عێراق
کۆبوونەوەی لەتیف رەشید، سەرۆککۆماری عێراق و نێچیرڤان بارزانی، سەرۆکی هەرێمی کوردستان لە کۆشکی سەلام لە بەغدا
رووداو دیجیتاڵ
له دووه‌م رۆژى سه‌ردانيدا بۆ به‌غدا، به‌يانيى ئه‌مڕۆ يه‌كشه‌ممه 28ی نیسان سه‌رۆكى هه‌رێمى كوردستان له‌گه‌ڵ سەرۆککۆماری عێراق كۆبووه‌وه و رایگەیاند، هەولێر ئامادەی چارەسەری کێشەکانە لەگەڵ بەغدا بە گفتوگۆ و لێکگەیشتن لەسەر بنەمای دەستوور. هەروەها لەبارەی هێرشی سەر کێڵگەی گازی کۆرمۆر هەردوولا هێرشەکەیان بە "دەستدرێژی بۆسەر سەروەریی و هەڕەشە لە ئارامی و سەقامگیریی وڵات" ناوبرد.
بەپێی راگەیێندراوی سەرۆکایەتیی هەرێمی کوردستان، له كۆبوونه‌وه‌ی نێچيرڤان بارزانى، سەرۆکی هەرێمی کوردستان و د. له‌تيف ره‌شيد، سەرۆککۆماری عێراق دۆخى گشتيى عێراق و گرنگيى پاراستنى ئارامى و سه‌قامگيرى، بره‌ودان به پێشخستنى كه‌رتى ئابوورى و خزمه‌تگوزارى، پشتگيرى له حكومه‌تى فيدراڵ بۆ جێبه‌جێكردنى كارنامه‌كه‌ى، گفتوگۆى هه‌ولێر ـ به‌غدا بۆ چاره‌سه‌ركردنى كێشه‌كانيان به‌پێى ده‌ستوور و هاريكارى و هه‌ماهه‌نگيى نێوان حكومه‌تى فيدراڵ و حكومه‌تى هه‌رێمى كوردستان له هه‌موو بواره‌كاندا، تاوتوێ كرا.
هەروەها هه‌ردوولا جه‌ختيان له پته‌وكردنى په‌يوه‌ندييه‌كانى هه‌ولێر ـ به‌غدا و سه‌رخستنى گفتوگۆى چاره‌سه‌ركردنى كێشه‌كانى نێوانيان کردووەتەوە و باسيان له سه‌ردانى سه‌رۆكوه‌زيرانى عێراقى فيدراڵ بۆ ئه‌مريكا و سه‌ردانى سەرۆککۆماری توركيا بۆ عێراق و هه‌رێمى كوردستان و ئه‌نجامى هه‌ردوو سه‌ردانه‌كه كرد بۆ بره‌ودان به په‌يوه‌ندييه‌كان عێراق له‌گه‌ڵ ئەمریکا و توركيا، به‌تايبه‌تى له بوارى ئابوورى و بازرگانيدا، له‌گه‌ڵ هاريكاريى هاوبه‌ش بۆ به‌ره‌نگاربوونه‌وه‌ى تيرۆر.
لەو کۆبوونەوەدا نێچيرڤان بارزانى، دووپاتى کردووەتەوە، "هه‌رێمى كوردستان ئاماده‌ى چاره‌سه‌ركردنى كێشه‌كانيه‌تى له‌گه‌ڵ به‌غدا به گفتوگۆ و لێكگه‌يشتن له‌سه‌ر بنه‌ماى ده‌ستوور، له سه‌روويانه‌وه ئه‌و پرس و كێشانه‌ى په‌يوه‌ندييان به دۆخى ژيان و گوزه‌رانى هاووڵاتييانه‌وه هه‌يه." هه‌ر له‌مباره‌يه‌وه سەرۆککۆماری عێراق باسى له گرنگيى به‌رده‌واميى ديدار و سه‌ردانه‌كانى شاندى هه‌ردوولا بۆ چاره‌سه‌ركردنى كێشه‌كان كرد.
له كۆبوونه‌وه‌كه‌دا سه‌رۆكى هه‌رێمى كوردستان و سەرۆککۆماری عێراقى فيدراڵ، سه‌ركۆنه‌ى هێرشى درۆنيى پێرێ شه‌وى سه‌ر كێڵگه‌ى گازى كۆرمۆريان له سنوورى پارێزگاى سلێمانى كرد و هێرشه‌كه‌يان به ده‌ستدرێژى بۆ سه‌ر سه‌روه‌رى و هه‌ڕه‌شه له ئارامى و سه‌قامگيريى وڵات، له قه‌ڵه‌م دا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ