رێکخراوێکی عێراقی: لە خۆپێشاندانەکانی تشرین 624 کەس کوژران

 

روانگەی عێراقی بۆ مافەکانی مرۆڤ لە نوێترین راپۆرتێکدا کە تایبەتە بە قوربانییانی خۆپێشاندانەکانی ساڵی 2019ـی عێراق کە بە 'خۆپێشاندانەکانی تشرین' دەناسرێت، رایگەیاند: "بەهۆی تەقەی هێزەکانەوە 624 کەس گیانیان لەدەستدا، زۆرینەیان لە بەغدان، ئێمە لە رێگەی چاوپێکەوتن لەگەڵ کەسوکارییانەوە فیلمێکی دێکیۆمێنتاریشمان ئامادەکردووە و باسی کاریگەریی ئەو خۆپێشاندانە دەکەین کە لەسەر عێراق بەجێی هێشتووە."

 

رێکخراوەکە دەڵێت لە بە دۆکیۆمێنتکردنی رووداوەکانی خۆپێشاندانەکان بەردەوامین، دواتر بە راپۆرتێک سەرجەم وردەکارییەکان رووندەکەنەوە، چونکە ئەوەی ئێستا سەرەتای رێگەکەیە و هەموو زانیاری و بەڵگەنامەکان دەدەیە بەرپرسانی عێراق بۆ لێکۆڵینەوە و لێپرسینەوە لە بکوژان بۆ ئەوەی بدرێنە دادگە.

 

دایکی نەمیر، ئافرەتێکی 50 ساڵەی دانیشتووی بەغدایە، بە رووداوی گوت: "کوڕەکەی من لەپێناو ئازادی، کۆتاییهێنان بە گەندەڵی کوژرا، بۆیە لە دڵی من و عێراقییەکان شەهیدە، دەبێت بکوژان رادەستی یاسا و دادگە بکرێن و لێپرسینەوەیان لەگەڵدا بکرێت."

 

خۆپێشاندانەکانی مانگی تشرینی یەکەمی ساڵی 2019، دژی هەژاری، بێکاری، گەندەڵی و خراپی خزمەتگوزارییەکان لە نێوەڕاست و باشووری عێراق دەستیانپێکرد.

 

خۆپێشاندەرانی تشرین ئەوکات داوای رووخاندنی حکومەت و گۆڕینی سیستمی سیاسییان دەکرد لەگەڵ گۆڕینی چینی سیاسەتڤان و لایەنە سیاسییەکان.

 

خۆپێشاندانەکە چەند مانگێک بەردەوام بوو. بە گوێرەی رێکخراوی لێبووردنی نێودەوڵەتی، لە گرژییەکاندا زیاتر لە 600 کەس کوژران و زیاتر لە 20 هەزار کەسی دیکە برینداربوون، کە زۆرینەیان خۆپێشاندەر و چالاکڤان بوون.