رووداو دیجیتاڵ
دەستەی دەستپاکیی عێراق رایگەیاند، مانگی رابردوو 36 فەرمانی دەستگیرکردن و هێنانە بەردەم دادگەی بۆ 31 بەرپرسی پلەباڵا و تایبەت دەرکردووە، "بڕی زیاتر لە 112 ملیار دینارمان لە پارەی دەوڵەت گەڕاندووەتەوە یان نەمانهێشتووە بەفیڕۆبچێت".
دەستەی دەستپاکیی عێراق لە راگەیێندراوێکدا ئاشکرایکرد، "مانگی تەممووزی رابردوو 36 فەرمانی دەستگیرکردن و هێنانە بەردەم دادگەمان بۆ 31 بەرپرسی پلەباڵا و تایبەت دەرکردووە، بە پشتبەستن بە لێکۆڵینەوەکانی بەڕێوەبەرایەتییەکان و نووسینگەکانی لێکۆڵینەوە لە بەغدا و پارێزگاکان رەوانەی دادگە کراون".
بەپێی دەستەکە، 30 تۆمەتبار فەرمانی هێنانە بەردەم دادگە و شەشیان فەرمانی دەستگیرکردنیان هەبووە، دوو لەوانە وەزیری پێشوو، یەک وەزیری پێشووتر، ئەندامێکی پەرلەمان و شەش بەڕێوەبەری گشتیی ئێستا، 14 بەڕێوەبەری گشتیی پێشوو و دوو بەڕێوەبەری گشتیی پێشووتر، جگە لە پارێزگارێکی پێشوو و سێ پارێزگاری پێشووتر.
دەستەی دەستپاکی دەڵێت، لەو مانگەدا بڕی زیاتر لە 99 ملیار دینار کە دزراوە ئاشکراکراون، نزیکەی سێ ملیار دینار بەپێی بڕیاری یاسایی گەڕێندراوەتەوە، نزیکەی 10 ملیار دیناریش بەکردەیی گەڕێندراوەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ