سەدرییەکان خۆیان بۆ "شۆڕشی عاشوورا" ئامادە دەکەن

 

 

هەر لە ئێستاوە هێزێکی زۆر لە دەوروبەری ناوچەی سەوز بڵاوەی پێکراوە. پەرلەمانتارێکی دەستلەکارکێشاوەی فراکسیۆنی سەدری دەڵێت، "هیچ داواکارییەکی فەرمیمان لە بەڕێز موقتەدا سەدرەوە پێنەگەیشتووە، بەڵام گەل هەر کاتێک بڕیار بدات خۆپێشاندان دەکات."

 

 

شەڕە تویت و گرووپەکانی تەلیگرام و پۆستەکانی تۆڕە کۆمەڵایەتییەکان لەنێوان دوو بەرە دژبەیەکەکەی شیعەکان تادێت گەرمتر دەبێت، هاشتاگی "شۆڕشی عاشوورا" و" راپەڕینی عاشوورا" و "شەممە وادەمانە" لە رۆژی پێنجشەممەوە لە تویتەر زوو زوو دەبنە ترێند. ئەم هاشتاگانە سەدرییەکان وەکو ئامادەکارییەک بۆ خۆپێشاندانێک بڕیارە رۆژی شەممە بکرێت بڵاویدەکەنەوە، سەرکردە و لایەنگرانی چوارچێوەی هاوئاهەنگیش حکومەت بە بەرپرسیار دەزانن لە پاراستنی دامەزراوەکانی حکومەت و یاسادانان.

 

لە عێراق چیدی سەرکردە و حیزبەکان پێویستیان بەوە نەماوە بێنە سەر شاشەی تیڤییەکان یان لە رادیۆوە بانگەشە بۆ خۆپێشاندان و کۆبوونەوەی جەماوەری بکەن. بۆ لایەنگرە گوێڕایەڵەکانی موقتەدا سەدر، تویتێکی محەممەد ساڵح عێراقی (کەسایەتییە نادیارەکە)ی نێو رەوتی سەدر بەسە، بۆ ئەوەی بە ماوەیەکی کەم هەزاران کەس بڕژێنە سەر شەقامەکان. هەر ئەو هەزاران کەسە بە تویتێکی موقتەدا سەدر دەگەڕێنەوە ماڵەوە.

 

رۆژی هەینی، 29ـی تەممووزی 2022، قەیس فەرتووسی، ئەندامی دەستلەکارکێشاوەی رەوتی سەدری، بە تۆڕی میدیایی رووداوی راگەیاند: "هێشتا هیچ فەرمانێکی فەرمیمان لەلایەن سەماحەتی سەید موقتەدا سەدرەوە بۆ خۆپێشاندان بۆ نەهاتووە، بەڵام ئیدی گەلی عێراق و خاوەن هەڵوێستەکان لە ئێستاوە خۆیان بانگەواز بۆ خۆپێشاندان دەکەن و هەر شتێک گەل بڕیاری لەبارەوە بدات ئێمەش لەگەڵیداین، گەنجان لێرە و لەوێ دەستیان بە خۆڕێکخستنەوە بۆ خۆپێشاندانەکەی شەممە کردووە، ئێمەش هەر شتێک سەماحەت داوای بکات دەیکەین."

 

رۆژی 15-06-2022 هەر 73 پەرلەمانتارەکەی فراکسیۆنی سەدری بە فەرمانی موقتەدا سەدر دەستیان لەکارکێشایەوە، بەڵام سەدر لە گۆڕەپانەکە دوورنەکەوتەوە و لە نوێژی هەینی بە کۆمەڵ و خۆپێشاندانەکەی چوارشەممەی رابردوو هۆشداری بە چوارچێوەی هاوئاهەنگی دا لە دەستنیشانکردنی بەربژێری سەرۆکوەزیران.

 

پەرلەمانتارە دەستلەکارکێشاوەکەی  فراکسیۆنی سەدر گوتی: "ئێمە لە پڕۆسەی سیاسیی کشاینەوە، چونکە گەندەڵکاران لە رێگەی بەکارهێنانی دادگە و یاساوە و لە رێگەی بەکارهێنانی گوشارەکانییانەوە رێگەیان نەدا دەست بە چاکسازییەکی گشتگیر بکەین و حکومەت پێکبهێنین، ئێستاش ئەوە گەلە رێگە نادات ئەو زبڵ و پاشماوانەی 20 ساڵی رابردوو جارێکی دیکە بێنەوە سەر کورسیی دەسەڵات، ئەو دەموچاوانەی ناوێت".

 

قەیس فەرتووسی هۆشداری دا و گوتی: "گەندەڵکاران دەبێت بچنە زبڵدانەوە و هەرگیز رێگە نادەین عێراق بەرەو دووڕیانێکی مەترسیدار ببەن، راستە ئێمە لە پڕۆسەی سیاسی کشاوینەتەوە، بەڵام ئێمە لە پشتگیریکردنی داواکارییەکانی گەلەکەمان و شەقام و گەنجانی بەشمەینەتی عێراق نەکشاوینەتەوە، بۆیە هەرکاتێک گەلەکەمان بیەوێت لەو شوێنەین کە ئەوان دەیانەوێت، ئیدی شەممە بێت یان یەکشەممە یان هەر رۆژێکی دیکە."

 

رۆژی پێنجشەممە وەزیرەکەی سەدر دوو وێنەی بڵاوکردەوە کە یەکێکیان بەربەستە کۆنکرێتییەکانی بەردەم ناوچەی سەوز بوون و ئەوی دیکەیان گۆڕەپانی ئازادییە لە بەغدا وەکو ئاماژەیەک بۆ دوو شوێن ئەگەری هەیە خۆپێشاندانیان تێدا بکرێت.

 

 

لە دواینیوەڕۆی رۆژی پێنجشەممەوە سەدرییەکان بانگەواز بۆ خۆپێشاندانەکەی شەممە دەکەن. ئیبراهیم جابری، بەرپرسی نووسینگەی سەدر لە بەری رەسافەی شاری بەغدا لە هەژماری خۆی لە تویتەر و فەیسبووک پۆستێکی بڵاوکردووەتەوە دەڵێت، "ئایا شەممە نزیک نییە."، وەکو ئاماژەیەک بۆ خۆپێشاندانە چاوەڕوانکراوەکەی رۆژی شەممە 30ی تەممووز.

 

حازم ئەعرەجی، نوێنەری موقتەدا سەدر، بە پۆستەکانی "شەممە ئامادەین"،  و دواتریش بە "یەکەم پەرستن بوو، دووەم گوێ بادان، سێیەم........" سەدرییەکانی تەواو وروژاندووە و تۆڕە کۆمەڵایەتییەکانیان پڕ لە پۆستەر و بڵاوکراوەی بانگەواز بۆ خۆپێشاندان کرد، خۆپێشاندانێک جگە لە مانەوە، داوای هەڵدانی خێوەت و مانگرتنی بەردەوامیشی تێدا دەکرێت.

 

لە بەرامبەر بانگەوازی سەدرییەکان، لایەنگرانی چوارچێوەی هاوئاهەنگی دەڵێن، هیچ کۆبوونەوەیەکی پەرلەمان ناکرێت و خۆتێکدانی سەدرییەکان "زیادەیە"، رژدیشن لەسەر بەردەوامبوون لە پێکهێنانی حکومەت.

 

رۆژی 25ى تەممووزی 2022، هاوپەیمانیى چوارچێوەى هاوئاهەنگى محەممەد شیاع سوودانى بۆ پۆستى سەرۆکوەزیرانی عێراق بەربژێرکرد. سوودانی لە ماوەی رابردوودا دوو جار وەزیر و دوو جاریش وەزارەتی بەوەکالەت بەڕێوەبردووە، جگە لە ژمارەیەک پۆستی دیکە، بەڵام لەلایەن سەدرییەکان و بەشێکی دیکەی خۆپێشاندەرانەوە قبووڵکراو نییە، هەرچەندە چوارچێوەی هاوئاهەنگی سوورە لەسەر بەربژێرکردنی.

 

هەرچەندە دەنگۆی کۆبوونەوەی پەرلەمانی عێراق لە رۆژی شەممەدا لە نێو میدیاکانی عێراق بڵاوکراوەتەوە، بەڵام هێشتا ئەنجوومەنی نوێنەرانی عێراق هیچ وادەیەکی بۆ کۆبوونەوەی داهاتوو دیارینەکردووە.

 

عارف حەمامی، ئەندامی هاوپەیمانیی دەوڵەتی یاسا، رۆژی هەینی، 29ـی تەممووزی 2022، بە تۆڕی میدیایی رووداوی گوت: "هێشتا هیچ وادەیەک بۆ کۆبوونەوەی داهاتووی پەرلەمان دیاری نەکراوە، پێشنبینی دەکەم بەمنزیکانە دیاری بکرێت، یەکەمیان بۆ پێشکێشکردنی ناوی محەممەد شیاع سوودانییە بە پەرلەمان بەشێوەیەکی فەرمی و ئەوی دیکەشیان بۆ راپۆرتی دەستدرێژییەکانی تورکیایە کە راپۆرتێکی هاوبەشی هەردوو لیژنەی بەرگری و ئاسایش و پەیوەندییەکانی دەرەوەی پەرلەمانە و پڕۆژەبڕیارێک لە خۆدەگرێت سەبارەت بە هێزەکانی تورکیا و پەکەکە لە عێراق."

 

 

هەرچەندە لایەنگرانی سەدری لە سۆشیاڵمیدیا، دەستیان بە بڵاوکردنەوەی هەواڵی ناڕاستیش کردووە لەگەڵ بانگەوازەکانیاندا، بەڵام لە بەرەی بەرامبەرەوە وەڵامدەدرێتەوە، شەوی پێنجشەممە سەدرییەکان لەماوەی کەمتر لە پێنج خولەکدا هەواڵێکی لە چەشنی برووسکەیان لەبارەی کشانەوە و داوای لێبووردنی محەممەد شیاع سوودانی، بەربژێری چوارچێوەی هاوئاهەنگی بۆ پۆستی سەرۆکوەزیران بڵاوکردەوە، بەڵام زوو بەرەی بەرامبەر بە خۆ کەوت بە"هەواڵی درۆ" ناوی هێنا.

 

رۆژی پێنجشەممە 28ـی تەممووزی 2022، عەمار مونعیم، بەرپرسی نووسینگەی محەممەد شیاع سوودانی، بەربژێری هاوپەیمانیی چوارچێوەی هاوئاهەنگی بۆ پۆستی سەرۆکوەزیرانی عێراق بە تۆڕی میدیایی رووداوی راگەیاند: "هەواڵی داوای لێبووردنی محەممەد شیاع سوودانی لە راسپاردنی بۆ پۆستی سەرۆکوەزیرانی عێراق راست نییە و ئەوەی دەگوترێت بۆ شێواندنی دۆخەکەیە. ئەو رژدە لەسەر ئەوەی کارەکانی تەواو بکات."

 

چوارچێوەی هاوئاهەنگی، رۆژی پێنجشەممە دوای کۆبوونەوەی سەرکردەکانی رایگەیاند، تیمێکی دانوستاندنیان پێکهێناوە و لە ئەمڕۆ هەینییەوە دەست بە وتوێژکردن لەگەڵ لایەنەکانی دیکە بۆ پێکهێنانی حکومەت دەستپێدەکەن.

 

بەڵام بە گوتەی موهەند خەزعەلی، ئەندامی دەستلەکارکێشەوەی فراکسیۆنی سەدری، کە رۆژی هەینی، 29ـی تەممووزی 2022، قسەی بۆ تۆڕی میدیایی رووداو کردووە، هەوڵ و تەقەلاکانی چوارچێوەی هاوئاهەنگی بێ ئەرزش دەمێنێتەوە، ئەو دەڵێت: "رێگە بە هەڵبژاردنەوە و دیاریکردنی گەندەڵەکان نادەین و سوودانی کارتێکی سووتاوە و دیاریکردنیشی دەبێتە هۆی زیاتر سووتانی ئایندەی خۆی، چونکە بە راستی دەموچاوەکانی نێو چوارچێوەی هاوئاهەنگی هەمان گەندەڵەکانی ساڵانی پێشوون."

 

رۆژی 27ى تەممووزی 2022 ژمارەیەک لە لایەنگرانى رەوتى سەدر لە بەغدا لە دژى بەربژێرکردنى محەممەد شیاع سوودانى، لە لایەن چوارچێوەى هاوئاهەنگى بۆ پۆستى سەرۆکوەزیران خۆپێشاندانیان کرد و دواتر بەربەرستە کۆنکرێتییەکانی ناوچەی سەوزیان بڕی و چوونە نێو هۆڵى پەرلەمانى عێراقەوە.

 

ئێستا شەقامی عێراق چاوێکی لەسەر کۆبوونەوەی داهاتووی پەرلەمانە کە بڕیارە بۆ هەڵبژاردنی سەرۆککۆمار و پێشکێشکردنی محەممەد شیاع سوودانی بەفەرمی بکرێت و چاوێکی دیکەشی لەسەر بانگەوازەکان و خۆپێشاندانێکە سەدرییەکان بانگەشەی بۆ دەکەن، لەنێو ئەو دوو بەرە رکابەرەشدا عێراق لە 300 رۆژی بێ حکومەتی نوێ نزیک دەبێتەوە.