە دیلی دەستی دۆخێکی نادیار و ناسەقامگیر، پێیوایە کە "ئێستا چارەنووسی دەوڵەت لە مەترسیدایە."
رۆژی دووشەممە موقتەدا سەدر، رێبەری رەوتی سەدر لە تویتێکدا وازهێنانی خۆی لە کاری سیاسی راگەیاند، دوای ئەوەش لایەنگرانی رەوتەکە بە لێشاو روویان کردە ناوچەی سەوز و کۆشکی کۆماریی عێراق و هێزە ئەمنییەکانیش رێگرییان لێکردن و لە ئەنجامیشدا گرژی و ئاڵۆزی دروست بوو.
16:59
لە خۆپێشاندانەکانی بەغدا گرژیی دروست دەبێت و تەقە دەکرێت
هەڵاتنی خۆپێشاندەران لە کۆشکی حکومی لە بەغدا. وێنە: AFP
پەیامنێری رووداو لە بەغدا رایگەیاند، لە باڵەخانەی حکومی لە بەغدا رووبەڕووبوونەوەی بەهێز لە نێوان خۆپێشاندەران و هێزە ئەمنییەکان دروستبووە و هێزە ئەمنییەکان بە گازی فرمێشکڕێژ و گوللـە رووبەڕووی خۆپیشاندەران بوونەوە.
هەڵکەوت عەزیز، پەیامنێری رووداو لە بەغدا لەنێو لایەنگرانی رەوتی سەدرەوە گوتی، هێزە ئەمنییەکان هەوڵ دەدەن کە خۆپێشاندەران لەنێو کۆشکی حکومی وەدەر بنێن، لەبەر ئەوە گازی فرمێشکڕێژ و گوللـە بەکاردەهێنن.
بەگوێرەی ئەو دیمەنانەی کە پەیامنێری رووداو لە بەردەم کۆشکی حکومییەوە دەیگواستەوە، ژمارەیەک خۆپێشاندەر بە گوللـەی هێزە ئەمنییەکان برینداربوون.
زیاتر بخوێنەوە
16:56
لیژنەی ناوەندی خۆپێشاندانەکانی ناوچەی سەوز کارەکانی هەڵپەسارد
خۆپێشاندانی لایەنگرانی سەدر لە بەغدا. وێنە: AFP
لیژنەی ناوەندی خۆپێشاندانەکانی ناوچەی سەوزی بەغدا هەڵپەساردنی کارەکانی راگەیاند، دوای ئەوەی موقتەدا سەدر، رێبەری رەوتی سەدر وازهێنانی لە کاری سیاسی راگەیاند.
لیژنەی ناوەندی خۆپێشاندانەکانی ناوچەی سەوزی بەغدا لە راگەیێندراوێکدا رایگەیاند: "بۆ برایانی مانگرتووی بەڕێز دوای کۆتاییهێنانی ئەو راسپاردە پیرۆزەیان، داوای لێبووردن دەکەین، ئەگەر هەر کەموکوڕییەکان هەبووبێت لە رۆژانی رابردوودا. بە درێژایی ماوەی رابردوو پارێزگاریمان لە خۆپێشاندانی ئاشتییانە کردووە، ئێستاش پابەندین بە بڕیاری سەید موقتەدا سەدر بە هەڵپەساردنی کاری لیژنەکە."
دوای کشانەوەی کازم ئەلحائیری کە بە مەرجەعی ئایینی رەوتی سەدر ناسراوە لە ئەرکەکەی، رێبەری رەوتی سەدر رایگەیاند، "بڕیارمدا بۆ یەکجارەکی دەستوەردان لە کاروباری سیاسی بایکۆت بکەم و زۆربەی دامەزراوەکانی رەوتی سەدر دابخەم."
ئەم هەڵوێستەی رێبەری رەوتی سەدر لە کاتێکدایە، لە کۆتایی مانگی رابردووەوە لایەنگرانی رەوتی سەدر لە باڵەخانەی پەرلەمانی عێراق مانیان گرتووە و داوای هەڵوەشاندنەوەی پەرلەمان و بەڕێوەچوونی هەڵبژاردنێکی دیکەی پێشوەخت دەکەن. هاوکات، چوارچێوەی هاوئاهەنگیی شیعە، کە خاوەنی گەورەترین فراکسیۆنە لە پەرلەمان، سوورە لەسەر پێکهێنانی حکومەتی نوێ و گۆڕینی یاسا و کۆمیسیۆنی هەڵبژاردنەکان پێش بەڕێوەچوونی هەڵبژاردنێکی دیکە.
دوای بڕیاری وازهێنانی سەدر لە سیاسەت، نووسینگەی سەدر لە تویتێکدا سێ بڕیاری رێبەری رەوتەکەی بڵاوکردەوە و تێیدا ئاماژەی بەوە داوە، بەشداریکردن لە کاری سیاسی، حکومی و هەموو دامەزراوە و دەزگاکانی سەر بە حکومەت بە ناوی رەوتی سەدرەوە بە هەموو شێوەیەک قەدەخەیە.
لە بەشێکی دیکەی تویتەکەدا هاتووە، بەرزکردنەوەی هەموو دروشمێکی سیاسی بە ناوی رەوتی سەدر قەدەخەیە، جگە لەوەش نابێت هیچ راگەیاندنێک و پێگەیەکی تۆڕە کۆمەڵایەتییەکان بە ناوی رەوتی سەدرەوە کار بکات.
زیاتر بخوێنەوە
16:45
مستەفا کازمى داوا لە سەدر دەکات خۆپێشاندەران بکشێنێتەوە
خۆپێشاندەران لەنێو کۆشکی کۆماریی عێراق. وێنە: AFP
مستەفا کازمى داواى لە موقتەدا سەدر، رێبەرى رەوتى سەدر کرد خۆپێشاندەران لە دامەزراوە حکومییەکان بکشێنێتەوە و هەموولایەک دان بەخۆدا بگرن و دەڵێت، "پەرەسەندنە مەترسیدارەکانى عێراق ئاماژەن بۆ مەترسیداریى ئەنجامى بەردەوامیى ناکۆکییە سیاسییەکان."
مستەفا کازمى، سەرۆکوەزیرانى عێراق رایگەیاند، "پەرەسەندنە مەترسیدارەکان کە لە عێراق روویاندا، لە چوونى خۆپێشاندەران بۆ ناو ناوچەى سەوز و چوونە نێو دامەزراوە حکومییەکان، ئاماژەن بۆ مەترسیداریى دەرهاویشتەکانى بەردەوامیى ناکۆکییە سیاسییە کەڵەکەبووەکان."
سەرۆکوەزیرانی عێراق، کە هاوکات فەرماندەى گشتیى هێزە چەکدارەکانی عێراقیشە، داواى لە خۆپێشاندەران کرد دەستبەجێ ناوچەى سەوز چۆڵ بکەن و داواشی لە هەموو لایەک کرد دان بەخۆیاندا بگرن.
کازمى داواى لە موقتەدا سەدر، رێبەرى رەوتى سەدر کرد، داوا لە خۆپێشاندەران بکات لە دامەزراوە حکومییەکان بکشێنەوە و گوتیشى، "دەستدرێژیکردنە سەر دامەزراوە حکومییەکان کارێکى سەرکۆنەکراو و بەدەرن لە یاسا."
رۆژی 29ى ئابى 2022، موقتەدا سەدر، رێبەرى رەوتى سەدر بڕیاریدا دەستبەردارى کارى سیاسى ببێت و بەدوایدا لایەنگرانى رەوتەکەى لە بەغدا خۆپێشاندانیان کرد و چوونە نێو ناوچەى سەوز کە بارەگاى زۆربەى دامەزراوەکانى دەوڵەتى تێدایە.
دوای خۆپێشاندانی لایەنگرانی رەوتی سەدر، کە چوونە نێو کۆشکی کۆماریی عێراقیش، فەرماندەیی ئۆپەراسیۆنە هاوبەشەکانى عێراق لە کاژێر 15:30ى ئەمڕۆوە بڕیارى قەدەخەى هاتووچۆی لە بەغدا راگەیاند.
پێشتر مستەفا کازمى، فەرمانی دا بە راگرتنى کۆبوونەوەکانى ئەنجوومەنى وەزیران پاش ئەوەى خۆپێشاندەرانى لایەنگرى رەوتى سەدر چوونە نێو ناوچەى سەوز.
16:35
لایەنگرانى رەوتى سەدر لە پارێزگاى بەسرە دەستیان بە خۆپێشاندان کرد
خۆپێشاندان لە بەسرە
لایەنگرانى رەوتى سەدر لە پارێزگاى بەسرە خۆپێشاندانیان دەستپێکرد، ئەوەش وەکو پاڵپشتییەک بۆ خۆپێشاندانى لایەنگرانى دیکەى ئەو رەوتە لە بەغدا.
رۆژی 29ى ئابى 2022 لایەنگرانى رەوتى سەدر لە ناوچەى توێسەى ناوەندى شارى بەسرە کۆبوونەوە، کە پێگەى ئەو رەوتەیە و دەستیان بە خۆپێشاندان کرد.
ئەو هەنگاوە لە کاتێکدایە کە لە بەغدا لایەنگرانى رەوتى سەدر خۆپێشاندانیان کرد و چوونە نێو ناوچەى سەوز وەکو هاوسۆزییەک بۆ بڕیارى دەستبەرداربوونى موقتەدا سەدر، رێبەرى رەوتەکەیان لە کارى سیاسى.
ئەمڕۆ موقتەدا سەدر، رێبەرى رەوتى سەدر لە تویتێکدا رایگەیاند کە دەستبەردارى کارى سیاسى دەبێت.
بۆ رێگرى لە تەشەنەسەندنى خۆپێشاندانى لایەنگرانى رەوتى سەدر، ئۆپەراسیۆنە هاوبەشەکانى عێراق بڕیاریدا قەدەخەى هاتووچۆ لە بەغدا رابگەیێنێت.
16:05
مستەفا کازمى کۆبوونەوەکانى ئەنجوومەنى وەزیرانى رادەگرێت
خۆپێشاندەران لە ناوچەی سەوز
مستەفا کازمى، سەرۆکوەزیرانى عێراق فەرمانیدا بە راگرتنى کۆبوونەوەکانى ئەنجوومەنى وەزیران لەپاش ئەوەى خۆپێشاندەرانى لایەنگرى رەوتى سەدر چوونە نێو ناوچەى سەوز.
رۆژی 29ى ئابى 2022 مستەفا کازمى، سەرۆکوەزیرانى عێراق لە راگەیێندراوێکدا فەرمانیدا بە راگرتنى کۆبوونەوەکانى ئەنجوومەنى وەزیران تاوەکو کاتێکى نادیار. هۆکاری بڕیارەکەش چوونی لایەنگرانی رەوتی سەدرە بۆ نێو ناوچەی سەوز.
ئەو بڕیارەى مستەفا کازمى بەر لە رۆژێک دێت لە کۆبوونەوەى هەفتانەى ئەنجوومەنى وەزیران کە هەموو هەفتەیەک لە رۆژی سێشەممەدا دەکرێت.
ئەمڕۆ 29ى ئابى 2022، موقتەدا سەدر، رێبەرى رەوتى سەدر، بڕیاریدا دەستبەردارى کارى سیاسى بێت و بەدواییدا لایەنگرانى رەوتەکەى لە بەغدا بە تایبەتیش لە ناوچەی سەوز دەستیان بە خۆپێشاندان کرد و چوونە سەر کۆشکی کۆماری.
دوای خۆپێشاندانی لایەنگرانی سەدر، فەرماندەیی ئۆپەراسیۆنە هاوبەشەکانى عێراق لە کاژێر 3:30ى ئەمڕۆوە بڕیارى قەدەخەى هاتووچۆ لە بەغدا راگەیاند.
15:26
نووسینگەی سەدر: بەشداریکردن لە کاری سیاسی و حکومی بە ناوی رەوتی سەدرەوە قەدەخەیە
خۆپێشاندانی لایەنگرانی رەوتی سەدر. وێنە: AA
رووداو دیجیتاڵ
دوای بڕیاری وازهێنانی سەدر لە سیاسەت، نووسینگەی سەدر لە تویتێکدا سێ بڕیاری رێبەری رەوتەکەی بڵاوکردەوە و تێیدا ئاماژە بەوە دراوە، بەشداریکردن لە کاری سیاسی، حکومی و هەموو دامەزراوە و دەزگاکانی سەر بە حکومەت بە ناوی رەوتی سەدرەوە بە هەموو شێوەیەک قەدەخەیە.
رۆژی دووشەممە 29-8-2022، موقتەدا سەدر، رێبەری رەوتی سەدر لە هەژماری خۆیدا لە تویتەر رایگەیاند، "بڕیارمدا بۆ یەکجارەکی دەستوەردان لە کاروباری سیاسی بایکۆت بکەم و زۆربەی دامەزراوەکانی رەوتی سەدر دابخەم."
لە بەشێکی دیکەی تویتەکەی نووسینگەی سەدردا هاتووە، بەرزکردنەوەی هەموو درووشمێکی سیاسی بە ناوی رەوتی سەدر قەدەخەیە، جگە لەوەش نابێ هیچ راگەیاندنێک و پێگەیەکی تۆڕە کۆمەڵایەتییەکان بە ناوی رەوتی سەدرەوە کار بکات.
ئەم هەڵوێستەی رێبەری رەوتی سەدر لە کاتێکدایە، لە کۆتایی مانگی رابردووەوە لایەنگرانی رەوتی سەدر لە باڵەخانەی پەرلەمانی عێراق مانیان گرتووە و داوای هەڵوەشاندنەوەی پەرلەمان و بەڕێوەچوونی هەڵبژاردنێکی دیکەی پێشوەخت دەکەن. هاوکات، چوارچێوەی هاوئاهەنگیی شیعە، کە خاوەنی گەورەترین فراکسیۆنە لە پەرلەمان و رکابەری رەوتی سەدرە، سوورە لەسەر پێکهێنانی حکومەتی نوێ و گۆڕینی یاسا و کۆمیسیۆنی هەڵبژاردنەکان پێش بەڕێوەچوونی هەڵبژاردنێکی دیکە.
رێبەری رەوتی سەدر هەر لە تویتەکەیدا دەڵێت: "من هیچ رۆژێک داوای پیرۆزی و پێگەی زانایی و سەرکردایەتیم نەکردووە، بەڵکو تەنیا بانگەشە بۆ چاکە و نەفرەت لە خراپە دەکەم، چارەنووسی بابەتەکانیش لای خودایە." موقتەدا سەدر دڵنیاییش دەدات: "تەنیا ویستم شتە چەوتەکان راستبکەمەوە کە لایەنە سیاسییە شیعەکان هۆکاری سەرەکیی بوون، چونکە ئەوان زۆرینەن. ویستم تەنیا لە گەلی خۆیان نزیکیان بکەمەوە و هەست بە نەهامەتییەکەی بکەن."
هەروەها لەبارەی کشانەوەی کازم ئەلحائیری کە بە مەرجەعی ئایینی رەوتی سەدر ناسراوە موقتەدا سەدر رایگەیاند، "هەرچەندە باوەڕم وایە کە مەرجەع [ئەلحائیری] بە ویستی خۆی نەکشاوەتەوە و راگەیێندراوەکەشی کە بڵاوکرایەوە بە هەمان شێوە، بەڵام هەر خۆم پێشتر بڕیارمدابوو دەستوەردان لە کاروباری سیاسیدا نەکەم."
14:59
ئۆپەراسیۆنە هاوبەشەکان بۆ خۆپێشاندەران: دەستبەجێ لە ناوچەی سەوز بکشێنەوە
لایەنگرانی سەدر لە ناوچەی سەوز. وێنە: AA
فەرماندەیی ئۆپەراسیۆنە هاوبەشەکانی عێراق راگەیێندراوێکی بڵاوکردەوە و داوای لە خۆپێشاندەران کرد، دەستبەجێ لە ناوچەی سەوز بکشێنەوە.
فەرماندەیی ئۆپەراسیۆنە هاوبەشەکانی عێراق راگەیێندراوێکی بڵاویکردەوە تێیدا دەڵێت، هێزە ئەمنییەکان داوا لە خۆپێشاندەران دەکەن، دەستبەجێ لە ناوچەکانی سەوز بکشێنەوە. دووپاتی دەکەنەوە، کە پابەندی ئەو پەڕی دان بەخۆ داگرتن و مامەڵەی برایانەن، بۆ ئەوەی رێگری بکەن لە پێکدادان، یان خوێنڕشتنی عێراقییەکان.
فەرماندەیی ئۆپەراسیۆنە هاوبەشەکانی عێراق دووپاتیدەکاتەوە، هێزە ئەمنییەکان بەرپرسن لە پاراستنی دام و دەزگا حکومییەکان و نێردە دیپلۆماسییە نێودەوڵەتییەکان و موڵک و ماڵی گشتی و تایبەتی. بەشێوەیەکی ئاشتییانە و بەپێی دەستوور و یاساکان مامەڵە لەگەڵ خۆپێشاندانی ئاشتییانە دەکەن. هێزە ئەمنییەکانیش ئەرکی خۆیان بەجێدەگەیێنن لە پاراستنی ئاسایش و سەقامگیریی.
14:51
لە بەغدا قەدەخەی هاتووچۆ رادەگەیێندرێت
فەرماندەیی ئۆپەراسیۆنە هاوبەشەکان رایگەیاند، لە کاژێر 15:30ـی ئەمڕۆوە قەدەخەی هاتووچۆی گشتی لە بەغدا رادەگەیێندرێت کە ئۆتۆمبێل و هاووڵاتییانیش دەگرێتەوە.
زیاتر بخوێنەوە
14:46
جەمال کۆچەر: سەدر ناتوانێت لە پرۆسەی سیاسی بکشێتەوە و بە زوویی دەگەڕێتەوە
جەمال کۆچەر، سەرۆکی فراکسیۆنی یەکگرتووی ئیسلامی
سەرۆکی فراکسیۆنی یەکگرتووی ئیسلامی لە پەرلەمانی عێراق دەڵێت، سەدر دوو بژارەی لەبەردەمە بۆ دۆخی ئێستا و پێیوایە: "ئەگەر سەدر لە پرۆسەی سیاسیی بکشێتەوە، سەرجەم خواست و هیوا سیاسییەکانی دەمردن و پێدەچێت ئەو کشانەوەیەی بۆ ئەوە بێت کۆمەڵێک مەرجی نوێ بەسەر لایەنە سیاسییەکاندا بسەپێنێت".
رۆژی دووشەممە 29-8-2022 جەمال کۆچەر، سەرۆکی فراکسیۆنی یەکگرتووی ئیسلامی لە پەرلەمانی عێراق میوانی بوولتەنی کاژێر 13:00ـی تۆڕی میدیایی رووداو کە شەهیان تەحسین پێشکەشی دەکات و گوتی: "سەدر دوو رێگەی لە بەردەمە، یان دەبێ خۆپێشاندەران بباتە سەر دامودەزگاکانی حکومەت و پەکیبخات، یانیش دەست بکشێنێتەوە و دەرفەت بدات چوارچێوەی هاوئاهەنگی حکومەت پێکبهێنێت".
جەمال کۆچەر دەڵێت: "ئەگەر هەیە قۆناخێکی قورستر بێتە پێشەوە و سەدر نەتوانێت بەرپرسیارێتییەکەی هەڵبگرێت، لەبەر ئەوەی کاتێک خۆی لە پرۆسەی سیاسی کشاندەوە، دەڵێت ئەوەی روودەدات هەڵوێستی من نییە بەڵکو هی خەڵکە، کاتێکیش بەرپرسیاریەتییەکە دەخاتە ئەستۆی جەماوەر، دۆخەکە بەرەو ئاڵۆزی دەچێت و ئەگەر هەیە خەڵک بکوژرێت و قۆناخەکە بەرەو تووندوتیژی بچێت".
لەبارەی بڕیاری کشانەوەی سەدر لە پرۆسەی سیاسیی عێراق، جەمال کۆچەر گوتی: "ئەگەر هەیە ئەو هەنگاوەی سەدر بۆ ئەوە بێت کە لەوە تێگەیشتبێت یان بکشێتەوە و رێگە بە پێکهێنانی حکومەت بدات کە ئەو کاتیش کەسانی دەوروبەر و هێزەکانی نزیک لەو بەناوی سەرپێچی و گەندەڵی بگرن و لەنێویان ببەن، یانیش بەرگری لەخۆی بکات و دۆخەکە بەرەو قۆناخێکی خراپ بچێت".
سەرۆکی فراکسیۆنی یەکگرتووی ئیسلامی لە پەرلەمانی عێراق پێیوایە: "سەدر دەگەڕێتەوە ناو گۆڕەپانی سیاسی، ئەگەر نەگەڕێتەوە، سەرجەم هیوا و خواستەکانی دەمرن، کە یەک لە هیواکانی ئەوەیە ببێتە مەرجەعی باڵای عێراق و هەروەها حکومەتێکی زۆرینەی بەهێز لە عێراق دروستبکات، ئەوانەش بە کشانەوە لە گۆڕەپانی سیاسی نایەنەدی".
لەبارەی هەڵوێستی لایەنەکانی عێراق بەرامبەر کشانەوەی سەدر لە پرۆسەی سیاسیی جەمال کۆچەر گوتی: "لایەنە سیاسییەکانی عێراق بەباشی دەزانن کە نەمانی سەدر لە پرۆسەی سیاسی بۆ ئەوان سەرئێشەی زۆر دروستدەکات، بۆیە دواجار هەر خۆیان دەچن داوای گەڕانەوەی لێدەکەن، لەبەر ئەوەی پەرلەمان و دامودەزگاکان و حکومەتیش کێشەیان بۆ دروستدەبێت و کاتێکیش سەدر گەڕایەوە، رەنگە هەندێک مەرجی هەبێت و بەو لایەنانەی واژۆ بکات بۆ ئەوەی جێبەجی بکرێن".
سەرۆکی فراکسیۆنی یەکگرتووی ئیسلامی لە پەرلەمانی عێراق ئەگەری هەڵگیرسانی شەڕی ناوماڵی شیعە بەدوور دەزانێت و وەکو ئاماژەی پێدەدات: "ئەگەر سەدر هێزەکانی سەرایا سەلام و لیژنەی خۆپێشاندانەکان هەڵبوەشێنێتەوە، بەو واتایەیە شەڕی ناوخۆی شیعە دروستنابێت و موقتەدا سەدریش خۆی چەندین جار رایگەیاندووە کە رێگەنادات دۆخەکە بگاتە ئاستێک کە خوێن بڕژێت، بۆیە بژارەی شەڕی ناوخۆ لەناو ماڵی شیعەدا ئەگەرێکی لاوازە".
جەمال کۆچەر سەبارەت بە کۆبوونەوەی پەرلەمان لە دەرەوەی ناوجەی سەوز گوتی: "چوارچێوەی هاوئاهەنگی پەیوەندییان بە ئێمەوە کرد و پێیان گوتین ناومان تۆمارکەین بۆ بەشداری لە کۆبوونەوەی پەرلەمان لە دەرەوەی باڵەخانەی پەرلەمان و شوێنەکەیان دەستنیشان نەکردبوو، ئێمە وەک یەکگرتووی ئیسلامی پێمان باشبوو دەرگەی گفتوگۆ دانەخەین، بەڵام ئەوەمان لەبەرچاوگرت کە رەنگە کۆبوونەوەکە ببێتە هۆی دروستبوونی ئاڵۆزی زیاتر، بۆیە گوتمان ئێمە لەگەڵ ئەوەین دامودەزگاکانی حکومەت کارابن، بەتایبەتی پەرلەمان، بەڵام بۆ ئەوەی خوێن نەڕژێت با کۆبوونەوەی سەرکردە سیاسییەکانی عێراق بەردەوام بێت".
15:23
وازهێنانی سەدر لە سیاسەت و خۆپێشاندانی لایەنگرانی لە ناوچەی سەوز
ئاڵۆزییەکان لە بەغدا
دوای کشانەوەی کازم ئەلحائیری کە بە مەرجەعی ئایینی رەوتی سەدر ناسراوە لە ئەرکەکەی، رێبەری رەوتی سەدر رایگەیاند، "بڕیارمدا بۆ یەکجارەکی دەستوەردان لە کاروباری سیاسی بایکۆت بکەم و زۆربەی دامەزراوەکانی رەوتی سەدر دابخەم."
رۆژی دووشەممە 29-8-2022، موقتەدا سەدر، رێبەری رەوتی سەدر لە هەژماری خۆیدا لە تویتەر رایگەیاند: "زۆر کەس بە سەید ئەلحائیرییەوە وادەزانن ئەم سەرکردایەتییە بە هەوڵ یان بە فەرمانی ئەوان بەدەستهاتووە." سەدر دەشڵێت: "نەخێر، ئەوە سەرەتا بە بەخشندەیی خودا و میراتی باوکم بەدەستهاتووە، کە دەستبەرداری عێراق و گەلەکەی نەبوو."
رێبەری رەوتی سەدر ئاماژە بەوەش دەکات: "سەرەڕای دەستلەکارکێشانەوەی [سەید کازم ئەلحائیری]، بەڵام هێشتا نەجەفی پیرۆز گەورەترین بنکەی مەرجەعییەتە و هەر وا بووە."
رێبەری رەوتی سەدر هەر لە تویتەکەیدا دەڵێت: "منیش هیچ رۆژێک داوای پیرۆزی و پێگەی زانایی و سەرکردایەتیم نەکردووە، بەڵکو تەنیا بانگەشە بۆ چاکە و نەفرەت لە خراپە دەکەم، چارەنووسی بابەتەکانیش لای خودایە." موقتەدا سەدر دڵنیاییش دەدات: "تەنیا ویستم شتە چەوتەکان راستبکەمەوە کە لایەنە سیاسییە شیعەکان هۆکاری سەرەکیی بوون، چونکە ئەوان زۆرینەن. ویستم تەنیا لە گەلی خۆیان نزیکیان بکەمەوە و هەست بە نەهامەتییەکەی بکەن."
رێبەری رەوتی سەدر لە درێژەی گوتەکانیدا دەڵێت: "هەرچەندە باوەڕم وایە کە مەرجەع [ئەلحائیری] بە ویستی خۆی نەکشاوەتەوە و راگەیێندراوەکەشی کە بڵاوکرایەوە بە هەمان شێوە، بەڵام هەر خۆم پێشتر بڕیارمدابوو دەستوەردان لە کاروباری سیاسیدا نەکەم."
رێبەری رەوتی سەدر باسی لەوەش کرد، "ئێستا بۆ یەکجارەکی دەکشێمەوە و هەموو دامەزراوەکانیش دادەخەم جگە لە مەزارگەی پیرۆز و مۆزەخانەی پیرۆز و دەستەی کولتووری بنەماڵەی سەدر. ئیتر هەمووان ئازادن، ئەگەریش مردم یان کوژرام داواکارم فاتیحەم بۆ بخوێنن و نزام بۆ بکەن."
ئەم هەڵوێستەی رێبەری رەوتی سەدر لە کاتێکدایە، لە کۆتایی مانگی رابردووەوە لایەنگرانی رەوتی سەدر لە باڵەخانەی پەرلەمانی عێراق مانیان گرتووە و داوای هەڵوەشاندنەوەی پەرلەمان و بەڕێوەچوونی هەڵبژاردنێکی دیکەی پێشوەخت دەکەن. هاوکات، چوارچێوەی هاوئاهەنگیی شیعە، کە خاوەنی گەورەترین فراکسیۆنە لە پەرلەمان و رکابەری رەوتی سەدرە، سوورە لەسەر پێکهێنانی حکومەتی نوێ و گۆڕینی یاسا و کۆمیسیۆنی هەڵبژاردنەکان پێش بەڕێوەچوونی هەڵبژاردنێکی دیکە.