وەزیری سەرچاوەکانی ئاو: عێراق لەنێو هێڵی هەژاریی ئاودایە

 

عەون زیاب عەبدوڵڵا، وەزیری سەرچاوەکانی ئاوی عێراق، ئەمڕۆ یەکشەممە لە کۆنفرانسێکی رۆژنامەڤانیدا لە بەغدا هۆشداریی لە ئاڵنگارییەکانی بەردەم کەرتی ئاو لە وڵاتەکەی دا: "عێراق بە دەست کەمیی سەرچاوەکانی ئاوەوە دەناڵێنێت و چووەتە نێو هێڵی هەژاریی ئاوەوە." 

 

عەون زیاب عەبدوڵڵا گوتی: "پێشتر دۆخی عێراق بەم جۆرە نەبوو؛ ئەوەش وامان لێدەکات تیشک بخەینە سەر ئەم کێشەیە. گرنگە هەموو وڵاتانی عەرەبی و دراوسێ لە دادپەروەری لە دابەشکردنی ئاو لە رووبارە هاوبەشەکان پشتیوانیمان بکەن."

 

وەزیرەکەی عێراق، ئەو قسانەی لە تەنیشت ژمارەیەک لە وەزیرانی سەرچاوەکانی ئاو و کشتوکاڵی ژمارەیەک وڵاتی ئەندام لە کۆمکاری عەرەبی لە چوارەم کۆنفرانسی بەغدا بۆ ئاو کرد. 

 

کۆنفرانسەکە رۆژی شەممە دەستیپێکرد و سێ رۆژ بەردەوام دەبێت.

 

10 رۆژ لەمەوبەر ئەو وەزیرە لە دیداری زانکۆی ئەمریکی لە سلێمانی گوتی: "لە ساڵی 2035 زیاتر لە 10 ملیار مەتر سێجا کورتهێنانمان لە سەرچاوەی ئاو دەبێت، کەواتە کەلێنێکی زۆر لە خستنەڕوو و خواست لەسەر ئاو هەیە."

 

هێڵی هەژاریی ئاو، واتە بەشێک لە هاووڵاتییان لە وڵاتێک دەستیان بە ئاو ناگات.

 

بەپێی رێکخراوی خۆراک و کشتوکاڵی نەتەوە یەکگرتووەکان (فاو)، پشکی هەر تاکێک لە ئاوی شیرین 10٪ـی تێكڕای بەکارهێنانی ئاوە لەلایەن ئەو کەسەوە کە ساڵانە دەگاتە هەزار مەتر پێ سێجا؛ دەستڕانەگەیشتن بەو بڕە کەسەکە و وڵاتەکە دەخاتە نێو هێڵەکەوە.

 

عەون زیاب عەبدوڵڵا پەسنی ئامادەبوونی بەشێک لە وڵاتانی ئەندام لە کۆمکاری عەرەبی کرد؛ لەبارەی تورکیاشەوە گوتی: "شاندێکی تورکیا لە کۆنفرانسەکە ئامادەن، بەڵام لەسەر ئاستی زۆر باڵا نییە. لە سەردانەکەی ئەم دواییەی سەرۆککۆماری تورکیا و شاندەکەی وتوێژی روون و ئاشکرامان لە بواری ئاو هەبوو". 

 

دیجلە و فورات لە باکووری کوردستانەوە دەڕژێنە نێو باشووری کوردستان و عێراقەوە و دابینکەری سەرەکی ئاوی باشووری کوردستان و عێراقن. وەزیرەکەی عێراق روونتر باسی سەردانەکەی سەرۆککۆماری تورکیای بۆ بەغدا و رێکەوتنەکانی نێوان هەردوو وڵات کرد و گوتی: "رێککەوتنەکە لەگەڵ تورکیا بڕگە و بڕیاری زۆر گرنگی تێدایە؛ ئومێدی جێبەجێکردنی دەکەین".

 

وەزیری سەرچاوەکانی ئاوی عێراق هەروەها رایگەیاند: "هەوڵمان دا کۆنفرانسەکە گشتگیر، فراوان و هەمە لایەن بێت. مەبەست گەیشتنە بە ئەنجامی باش لە بەڕێوەبردنی ئاو".