رووداو دیجیتاڵ
دەستەى باڵاى هاوئاهەنگى پارێزگاکان بڕیاریدا یاساى هەڵبژاردنى پەرلەمان و ئەنجوومەنى پارێزگا و قەزاکان بۆ چوارەم جار هەموار بکرێتەوە. بە گوتەى جێگرى سەرۆکى لیژنەى هەرێم و پارێزگاکان هەموارەکە تایبەتە بە دەسەڵاتى پارێزگار و ئەنجوومەنەکان.
ئەو بڕیارە لەکۆبوونەوەى ئەو دەستەیەدا بووە کە محەممەد شیاع سوودانى، سەرۆکایەتى کرد، کە 15 پارێزگار تێیدا ئەندامن.
28ى تەممووزی 2024، باسم عەوداوى، گوتەبێژى حکومەتى عێراقى راگەیاند: "بەشداربووانى کۆبوونەوەى دەستەى هاوئاهەنگیی پارێزگاکان رەزامەندییان داوە لەسەر هەموارکردنەوەى یاساى هەڵبژاردنى پەرلەمان و ئەنجوومەنى پارێزگا و قەزاکان."
ئەمە دەبێتە چوارەم جار ئەو یاسایە هەموار بکرێتەوە، دواترینیان لە ساڵى 2023 کرا و هەردوو یاسای هەڵبژاردنى پەرلەمان و ئەنجوومەنى پارێزگاکان بە چەند گۆڕانکارییەکەوە کران بەیەک.
کوردۆ عومەر، جێگرى سەرۆکى لیژنەى هەرێم و پارێزگاکانى پەرلەمانى عێراق بە تۆڕى میدیایی رووداوى گوت: "ئەو هەموارە لەسەر داواى پارێزگارەکانە و تایبەتە بە دیاریکردنى دەسەڵاتەکانى هەڵبژاردنى بەرپرسی یەکە کارگێڕییەکان لە نێوان پارێزگار و ئەنجوومەنى پارێزگادا".
بۆ یەکەمجار لە دواى 10 ساڵ، لە 18ى کانوونی یەکەمى 2023، هەڵبژاردنى ئەنجوومەنى پارێزگاکان لە عێراق کرا و یەکەمجاریش بوو بەو هەموارە نوێیەوە هەڵبژاردن بکرێت.
جێگرى سەرۆکى لیژنەى هەرێم و پارێزگاکانى پەرلەمانى عێراق رایگەیاند، داوایان لە نوێنەرى حکومەت کردووە پێشنیازى خۆیان لە بارەى ئەو هەموارەوە بگەیێننە لیژنەکەیان بۆ ئەوەى گفتوگۆى لەسەر بکەن و بڕیارى لە بارەوە بدەن".
رۆژی 2ى تەممووزی 2024، ئەنجوومەنى پارێزگاى نەینەوا گۆڕانکاریی لە 17 یەکەى کارگێڕیى شارەکە کرد، ئەو پرسە لە بارەى دەسەڵاتى ئەو گۆڕانکارییانەوە ناکۆکى لەگەڵ پارێزگار بۆ دروستکرد.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ