گوتاربێژی سەدرییەکان: تاکە چارە راپەڕینە دژی حیزبەکان

 

موهەننەد موسەوی، گوتاربێژی نوێژی هەیینیی رەوتی سەدر ئەمڕۆ هەینی 26/8/2022، لە گوتاری ئەم هەینییەدا رایگەیاند: "داواکارییەکانی شۆڕشی عاشوورا دژی گەندەڵی و پاشکۆیی رەوان؛ شۆڕشی چاکسازیش بە هیچ شێوەیەک رازی نابێت بە گفتوگۆکردن لەگەڵ کۆمەڵەی گەندەڵکاران".

 

موهەننەد موسەوی گوتیشی: "ترس وا لە کەسانێک دەکات داوای مافە رەواکان نەکەن، بەڵام گەندەڵی گەیشتووەتە ئاستێک چی دیکە قبووڵ ناکرێت. ئێستاش بڕیاری لای ئێوەیە [بڕیار لای جەماوەرە]، یاساش لە ژێر دەسەڵاتی ئێوە و دەستوور لەبەردەمتانە".

 

گوتاربێژی نوێژی هەیینیی رەوتی سەدر گوتیشی: "شۆڕشی عاشوورا توانای جەماوەری زیندووکردەوە بۆ وەستان دژی گەندەڵی و هەر دەبێ سەربکەوێت؛ حیزبەکان هیچ سامانێکیان بۆ ئەم وڵاتە نەهێشتووەتەوە؛ تاکە چارەش راپەڕینە دژیان بۆ لابردنیان و لێپرسینەوە لەگەڵیان".

 

لە کۆتایی مانگی حەوتی رابردووەوە لایەنگرانی رەوتی سەدر لە باڵەخانەی پەرلەمانی عێراق مانیان گرتووە و داوای هەڵوەشاندنەوەی پەرلەمان و بەڕێوەچوونی هەڵبژاردنێکی دیکەی پێشوەخت دەکەن؛ لە بەرامبەردا چوارچێوەی هاوئاهەنگیی شیعە کە خاوەنی گەورەترین فراکسیۆنە لە پەرلەمان و رکابەری رەوتی سەدرە، پێداگیرە لەسەر پێکهێنانی حکومەتی نوێ و گۆڕینی یاسا و کۆمیسیۆنی هەڵبژاردنەکان پێش بەڕێوەچوونی هەڵبژاردنێکی دیکە.