دادگەى فیدراڵى دوابڕیار لەبارەى یاسای هەڵبژاردنەکان دەدات

 

دادگەى باڵاى فیدراڵىی عێراق  ئەمڕۆ (دووشەممە، 28ـی ئابى 2023) کۆدەبێتەوە بۆ ئەوەى دوابڕیار لەبارەى نۆ سکاڵا بدات، کە ژمارەیەک پەرلەمانتار و پارێزەر لەدژى هەموارى یاساى هەڵبژاردنى ئەنجوومەنى پارێزگاکان و پەرلەمانى عێراق تۆماریان کردووە. 

 

سکاڵاکارەکان پێکهاتوون لە پەرلەمانتاران، ئەیاد مالیکى، مستەفا سەنەد، باسم خەشان، محەممەد جاسم، ئەسوان سالم، دەرەید جەمیل، هەروەها دوو کەسی دیکە بە ناوەکانی ئاسۆ سدیق و سیهام فەیلی.

 

سکاڵاکان لەلایەن دادگەى باڵاى فیدراڵیی عێراقەوە یەکخراون، دژى پێنج بڕگە و مادەى هەموارى یاساى هەڵبژاردنى ئەنجوومەنى پارێزگاکان و پەرلەمانى عێراقن کە لە 24ـی ئادارى 2023 پەرلەمانى عێراق دەنگى لەسەردا.

 

 باسم خەشان، ئەندامى سەربەخۆى پەرلەمانى عێراق کە یەکێکە لە سکاڵاکاران بە تۆڕى میدیایی رووداوى گوت "رەشبینین لە ئەنجامى سکاڵاکە و ئەگەر هەیە سەرجەمیان رەتبکرێنەوە، چونکە چەند سکاڵایەکى دیکەمان لەسەر پەرلەمان دۆڕاندووە."

 

ئەو مادانەى تانەیان لێدراوە بریتین لە: بڕگەى شەشى مادەى یەکەم کە تایبەتە بە لیستى کراوە، مادەى دوو کە تایبەتە بەوەى یاساکە بۆ هەڵبژاردنى ئەنجوومەنى پارێزگاکان جێبەجێدەکرێت، کە لە 18ـی کانوونى یەکەم دەکرێت، مادەى 9 و 12 کە تایبەتن بە شێوازى دەنگدان بە بەربژێران و سیتسمى سانت لیگۆ بۆ هەژمارکردنى دەنگەکان و مادەى 51 کە یاساى پێشووى هەڵبژاردنى ئەنجوومەنى پارێزگاکان هەڵدەوەشێنێتەوە.