وەزیرى نەوتى عێراق: داوامان کردووە وردبینى لە گرێبەستەکانى نەوتى هەرێمى کوردستان بکەین

 

 

ئیحسان عەبدولجەبار، وەزیرى نەوتى عێراق بە میدیاى فەرمیى عێراقى گوت، "داوامان کردووە وردبینی لە گرێبەستەکانى نەوتى هەرێمى کوردستان بکەین، بەڵام ئەوان لێى دوودڵن، جیاوازیی گەورە هەیە لەنێوان گرێبەستەکان و بڕى دەرهێندراو لە کێڵگەکانى نەوتى هەرێمى کوردستان."

 

وەزیرى نەوتى عێراق پێیوایە کە بڕیارى دادگەى باڵاى فیدراڵى لەبارەى نادەستووریى یاساى نەوت و گازى هەرێمى کوردستان "دادپەروەرانە" بووە و دەشڵێت، "ئەگەر ئەو سکاڵایانە ببەینەوە کە لە دادگە نێودەوڵەتییەکان لە دژى تورکیا تۆمارمان کردووە، 30 ملیار دۆلار قەرەبوو دەکرێینەوە."

 

لە 15ى شوباتى 2022 دادگەى باڵاى فیدراڵیى عێراق یاسای نەوت و گازى هەرێمى کوردستانى ساڵى 2007ى بە نادەستوورى لە قەڵەم دا و  داوایکرد بەرهەمە نەوتییەکانى رادەستى حکومەتى فیدراڵى بکاتەوە.

 

ئیحسان عەبدولجەبار ئەوەی ئاشکرا کرد، 38 سکاڵاى یاسایی لە دژى تۆمار کراوە لەلایەن کۆمپانیاى نەوتى بەسرە و ئەوەى بە کێشەى کەسی لێکداوەتەوە.

 

وەزیری نەوتی عێراق ئەوەیشی خستەڕوو، بڕیارى دادگەى باڵاى فیدراڵى لەبارەى کۆمپانیاکانى نیشتمانیى نەوت و هەڵوەشاندنەوەى "راچڵەکینێک بوو بۆ کەشی یاسایی پیشەسازیى نەوتى عێراق."

 

21ى ئەیلوولى 2022 دادگەى باڵاى فیدراڵیى عێراق بڕیاریدا کە کۆمپانیاى نیشتمانیى نەوت هەڵبوەشێنێتەوە بە پاساوى ئەوەى یاسای پێکهێنانى نادەستوورییە و راسپاردنى وەزیرى نەوتیشى بۆ سەرۆکایەتیکردنى ئەو کۆمپانیایە هەڵوەشاندەوە.