سەرکردەیەکی سەرایا سەلام لە سامەڕا کوژرا
رووداو دیجیتاڵ
سەرکردەیەکی سەرایا سەلام لە قەزای سامەڕا لە پارێزگای سەلاحەدین کوژرا.
هێزێکی سەرایا سەلامی باڵی چەکداری سەر بە رەوتی سەدر لە قەزای سامەڕا جێگیرن.
محەممەد کینانی، گوتەبێژی تەندروستیی میسان بە تۆڕی میدیایی رووداوی گوت، حەیدەر ئەبو ریش، کە یەکێک لە سەرکردەکانی سەرایا سەلام و خەڵکی پارێزگای میسان بوو، ئەمڕۆ لە سامەڕا کوژراوە.
باس لەوە دەکرێت کە حەیدەر کەعبی (حەیدەر ئەبو ریش) بە درۆن کوژراوە، بەڵام گوتەبێژی تەندروستیی میسان دەڵێت، تاوەکو ئێستا هۆکاری کوژرانەکەی بە دروستی لای ئەوان روون نەبووەتەوە.