وەزارەتی تەندروستیی عێراق هۆشداری لەبارەی تای خوێنبەربوون دەدات: رەوشەکە لە کۆنترۆڵ دەردەچێت

 

 

دکتۆر سینان غازی، بەڕێوبەری گشتیی نەخۆشییە گوازراوەکان دەڵێت، "تای خوێنبەربوون سەرچاوەکەی ئاژەڵە و بۆ مرۆڤ دەگوازرێتەوە، یانیش لە مرۆڤێکی تووشبوو بۆ مرۆڤێکی دیکە دەگوازرێتەوە، کۆنترۆڵکردنی ئەم نەخۆشییە تەنیا لە ئەستۆی وەزارەتی تەندروستیدا نییە، بەڵکو پێویستی بە ھەوڵی وەزارەتی کشتوکاڵە. بەشی ڤێتێرنێری و لایەنی ئەمنیشی پێویستە کە یارمەتیی وەزارەتی کشتوکاڵ و وەزارەتی تەندروستی بدات."

 

لە ناوجەرگەی پایتەختی عێراقدا، لە چەندین شوێن مەیدانی ئاژەڵان ھەیە و کڕین و فرۆشتن بەبێ مۆڵەت دەکرێت.

 

زیا سەعدی تەمەن 24 ساڵ زۆربەی ژیانی لەنێو ئاژەڵان بەسەربردووە و دەڵێت، "ئاژەڵی ھاوردە نەخۆشی بڵاودەکەنەوە نەک خۆماڵی."

 

زیا سەعد، ئاژەڵفرۆش ئاماژە بەوە دەکات، "تای خوێنبەربوون تەنیا لە ئاژەڵی ھاوردەدا ھەیە، ئەو ئاژەڵانەی لە سووریا و ئێرانەوە دێن، بەڵام لە ئاژەڵی خۆماڵیدا نییە، ئێمە رۆژمان بەھێزە، بەڵام ھی سووری و ئێرانی لە کێڵگە بەخێوکراون و رۆژ لێیان نادات و پرۆتینیان پێدەدرێت، ئەمانە ھی سووری و ئێرانین."

 

بەپێی ئاماری وەزارەتی تەندروستیی عێراق، تەنیا لە شەش مانگی رابردوودا زیاتر لە 250 کەیسی تووشبوون بە تای خوێنبەربوون تۆمارکراون و 35 کەسیش گیانیان لەدەستداوە.

 

زۆربەی نەخۆشییەکان لە ئاژەڵەوە بۆ مرۆڤ دەگوازرێنەوە، لە سەرووی ھەموویشیانەوە تای خوێنبەربوون، کەچی نەبوونی چاودێریی تەندروستی و ئەمنی، وایان کردووە بە روون و ئاشکرا لە شەقامەکانی بەغدا ئاژەڵ بفرۆشرێن و سەرببڕدرێن، ئەمەش وایکردووە رێژەی تووشبوون بە تای خوێنبەربوون لە عێراق زیادبکات.