رووداو دیجیتاڵ
مامۆستایەکی کۆلێژی پەروەردەی وەرزشیی زانکۆی بەسرە، ژنە مامۆستایەکی هاوپیشەی خۆی کە پێکەوە لە زانکۆی بەسرە دەوام دەکەن، دەکوژێت و دواتر دەستگیر دەکرێت.
رووداوەکە دوێنێ سێشەممە، کاژێر 11:17ـی پێشنیوەڕۆ لە ناوچەیەکی نێوان قەزای ئەبی خەسیب و ناحیەی سیبە لە پارێزگای بەسرە روویداوە.
کوژراوەکە ناوی دکتۆر سارا عەمار عەبودییە، لەگەڵ بکوژەکە لە هەمان کۆلێژ مامۆستا بوو. بکوژەکە کاژێر 10:30ـی شەوی رابردوو دەستگیر کرا.
لەوبارەیەوە، ئەمڕۆ چوارشەممە، عەقید عەزیز هاشم، بەڕێوەبەری راگەیاندن و پەیوەندییەکانی پۆلیسی بەسرە بە تۆڕی میدیایی رووداوی گوت، دوای رووداوەکە بەشی بەرەنگاربوونەوەی تاوان لە پۆلیسی بەسرە، بۆ ئاشکراکردنی رووداوەکە لیژنەیەکی پێکهێنا و 12 کاژێر دوای رووداوەکە تۆمەتبارەکەیان دەستگیر کرد.
بکوژ کوڕەخەزووری پارێزگاری بەسرەیە. ئەسعەد عیدانی، پارێزگاری بەسرە تۆمارێکی دەنگی بڵاوکردەوە و جەخت لەوە دەکاتەوە، بەدڵنیاییەوە یاسا و دادپەوەری بەسەر هەمووان جێبەجێ دەکرێت و ناکەوێتە ژێر کاریگەریی هەست و سۆزەوە.
پارێزگاری بەسرە دان بەوەدا دەنێت کە تاوانبارەکە خزمی خۆیەتی و دەڵێت، "تاوانکارەکە لە منەوە نزیکە، خاڵی منداڵەکانمە، مامۆستای زانکۆیە، بەڵام ئێستا لە رووی یاساییەوە تۆمەتبارە و دەستگیرکراوە".
بەگوتەی ئەسعەد عیدانی، هێزە ئەمنییەکان بەوپەڕی پیشەییانە ئەرکی خۆیان بەجێگەیاندووە، تاوانکاریان دەستگیرکردووە و لێکۆڵینەوەی لەگەڵ کراوە. دۆسیەکەی رەوانەی دادوەریی لێکۆڵینەوە کراوە.
پارێزگاری بەسرە دووپاتی دەکاتەوە، "راستە ئەو کەسە برای هاوژینەکەمە، بەڵام یاسا بۆ هەمووانە، لە ماوەی کەمتر لە 12 کاژێردا تاوانکار دەستگیرکراوە".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ