رووداو دیجیتاڵ
لیژنەیەکى 25 کەسی بۆ کۆنگرەى ناولێندراو لە کۆنگرەى هەرێمى عەرەبی – رۆژئاوا پێکدەهێندرێت، کە بڕیارە لە نێوەڕاستى مانگى ئایلوول لە ئەنبار بکرێت. سەرۆکى لیژنەکە دەڵێت، "نوێنەرانى هەرێمى کوردستان و باڵیۆزخانەکان بانگهێشت دەکەین."
رەعد سلێمان، سەرۆکى لیژنەى ئامادەکاریى کۆنگرەى هەرێمى عەرەبی – رۆژئاوا بە تۆڕى میدیایی رووداوى راگەیاند، "لە نێوەڕاستى مانگى ئەیلوولدا کۆنگرەکەمان لە پارێزگاى ئەنبار دەکەین و بۆ ئەو مەبەستەش لیژنەیەکى 25 کەسی پێکهێندراوە کە هەریەک لە پارێزگاکانى ئەنبار، دیالە، سەلاحەدین، نەینەوا و کەرکووک 5 نوێنەریان هەیە."
دیاریکردنى نێوەڕاستى مانگى ئەیلوول بۆ بەڕێوەچوونی کۆنگرەکە بەهۆى ئەوەیە کە 15ى ئەو مانگە هۆتیل ئەنبارى نێودەوڵەتى دەکرێتەوە، کە بڕیارە کۆنگرەکەى تێدا بکرێت.
رەعد سلێمان کەسایەتییەکى سوننەى ئەنبارە و دەڵێت، "بانگهێشتنامە ئاراستەى نوێنەرانى هەرێمى کوردستان و نێردە دیپلۆماسییە بیانى و عەرەبییەکان لە عێراق دەکرێت بۆ ئامادەبوون لەو کۆنگرەیەدا. ئەو کۆنگرەیە بۆ روونکردنەوەى ئەوەیە کە ئەو هەرێمەی دەمانەوێت دروستی بکەین مەبەست لێى پارچەپارچەکردنى عێراق نییە."
بەگوێرەى مادەى 119ى دەستووری عێراق، پارێزگایەک یان زیاتر مافیان هەیە هەرێم پێکبهێنن دوای ئەنجامدانی گشتپرسی و بۆ ئەنجامدانی ئەو گشتپرسییەش دەبێت سێیەکى ئەندامانى ئەنجوومەنەکەی یان 10 یەکى دانیشتوانەکەى داواى بکەن.
رەعد سلێمان گوتى، "دەمانەوێت 5 پارێزگا بەشدار بن لە هەرێمى عەرەبی - رۆژئاوا."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ