هێرشی ئەمریکا و مقاوەمەی ئیسلامیی عێراق لەدژی یەکدی دەچێتە قۆناخی تۆڵەکردنەوە

 

مقاوەمەی ئیسلامی عێراق لەڕێگەی باڵی سیاسیی حەشدی شەعبی، پەیامی بۆ حکومەتی عێراق ناردووە کە بە ئەمریکییەکان بڵێن 'تاوەکو کاتێک دیاری نەکەن بۆ کشانەوە لە عێراق دەست' لەو هێرشانە هەڵناگرن، کە بۆ سەریان دەستیان پێکردووە. 

 

عارف حەمامی، پەرلەمانتاری دەوڵەتی یاسا دەڵێت "وەک دەزانن؛ رۆڵی ئەمریکا روون و ئاشکرا بووە، کە بەردەوام پشتیوانی لە کیانی سەهیۆنی کردووە. بۆیە کاردانەوە بەرامبەریان لەلایەن گرووپەکانی مقاوەمەوە شتێکی زۆر ئاساییە، ئەمە مافێکی یاسایی مقاوەمەوە گرووپەکانی دیکەشە."

 

گرووپە چەکدارەکان کە لە هەناوی حەشدی شەعیبیەوە دەرچوون و دژە ئەمریکان، فەرمین و پشتیوانیی یاساییان هەیە، جگە لەوەش دەستڕۆیشتوون و زۆرینەی دەسەڵاتدارانی شیعە پشتیوانیان دەکەن، بۆیە حکومەتی عێراق توانای رووبەڕووبوونەوەیانی نییە، ئەوەی تائێستاش کردوویانە لە چوارچێوەی لیکۆڵینەوە و لیژنە و ئامادەکردنی راپۆرت بووە لەبارەی هێرشەکانەوە. 

 

سەباح نوعمان، گوتەبێژی دژەتیرۆری عێراق دەڵێت "ئەم بابەتە لەلایەن فەرماندەی گشتیی هێزە چەکدارەکانەوە زۆر گرنگی پێدەدرێت، هەروەها سەرجەم دەزگا ئەمنییەکانیش. لیکۆڵینەوە لەبارەی هێرشەکان زانیاری هەواڵگاری کۆکراوەتەوە بە بەشداریی هەمووان، ئەمە دەخرێتە بەردەست ئەنجوومەنی ئاسایشی نیشتمان."

 

لەو کاتەوەی شەڕه، حەماس و ئیسرائیل دەستیپێکردووە، زیاتر لە 100 جار لە لایەن گرووپە چەکدارەکانی نزیک لە ئێرانەوە هێرش کراوەتەوە سەر ئەمریکا و هاوپەیمانی نێودەوڵەتی، هێرشەکانیشیان بێ وەڵام نەبوون.

 

لەنێو باڵەخانەی ئەنجوومەنی نوێنەرانی عێراق، لەسەر دیوارێک ئاڵای ئەمریکا نەخشێنراوە، بەتەنیشتییەوە بۆمب و فڕۆکە جەنگییەکانییەتی، لە بەرامبەردا عێراق بە سەرباز و شمشێر و ئاڵایەک رووبەڕوویان وەستاوەتەوە، وێنە نەخشێنراوەکە کە بەشێوەی مۆزایکە، نزیکەی 30 ساڵ لەمەوبەر نەخشێنراوە، بەڵام هەمان سیناریۆ و چیرۆکی سەر وێنەکە، وەک ئەوەیە بۆ ئەمڕۆ بێت، هەمان سیناریۆ و چیرۆک لەسەر خاکی عێراق دووبارە بووەتەوە، بەبێ ئەوەی کۆتایی دیار بێت.